លោក ត្រាំ ប្រាប់អគ្គលេខាធិការ NATO ថា ការគ្រប់គ្រងលើដែនដី Greenland ដោយអាមេរិក ជារឿងចាំបាច់ ដើម្បីពង្រឹងសន្តិសុខអន្តរជាតិ

វ៉ាស៉ីនតោន៖ ប្រធានាធិបតីអាមេរិក លោក ដូណាល់ ត្រាំ បានប្រាប់អគ្គលេខាធិការអង្គការណាតូ (NATO) លោក Mark Rutte កាលពីថ្ងៃព្រហស្បតិ៍សប្តាហ៍នេះថា ការគ្រប់គ្រងលើដែនដី Greenland ដោយសហរដ្ឋអាមេរិក គឺជារឿងចាំបាច់ ដើម្បីពង្រឹងសន្តិសុខអន្តរជាតិ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១៤ ខែមីនា ឆ្នាំ ២០២៥។

ពេលអង្គុយក្បែរគ្នានៅឯ Oval Office នៃសេតវិមាន លោក ត្រាំ ប្រាប់លោក Rutte ដូច្នេះថា «អ្នកដឹងទេ យើងត្រូវការវា (Greenland) សម្រាប់សន្តិសុខអន្តរជាតិ ហើយមិនមែនត្រឹមតែសន្តិសុខ ជាអន្តរជាតិប៉ុណ្ណោះនោះទេ។ មានអ្នកលេងនៅជុំវិញខ្លួនយើងច្រើនណាស់ យើងតែត្រូវប្រុងប្រយ័ត្ន»។

នៅពេលត្រូវបានសួរចំៗតែម្តង អំពីគោលបំណងចាប់យក Greenland លោក ត្រាំ ឆ្លើយថា «ខ្ញុំគិតថា វានឹងកើតឡើង»។ ចំណែកលោក Rutte បានប្រាប់លោក ត្រាំ វិញថា «ខ្ញុំមិនចង់អូសណាតូ ឱ្យធ្លាក់ចូលទៅក្នុងការវែកញែកនេះទេ។ វាគួរតែជាប្រធានបទសម្រាប់ប្រទេស នៅប៉ែកខាងជើងអាមេរិក ដោយសារតែចិន និងរុស្ស៉ីកំពុងប្រើប្រាស់ផ្លូវទឹកក្នុងតំបន់នេះ»។

គួរបញ្ជាក់ថា ដោយសារទីតាំងយុទ្ធសាស្ត្រ និងសម្បូរធនធានរ៉ែច្រើនប្រភេទ Greenland មានអត្ថប្រយោជន៍សម្រាប់សហរដ្ឋអាមេរិក។ ស្ថិតនៅតាមបណ្តោយច្រកផ្លូវជិតបំផុតពីអឺរ៉ុបទៅអាមេរិកខាងជើង វាមានសារៈសំខាន់សម្រាប់ប្រព័ន្ធព្រមានអំពីមីស៉ីលបាលីស្ទីគរបស់សហរដ្ឋអាមេរិក៕