ឯកឧត្តម សួស ប្រាថ្នា អញ្ជើញចូលរួមក្នុងកិច្ចប្រជុំត្រួតពិនិត្យ និងពិភាក្សាលើ «សេចក្តីព្រាងអនុក្រឹត្យស្តីពីការគ្រប់គ្រង ការផ្សព្វផ្សាយពាណិជ្ជកម្មតាមមធ្យោបាយគ្រប់ប្រភេទនៅរដ្ឋបាលថ្នាក់ក្រោមជាតិ»

ភ្នំពេញ៖ នៅទីស្តីការក្រសួងមហាផ្ទៃ នាព្រឹកថ្ងៃសុក្រ ទី២១ ខែមីនា ឆ្នាំ២០២៥នេះ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានអញ្ជើញចូលរួមក្នុងកិច្ចប្រជុំត្រួតពិនិត្យ និងពិភាក្សាលើ «សេចក្តីព្រាងអនុក្រឹត្យស្តីពីការគ្រប់គ្រងការផ្សព្វផ្សាយពាណិជ្ជកម្មតាមមធ្យោបាយគ្រប់ប្រភេទនៅរដ្ឋបាលថ្នាក់ក្រោមជាតិ» ក្រោមអធិបតីភាពឯកឧត្តម សន្តិបណ្ឌិត រដ្ឋលេខាធិការប្រចាំការ ក្រសួងមហាផ្ទៃ។ កិច្ចប្រជុំនេះ មានការអញ្ញើញចូលរួមពី ឯកឧត្តម អ៊ុំ ម៉ារ៉ា រដ្ឋលេខាធិការ ឯកឧត្តម ហ៊ន យុវនាប្រធានក្រុមប្រឹក្សានីតិកម្ម ឯកឧត្តម សួស ប្រាថ្នា អគ្គនាយក និងលោក-លោកស្រី ជាអគ្គនាយករង ប្រធាននាយកដ្ឋាន មន្រ្តីពាក់ព័ន្ធនៃអគ្គនាយកដ្ឋានរដ្ឋបាលផងដែរ។

ជាកិច្ចចាប់ផ្តើមនៃកិច្ចប្រជុំ ឯកឧត្តម សន្តិបណ្ឌិត រដ្ឋលេខាធិការប្រចាំការ បានថ្លែងអំណរគុណដល់ក្រុមការងារដែលបានខិតខំប្រឹងប្រែងក្នុងការរៀបចំចងក្រងខ្លឹមសារសេចក្តីព្រាងអនុក្រឹត្យនេះ ដើម្បីផ្តល់មកអង្គប្រជុំពិនិត្យនាឱកាសនេះ។

ជាកិច្ចបន្ត ឯកឧត្តមសន្តិបណ្ឌិត បានអនុញ្ញាតដល់លោក ឆាង វ័យ ប្រធាននាយកដ្ឋានកិច្ចការរដ្ឋបាលរាជធានី ខណ្ឌ និងខេត្ត នៃអគ្គនាយកដ្ឋានរដ្ឋបាល ឡើងធ្វើបទបង្ហាញនិងសេចក្តីរាយការណ៍ពីគោលបំណងរចនាសម្ព័ន្ធ និងបទប្បញ្ញត្តិសំខាន់ៗតាមជំពូកនីមួយៗនៃសេចក្តីព្រាងអនុក្រឹត្យនេះ ដើម្បីជូនអង្គប្រជុំពិនិត្យពិភាក្សានិងផ្តល់យោបល់។ ក្នុងនោះ អង្គប្រជុំបានពិនិត្យ និងកែសម្រួលខ្លឹមសារនៃសេចក្តីព្រាងអនុក្រឹត្យនេះប្រកបដោយសង្គតិភាព សំដៅធានាបានការគ្រប់គ្រង និងត្រួតពិនិត្យការផ្សព្វផ្សាយពាណិជកម្មគ្រប់ប្រភេទរបស់រដ្ឋបាលថ្នាក់ក្រោមជាតិ។

សូមបញ្ជាក់ថា៖ សេចក្តីព្រាងអនុក្រឹត្យនេះមាន ១០ជំពូក និង ៤៣មាត្រា ដែលបានរៀបចំឡើងដោយម៉ត់ចត់ ឆ្លងកាត់ការប្រជុំត្រួតពិនិត្យជាច្រើនលើក ដោយអនុលោមតាមលិខិតបទដ្ឋានគតិយុត្តរបស់រាជរដ្ឋាភិបាល និងក្រសួងស្ថាប័នពាក់ព័ន្ធ ដើម្បីកំណត់ការគ្រប់គ្រងការផ្សព្វផ្សាយពាណិជ្ជកម្មតាមមធ្យោបាយគ្រប់ប្រភេទទាំងចល័ត និងអចល័តនៅរដ្ឋបាលថ្នាក់ក្រោមជាតិក្នុងដែនសមត្ថកិច្ចក្រសួងមហាផ្ទៃ ៕