ជើងហោះហើរអន្តរជាតិចំនួន៧ពីរមណីយដ្ឋានកោះបាលីរបស់ឥណ្ឌូណេស៊ីត្រូវបានលុបចោល បន្ទាប់ពីភ្នំភ្លើងមួយនៅភាគខាងកើតនៃប្រទេសប្រជុំកោះមួយនេះបានផ្ទុះ

ហ្សាការតា៖ យ៉ាងហោចណាស់ជើងហោះហើរអន្តរជាតិចំនួន៧ពីរមណីយដ្ឋានកោះបាលីរបស់ប្រទេសឥណ្ឌូណេស៊ីត្រូវបានលុបចោល បន្ទាប់ពីភ្នំភ្លើងមួយនៅភាគខាងកើតនៃប្រទេសប្រជុំកោះមួយនេះបានផ្ទុះ និងបាញ់ផេះភ្នំភ្លើងកម្ពស់ ៨គីឡូម៉ែត្រ ធ្វើឱ្យខ្មៅងងឹតពេញផ្ទៃមេឃ។

អាជ្ញាធរអះអាងថា ភ្នំភ្លើងឡេវ៉ូតូប៊ី ឡាគីឡាគី (Lewotobi Laki-Laki) ជាភ្នំភ្លើងភ្លោះកម្ពស់១៧០០៣ម៉ែត្រស្ថិតនៅលើកោះទេសចរណ៍ Flores បានផ្ទុះឡើង កាលពីល្ងាចថ្ងៃព្រហស្បតិ៍ទី២០មីនា ដោយបង្កើនស្ថានភាពប្រកាសអាសន្ននៃបន្ទុះភ្នំភ្លើងដល់កម្រិតខ្ពស់បំផុត។

អ្នកនាំពាក្យអាកាសយានដ្ឋានអន្តរជាតិងូរ៉ាហ៍រ៉ៃ Ngurah Rai នៃកោះបាលី លោក អាន់ដាឌីណា ឌីយ៉ាហ៍ (Andadina Dyah) បានលើកឡើងនៅក្នុងសេចក្តីថ្លែងការណ៍មួយថា៖«គិតត្រឹមព្រឹកថ្ងៃសុក្រនេះ ជើងហោះហើរអន្តរជាតិចំនួន៧ ត្រូវបានលុបចោល ក្នុងនោះចំនួន៦ គឺជាជើងហោះហើរ Jetstar ទៅកាន់ប្រទេសអូស្ត្រាលី និងជើងហោះហើរ Air Asia មួយទៅកាន់ម៉ាឡេស៊ី»។ ក្រៅពីនេះ ជើងហោះហើរជាច្រើនផ្សេងទៀត ទាំងក្នុងស្រុក និងអន្តរជាតិ រួមទាំងទៅប្រទេសថៃ សិង្ហបុរី និងអូស្ត្រាលី ក៏ត្រូវបានពន្យារពេលផងដែរ។

យោងតាមក្រសួងដឹកជញ្ជូន អាកាសយានដ្ឋានក្នុងស្រុក Maumere នៅលើកោះ Flores ដែលនៅជិតបំផុតទៅនឹងភ្នំភ្លើង មិនត្រូវបានរងផងប៉ះពាល់ដោយសារផេះ និងកម្អែរភ្នំភ្លើងនោះទេ។ ទីភ្នាក់ងារភ្នំភ្លើងឥណ្ឌូណេស៊ី បានលើកឡើងនៅក្នុងសេចក្តីថ្លែងការណ៍អំពីបន្ទុះភ្នំភ្លើងនេះថា៖«[..]គេសង្កេតឃើញផ្សែងផេះពណ៌ខ្មៅខ្មួលខ្មាញ់ងងឹតពេញមេឃ»។ បន្ទុះភ្នំភ្លើងនេះបានជំរុញឱ្យទីភ្នាក់ងារភូគព្ភសាស្ត្ររបស់ប្រទេសប្រជុំំកោះមួយនេះបង្កើនកម្រិតប្រកាសអាសន្នដល់កម្រិតខ្ពស់បំផុត។

សូមរំឭកថា កាលពីខែវិច្ឆិកា ឆ្នាំមុន ភ្នំភ្លើងឡាគីឡាគីបានផ្ទុះឡើងជាច្រើនដង ដោយបានសម្លាប់មនុស្ស៩នាក់ និងលុបចោលជើងហោះហើរអន្តរជាតិជាច្រើនទៅកាន់កោះទេសចរណ៍បាលី និងបង្ខំមនុស្សរាប់ពាន់នាក់ជម្លៀសខ្លួនចេញ។ គួរបញ្ជាក់ថា ឥណ្ឌូណេស៊ី គឺជាប្រទេសប្រជុំកោះដ៏ធំមួយដែលតែងជួបប្រទះនឹងគ្រោះរញ្ជួយដី និងសកម្មភាពបន្ទុះភ្នំភ្លើងជាញឹកញាប់ ដោយសារតែប្រទេសនេះស្ថិតលើខ្សែក្រវាត់ភ្នំភ្លើងនៃមហាសមុទ្ទប៉ាស៊ីហ្វិក៕