សម្តេចតេជោ៖ មានកត្តាសំខាន់ៗចំនួន ៤ ដែលកម្ពុជាសម្រេចចិត្តចូលអាស៊ានឱ្យខាងតែបាន

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃកម្ពុជា និងជាប្រធានកិត្តិយសសមាគមឧកញ៉ាកម្ពុជា បានលើកឡើងថា ក្រោយកម្ពុជាមានសន្តិភាពពេញលេញ សម្ដេចបានសម្រេចដឹកនាំកម្ពុជាចូលអាស៊ានឱ្យខាងតែបាន ហើយមានកត្តាសំខាន់ៗចំនួន ៤ ដែលកម្ពុជាសម្រេចចិត្តចូលអាស៊ាន។

សម្ដេចបានលើកឡើងបែបនេះក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីពិសាភោជនាហារសាមគ្គី នៃគ្រួសារសមាគមឧកញ៉ាកម្ពុជា នៅល្ងាចថ្ងៃទី១៤ ខែមីនា ឆ្នាំ២០២៥នេះ។

សម្ដេចតេជោ ហ៊ុន សែន បញ្ជាក់បន្ថែមថា ត្តាសំខាន់ៗចំនួន ៤ ដែលកម្ពុជាសម្រេចចិត្តចូលអាស៊ានឱ្យខាងតែបានក្នុងនោះគឺ ទី១.អាស៊ានប្រកាន់គោលការណ៍មិនជ្រៀតជ្រែកចូលកិច្ចការផ្ទៃក្នុងប្រទេសដទៃក្នុងតំបន់, ទី២.អាស៊ានមានគោលការណ៍ ស្មារតីសហគមន៍, ទី៣.កម្ពុជាទទួលផលជាច្រើនពីការចូលអាស៊ាន ជាពិសេសការទទួលផលពីការអនុគ្រោះពន្ធនានា ទាំងពីប្រទេសអាស៊ានចាស់ និងអាស៊ានថ្មីជាច្រើនឆ្នាំ, ទី៤.ការចូលអាស៊ាន គឺជាច្រកចេញការទូតរបស់កម្ពុជា គឺដោយសារអាស៊ានមានដៃគូច្រើនក្នុងនោះមានដូចជា អាស៊ាន-អាម៉េរិក, អាស៊ាន-អង្គការសហប្រជាជាតិ, អាស៊ាន-អង្គការពាណិជ្ជកម្មពិភពលោក(WTO)ជាដើម៕