អនុប្រធានលេខាធិការដ្ឋាន គ.ជ.អ.ប. ធ្វើដំណើរទស្សនកិច្ចសិក្សា ពីការគិតគូរឡើងវិញអំពីការគាំពារសង្គម និងការប្រែប្រួលអាកាសធាតុ នៅអូស្ត្រាលី
ទីក្រុង Canberra ប្រទេសអូស្ត្រាលី៖ កាលពីថ្ងៃទី៣-៧ ខែមីនា ឆ្នាំ២០២៥ ឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. បានចូលរួមទស្សនកិច្ចសិក្សានៅប្រទេសអូស្ត្រាលីពីគិតគូរឡើងវិញអំពីការគាំពារសង្គម ការគ្រប់គ្រងហានិភ័យនៃគ្រោះមហន្តរាយ និងការប្រែប្រួលអាកាសធាតុ ក្រោមការគាំទ្រពីរដ្ឋាភិបាលអូស្រ្តាលី និងសហព័ន្ធអាល្លឺម៉ង់ ដោយមានការសម្របសម្រួលពីអង្គការ GIZ។
គោលបំណងនៃទស្សនៈកិច្ចសិក្សានេះគឺដើម្បី៖ (១) លើកកម្ពស់នូវចក្ខុវិស័យរួម និងការយល់ដឹងអំពីការសម្របខ្លួនទៅនឹងការគាំពារសង្គម(២) បង្កើនការយល់ដឹងអំពីប្រព័ន្ធគ្រប់គ្រងហានិភ័យគ្រោះមហន្តរាយ និងអន្តរកម្មរវាងប្រព័ន្ធគាំពារសង្គមនៅប្រទេសអូស្រ្តាលី និង(៣) ផ្តល់នូវជំនាញដល់អ្នកចូលរួមអំពីការកំណត់ចំណុចចូលជាយុទ្ធសាស្ត្រសម្រាប់ការធ្វើសមាហរណកម្មនៃការគាំពារសង្គម និងរបៀបវារៈការប្រែប្រួលអាកាសធាតុ។ ជាមួយគ្នានេះផងដែរដំណើរទស្សនកិច្ចសិក្សានេះក៏មានការអញ្ជើញចូលរួមពីតំណាងក្រសួងស្ថាប័នពាក់ព័ន្ធរួមមាន ក្រសួងបរិស្ថាន ក្រសួងផែនការ គណៈកម្មាធិការជាតិគ្រប់គ្រងគ្រោះមហរន្តរាយ លេខាធិការដ្ឋានគ.ជ.អ.ប. អគ្គលេខាធិការដ្ឋានក្រុមប្រឹក្សាជាតិគាំពារសង្គម មូលនិធិជាតិជំនួយសង្គម អង្គការ WFP និងអង្គការ UNDP។
ជារួម ទស្សនកិច្ចសិក្សានេះបានផ្តល់នូវមេរៀន និងបទពិសោធន៍អំពីតួនាទីចាំបាច់បង ប្តូរ មក ស្ថាប័នរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិថ្នាក់មូលដ្ឋានក្នុងការសម្របសម្រួលដោះស្រាយបញ្ហាគ្រោះមហន្តរាយនានា។ តាមរយះការចុះពិនិត្យមើលការងាររបស់អង្គភាពផ្តល់សេវាអូស្រា្តលី ស្តាប់បទបង្ហាញពីអង្គភាពនានារួមមានការិយាល័យឧតុនិយមអូស្រ្តាលី អង្គភាពគ្រប់គ្រងសង្គ្រោះបន្ទាន់ជាតិអូស្រ្តាលី(NEMA) កងកម្លាំងសង្គ្រោះសង្គម ធនាគារពិភពលោក នាយកដ្ឋានសេវាសង្គម និងនាយកដ្ឋានប្រែប្រួលអាកាសធាតុអុស្រ្តាលី បានឆ្លុះបញ្ចំងឱ្យឃើញថា យន្តការប្រព័ន្ធរដ្ឋាភិបាលរបស់អូស្រា្តលីទាំងមូលគឺការសហការរវាងអាជ្ញាធរថ្នាក់សហព័ន្ធ និងភ្នាក់ងាររដ្ឋនីមួយៗដើម្បីធានាថាការទូទាត់ប្រាក់ជំនួយ ការឆ្លើយតបទៅនឹងការសង្គ្រោះបន្ទាន់ទាន់ពេលវេលា និងកម្មវិធីភាពធន់រយៈពេលវែងបានទៅដល់សហគមន៍ដែលត្រូវការពិតប្រាកដ។ ការទទួលខុសត្រូវ និងជំនាញច្បាស់លាស់របស់មូលដ្ឋាន ព្រមទាំងមានយន្តការសម្របសម្រួលពេញលេញ ធ្វើឲ្យការឆ្លើយតបទៅនឹងគ្រោះមហន្តរាយនានាមានប្រសិទ្ធភាព និងផ្តោតសំខាន់ទៅលើសហគមន៍។
ចំណុចដ៏សំខាន់មួយទៀតគឺ ការគ្រប់គ្រងហិរញ្ញវត្ថុប្រកបដោយចីរភាព ដែលជាកម្លាំងចលករជំរុញសម្រាប់ការសម្រេចគោលដៅហានិភ័យគ្រោះមហន្តរាយជាតិ និងការប្រែប្រួលអាកាសធាតុ។ ការប្រើប្រាស់មូលនិធិហិរញ្ញវត្ថុនានារបស់រតនាគារជាតិអូស្រ្តាលី រួមមានមូលនិធិហិរញ្ញវត្ថុហានិភ័យមហន្តរាយ, ប្រព័ន្ធធានារ៉ាប់រង, សញ្ញាប័ណ្ណបៃតង (Green bonds), និងមូលនិធិភាពធន់ (Resilience funds) បានបង្ហាញពថាការវិនិយោគហិរញ្ញវត្ថុដោយយុទ្ធសាស្រ្ត អាចកាត់បន្ថយហានិភ័យសង្គម និងសេដ្ឋកិច្ចរយៈពេលវែង។ ការពង្រឹងប្រព័ន្ធការពារសង្គម និងយុទ្ធសាស្ត្រហិរញ្ញវត្ថប្រកបដោយនវានុវត្តអាចជាគន្លឹះសំខាន់សម្រាប់កម្ពុជា ក្នុងដំណើរទៅរកអនាគតដែលមានភាពធន់ និងបន្សាំទៅនឹងការប្រែប្រួលអាកាសធាតុ ៕
