លោក ដូណាល់ ត្រាំ អះអាងថា ប្រធានាធិបតីចិន លោក ស៊ី ជីនពីង នឹងធ្វើទស្សនកិច្ចមកសេតវិមានដល់សហរដ្ឋអាម៉េរិក«ក្នុងពេលដ៏ខ្លីខាងមុខ»
វ៉ាស៊ីនតោន៖ លោក ដូណាល់ ត្រាំ ប្រធានាធិបតីសហរដ្ឋអាម៉េរិក កាលពីថ្ងៃចន្ទទី១៧ មីនាអះអាងថា ប្រធានាធិបតីចិន លោក ស៊ី ជីនពីង នឹងធ្វើទស្សនកិច្ចមកគោះទ្វារសេតវិមានដល់សហរដ្ឋអាម៉េរិក«ក្នុងពេលដ៏ខ្លីខាងមុខ» សម្រាប់កិច្ចពិភាក្សាលើបញ្ហារាប់សិបជំពូក ខណៈភាពតានតឹងសេដ្ឋកិច្ចរវាងមហាអំណាចទាំង២ កំពុងស្ថិតក្នុងរបត់រលាក។
លោក ត្រាំ បានបានលើកឡើងប្រកបដោយភាពសុទិដ្ឋិនិយម និងភាពវិជ្ជមានក្នុងពេលប៉ុន្មានសប្តាហ៍ថ្មីៗនេះ អំពីការស្តារ ឡើងវិញនៃទំនាក់ទំនងឱ្យកាន់តែល្អប្រសើរជាមួយលោក ស៊ី ជីនពីង។ ជាក់ស្តែង លោក ត្រាំ បានបញ្ជាក់ថា៖«លោក[ស៊ី] នឹងមកក្នុងពេលដ៏ខ្លីខាងមុខនេះ»។
យ៉ាងណា មាន សញ្ញាណ តិចតួចណាស់ នៃ ការ វិវឌ្ឍ ទៅមុខជុំវិញទំនាក់ទំនងរវាងមហាអំណាចសេដ្ឋកិច្ចទាំង២ ដោយសារតែប្រទេសទាំង២បានជាប់គាំងលើបញ្ហាជាច្រើន ជាពិសេសទាំងស្តេចឥន្រ្ទីអាម៉េរិក និងស្តេចនាគរាជចិនសុទ្ធតែបៀមជាប់នូវគំនុំ និងចរិតមានះចង់ឈ្នះ-ចង់ចាញ់ដូចគ្នា។
គេនៅបានថា បុរសឥន្រ្ទីអាម៉េរិកត្រាំ បានយកពន្ធ២០ភាគរយលើការនាំចូលផលិតផលទាំងអស់ពីប្រទេសចិន ចាប់តាំងពីឈានជើងចូលកាន់តំណែងកាលពីខែមករា ដោយយកលេសថា រដ្ឋធានីប៉េកាំងមិនអាចទប់ស្កាត់បានលើរំហូរនៃសារធាតុញៀនហ្វេតានីលខុសច្បាប់ ចូលទៅក្នុងសង្គមអាម៉េរិក។
ជាមួយគ្នា ប្រធានាធិបតី អាម៉េរិក បញ្ជាក់ថា ពន្ធ គឺ ចាំបាច់ ដើម្បី រក្សា តុល្យភាព ទំនាក់ទំនង ពាណិជ្ជកម្ម មិន ស្មើគ្នា ជាមួយ បរទេស និង ដើម្បី បង្កើន ប្រាក់ចំណូល សម្រាប់ រដ្ឋាភិបាល។ យ៉ាងណាក៏ដោយ មហាយក្សចិន ជំទាស់នឹងការយកពន្ធនេះ ហើយរដ្ឋធានីប៉េកាំងបានដាក់កំណត់នូវសកម្មភាពពាណិជ្ជកម្មសាជាថ្មី ដើម្បីសងសឹកចំណាត់ការរបស់លោក ត្រាំ វិញ៕
