ក្រុមអ្នកជំនាញជាតិ និងអន្តរជាតិ បើកកិច្ចប្រជុំរួមគ្នារយៈពេល២ថ្ងៃ ដើម្បីពិភាក្សាលើកិច្ចពង្រឹងការអភិរក្សសត្វផ្សោតទន្លេមេគង្គ នៅខេត្តក្រចេះ

ភ្នំពេញ៖ ក្រោយបញ្ចប់ «យុទ្ធនាការហែលទឹកទន្លេមេគង្គ» ក្រុមអ្នកជំនាញជាតិ និងអន្តរជាតិ បានបើកកិច្ចប្រជុំរួមគ្នារយៈពេល២ថ្ងៃ ដើម្បីពិភាក្សាលើកិច្ចពង្រឹងការអភិរក្សសត្វផ្សោតទន្លេមេគង្គ នៅខេត្តក្រចេះ។ នេះបើតាមអង្គការ WWF កម្ពុជា។

សិក្ខាសាលាស្តីពីការពង្រឹងការអភិរក្សសត្វផ្សោតទន្លេមេគង្គ ធ្វើឡើងរយៈពេល២ថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែមីនា ឆ្នាំ២០២៥ នៅក្នុងទីរួមខេត្តក្រចេះ។ តាមរយៈសិក្ខាសាលាខាងលើ មន្ត្រីរាជរដ្ឋាភិបាល រួមទាំងភាគីអន្តរជាតិ នឹងផ្តល់នូវធាតុចូលដ៏សំខាន់ ដើម្បីវាយតម្លៃសមិទ្ធផល ពង្រឹងភាពជាដៃគូ និងកែលម្អយុទ្ធសាស្ត្រអភិរក្ស។ ជាមួយគ្នា ការពិភាក្សានេះក៏ផ្តោតលើការបង្កើតដំណោះស្រាយដែលអាចធ្វើសកម្មភាពបាន និងធានាបាននូវមូលនិធិប្រកបដោយនិរន្តរភាព ដើម្បីការពារផ្សោតទន្លេមេគង្គដែលកំពុងរងគ្រោះ។

ពាក់ព័ន្ធបញ្ហានេះ អង្គការ WWF គូសបញ្ជាក់ថា៖ «ខណៈពេលវឌ្ឍនភាពនៃកិច្ចអភិរក្សសត្វផ្សោតនាពេលនេះទទួលបានលទ្ធផលជាវិជ្ជមាន ប៉ុន្តែបញ្ហាប្រឈមនៅតែមាន ជាពិសេសការគំរាមកំហែងនៃការជាប់ម៉ងនេសាទខុសច្បាប់ ដែលបន្តបង្កគ្រោះថ្នាក់ដល់សត្វផ្សោត»។ អង្គការ WWF អះអាងបន្តថា៖«កិច្ចការ[សិក្ខាសាលា] ដ៏មានសារសំខាន់នេះ គឺជាយន្តការមួយឆ្ពោះទៅរកការធានាការរស់រានមានជីវិតរយៈពេលវែងរបស់សត្វផ្សោត»។ ហាក់មិនខុសគ្នា លោក ស្រេង សុភាព អភិបាលរងនៃរដ្ឋបាលខេត្តក្រចេះ បានសង្កត់ធ្ងន់ថា៖«សិក្ខាសាលាថ្ងៃនេះ នឹងផ្តល់នូវអនុសាសន៍សំខាន់ៗ ដើម្បីពង្រឹងយុទ្ធសាស្ត្រអភិរក្សបន្ថែមទៀតសម្រាប់ប្រភេទសត្វ ដែលត្រូវបានចាត់ទុកថាជារតនសម្បត្តិជាតិមានជីវិតរបស់កម្ពុជា និងជានិមិត្តរូបនៃទន្លេមេគង្គ»។

គួរបញ្ជាក់ថា កាលពីពេលថ្មីៗ អង្គការ WWF-កម្ពុជា និងក្រុមអ្នកហែលទឹកមកពីក្រៅប្រទេស ក៏ទើបតែបញ្ចប់បេសកកម្មហែលទឹកចម្ងាយ១២០គីឡូម៉ែត្រ រយៈពេល៤ថ្ងៃ ដើម្បីរៃអង្គាសថវិកាសម្រាប់គាំទ្រដល់ការអភិរក្សសត្វផ្សោតកម្ពុជា។ បើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ឆ្នាំ២០២៤ កម្ពុជាមានសត្វផ្សោតទន្លេមេគង្គចំនួន៤ក្បាលបានងាប់ ប៉ុន្តែបើគិតមកដល់ខែមីនា ឆ្នាំ២០២៥ វិញមានកូនផ្សោតកើតថ្មីចំនួន៥ក្បាល ហើយមិនទាន់មានផ្សោតណាមួយងាប់ក្នុងឆ្នាំ២០២៥ឡើយ ៕