ឯកឧត្តម វឹត សុវណ្ណឧត្តម អនុរដ្ឋលេខាធិការក្រសួងការងារ ជួបសំណេះសំណាលជាមួយតំណាងក្រុមហ៊ុន និងកម្មករនិយោជិតនៅរោងចក្រកាត់ដេរ អូសិន អឹភែរឹល មេនូហ្វេកឆឺរីង ឯ.ក ស្ថិតក្នុងខណ្ឌកំបូល

ភ្នំពេញ៖ នៅព្រឹកថ្ងៃទី២៤ ខែមីនា ឆ្នាំ២០២៥ ឯកឧត្តម វឹត សុវណ្ណឧត្តម អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជួបសំណេះសំណាលជាមួយតំណាងក្រុមហ៊ុន និងបងប្អូនកម្មករនិយោជិតនៅរោងចក្រកាត់ដេរ អូសិន អឹភែរឹល មេនូហ្វេកឆឺរីង ឯ.ក (OCEAN APPAREL MANUFACTURING CO., LTD.) ស្ថិតក្នុងសង្កាត់កំបូល ខណ្ឌកំបូល រាជធានីភ្នំពេញ។

ទន្ទឹមនេះ ឯកឧត្តម វឹត សុវណ្ណឧត្តម ក៏បានជួបសួរសុខទុក្ខ និងផ្សព្វផ្សាយអំពីសេវា ប.ស.ស. ដល់បងប្អូនកម្មករនិយោជិត ដែលកំពុងបំពេញការងារនៅក្នុងរោងចក្រនេះ ផងដែរ។

ក្នុងឱកាសនោះ បន្ទាប់ពីបានចុះត្រួតពិនិត្យនៅតាមខ្សែច្រវាក់ផលិតកម្ម និងតាមដានស្ថានភាពនិងព័ត៌មានទូទៅរបស់រោងចក្រ ឯកឧត្តមអនុរដ្ឋលេខាធិការ មើលឃើញថា រោងចក្រនេះអនុវត្តទៅតាមលក្ខខណ្ឌការងារ និងអត្ថប្រយោជន៍ផ្សេងៗសម្រាប់កម្មករនិយោជិត ត្រឹមត្រូវទៅតាមច្បាប់ស្តីពីការងារ រួមនិងស្ថានភាពនៃទំនាក់ទំនងវិជ្ជាជីវៈ មានភាពល្អប្រសើរ៕