លោក ដូណាល់ ត្រាំ នឹងជជែកជាមួយលោក ពូទីន អំពីផែនការបញ្ចប់សង្រ្គាមនៅអ៊ុយក្រែន

វ៉ាស៊ីនតោន៖ លោក ដូណាល់ ត្រាំ ប្រធានាធិបតីចិត្តដែកអាម៉េរិក បានអះអាងថា លោកនឹងជជែកជាមួយបុរសខ្លាឃ្មុំទឹកកក វ្ល៉ាឌីមៀ ពូទីន នៅថ្ងៃអង្គារទី១៨មីនានេះ អំពីផែនការបញ្ចប់សង្រ្គាមនៅអ៊ុយក្រែន ជាពិសេសគឺទាក់ទងទៅនឹងការសម្បទានទឹកដីនៃរដ្ឋធានីកៀវសម្រាប់រុស្ស៊ី និងការគ្រប់គ្រងរោងចក្រថាមពលនុយក្លេអ៊ែរហ្សាប៉ូរីហ្ស៊ា។

ជាក់ស្តែង លោកត្រាំបានប្រាប់អ្នកយកព័ត៌មាននៅរដ្ឋធានីវ៉ាស៊ីនតោន កាលពីថ្ងៃចន្ទថា៖«អ្វីដែលកំពុងកើតឡើងនៅអ៊ុយក្រែន គឺមិនល្អទេ! ប៉ុន្តែយើងនឹងមើលថា តើយើងអាចធ្វើការលើកិច្ចព្រមព្រៀងសន្តិភាព បទឈប់បាញ់ និងពន្លឺសន្តិភាពជូនអ៊ុយក្រែនបានដែរឬទេ? ហើយខ្ញុំគិតថាយើងនឹងអាចធ្វើវាបាន»។ ជុំវិញដំណើរទស្សនកិច្ចនេះ ត្រាំ បានគូសបង្ហាញថា៖«យើងនឹងនិយាយអំពីការសម្បទានទឹកដី។ យើងនឹងនិយាយអំពីរោងចក្រថាមពលនុយក្លេអ៊ែរ..យើងកំពុងនិយាយអំពីរឿងរ៉ាវនោះរួចហើយ ដោយបែងចែកទ្រព្យសម្បត្តិមួយចំនួន»។

យ៉ាងណា ត្រាំ និងពូទីន គ្រោងពិភាក្សាគ្នាអំពីរោងចក្រថាមពលនៅតាមតំបន់ព្រំដែននៃប្រទេសរុស្ស៊ី និងអ៊ុយក្រែន។ គួរជម្រាបថា ក្រៅតែពីការព្យាយាមសម្រេចសំណើបទឈប់បាញ់រយៈពេល៣០ថ្ងៃ ដែលអ៊ុយក្រែនបានបើកទទួលយកកាលពីសប្តាហ៍មុន លោក ក៏ផ្តោតទៅ រោងចក្រថាមពលនុយក្លេអ៊ែរនៅហ្សាប៉ូរីហ្ស៊ាផងដែរ ខណៈរោងចក្រនោះត្រូវបាន កាន់កាប់ ដោយ រុស្ស៊ី ក្នុង ទឹកដី អ៊ុយក្រែន ហើយនោះក៏ ជា រោងចក្រ នុយក្លេអ៊ែរ ធំ ជាង គេ របស់ អឺរ៉ុបផងដែរ។ កន្លងមក រុស្ស៊ី និងអ៊ុយក្រែនបានចោទប្រកាន់សកម្មភាពវាយប្រហារគ្នាទៅវិញទៅលើការបង្កគ្រោះថ្នាក់ នៅឯរោងចក្រថាមពលនុយក្លេអ៊ែរនេះ។

គួរជម្រាបថា ភាគីទាំងពីរបានបើកការវាយប្រហារតាមអាកាសទ្រង់ទ្រាយធំ កាលពីថ្ងៃចន្ទ ខណៈយោធារុស្ស៊ីបានព្យាយាមបណ្តេញកងកម្លាំងអ៊ុយក្រែនចេញពីទីតាំងឈរជើងក្នុងតំបន់ឃឺស ភាគខាងលិចនៃប្រទេសរុស្ស៊ី។ ទន្ទឹមនឹងនោះ លោក ពូទីន អះអាងថា លោកពិចារណាផ្តល់បទឈប់បាញ់ដល់អ៊ុយក្រែន ប្រសិនបើយោធាស្នេហាជាតិរដ្ឋធានីកៀវទម្លាក់អាវុធចុះចាញ់។

ជុំវិញរឿងរ៉ាវខាងលើ អតីតតារាកម្លែងអ៊ុយក្រែន លោក វ៉ូ ឡូឌីមៀ ហ្សេឡេនស្គី បានអះអាងថា លោកមើលឃើញឱកាសដ៏ល្អមួយដើម្បីបញ្ចប់សង្រ្គាមតាមរយៈទទួលយកសំណើបទឈប់បាញ់របស់សហរដ្ឋអាម៉េរិក ប៉ុន្តែអធិបតេយ្យភាពរបស់អ៊ុយក្រែនមិនអាចចរចាបានទេ ហើយរុស្ស៊ីត្រូវតែប្រគល់ទឹកដីដណ្តើមបានពីអ៊ុយក្រែនប្រគល់ជូនខ្លួនវិញ៕