អាល្លឺម៉ង់ បើកស្ថានទូតរបស់ខ្លួនប្រចាំនៅស៉ីរីឡើងវិញ

បែរឡាំង៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២១ ខែមីនា ឆ្នាំ២០២៥ កាលពីថ្ងៃព្រហស្បតិ៍សប្តាហ៍នេះ អាល្លឺម៉ង់ បានបើកស្ថានទូតរបស់ខ្លួនប្រចាំនៅស៉ីរីឡើងវិញ ដែលនឹងនាំឱ្យមានការបង្កើតទំនាក់ទំនងការទូតផ្លូវការ ជាមួយថ្នាក់ដឹកនាំថ្មីនៅទីក្រុង Damascus ខណៈប្រទេសនេះកំពុងប្រឈមនឹងបញ្ហាមនុស្សធម៌ ក៏ដូចជាសន្តិសុខ ក្រោយការដួលរលំនៃរបបលោក Assad។

រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បាននិយាយក្នុងសន្និសីទសារព័ត៌មាននៅទីក្រុង Damascus ដូច្នេះថា «ខ្ញុំមកទីនេះជាលើកទីពីរ រយៈពេលប្រហែល ១០សប្តាហ៍។ ដោយសារតែស៉ីរី និងអនាគតនៃប្រទេសនៅតែមានហានិភ័យ យើង មិន អាច ទាយ ទុក មុន បានទេ ថា នឹង មាន អ្វី កើត ឡើង »។

ដោយពិពណ៌នាពីភាពជាក់ស្តែង លោកស្រី Baerbock និយាយថាមានការខ្វះខាតលើផ្នែកសំខាន់ៗ ពិសេសហេដ្ឋារចនាសម្ព័ន្ធថាមពល ហើយថាអាល្លឺម៉ង់ចង់គាំទ្រស៉ីរី ក្នុងកាងាររកសាងឡើងវិញ ឧទាហរណ៍ ដូចជាការធ្វើទំនើបកម្មរោងចក្រថាមពលជាដើម។

គួរបញ្ជាក់ថា បច្ចុប្បន្នមានតែអ្នកនយោបាយក្រុមតូចប៉ុណ្ណោះ ប្រចាំការនៅស្ថានទូតអាល្លឺម៉ង់ក្នុងទីក្រុង Damascus ហើយនឹងបន្តពង្រីកវត្តមានស្របតាមស្ថានភាពជាក់ស្តែង។ តាមលោកស្រី Baerbock ដោយសារតែការព្រួយបារម្ភពីសុវត្ថិភាព និងកន្លែងមានកំណត់ បញ្ហាទិដ្ឋាការ និងកុងស៊ុល ត្រូវបន្តធ្វើការតាមរយៈលីបង់ដែលជាប្រទេសជិតខាងស៉ីរី៕