អភិបាលខេត្តកំពង់ធំ អំពាវនាវដល់យុវជនទាំងអស់ សូមរួមគ្នាការពារ អភិរក្ស និងអភិវឌ្ឍ ក្នុងនាមជាអ្នកបន្តវេនរបស់កម្ពុជា ដែលជាមហាអំណាចមួយ នៃវប្បធម៌
ភ្នំពេញ៖ ឯកឧត្តម នួន ផារ័ត្ន អភិបាលខេត្តកំពង់ធំ បានអំពាវនាវដល់យុវជនទាំងអស់ សូមរួមគ្នាការពារ អភិរក្ស និងអភិវឌ្ឍ ក្នុងនាមជាអ្នកបន្តវេនរបស់កម្ពុជា ដែលជាមហាអំណាចមួយ នៃវប្បធម៌។
ការអំពាវនាវបែបនេះរបស់ ឯកឧត្តម នួន ផារ័ត្ន បានថ្លែងនៅក្នុងពិធីអបអរសាទរទិវាវប្បធម៌ជាតិ ៣មីនា លើកទី២៧ ឆ្នាំ២០២៥ ក្រោមប្រធានបទ៖ «យុវជន ដើម្បីវប្បធម៌ជាតិ» នាព្រឹកថ្ងៃទី២៦ ខែមីនា ឆ្នាំ២០២៥ នៅសាលប្រជុំមន្ទីរវប្បធម៌ និងវិចិត្រសិល្បៈខេត្តកំពង់ធំ។
ឯកឧត្តម នួន ផារ័ត្ន បានមានប្រសាសន៍បន្ថែមទៀតថា ប្រទេសកម្ពុជាបានកើតឡើងជាមួយ ប្រវត្តិសាស្ត្រ វប្បធម៌ អរិយធម៌ ប្រពៃណីទំនៀមទំលាប់ ដ៏យូរលង់និង ច្បាស់លាស់ ដែលមកទល់បច្ចុប្បន្ននេះ សិល្បៈ វប្បធម៌ បេតិកភ័ណ្ឌទាំងរូបី និងអរូបី ដ៏សម្បូរណ៍បែប ដែលត្រូវបានបង្កើត បន្សល់ទុក និងថែរក្សាការពារដោយបុព្វបុរស់គ្រប់ជំនាន់ គឺជាសក្ខីភាព និងបានក្លាយជាអត្តសញ្ញាណជាតិ ដ៏ថ្លៃថ្លារបស់ជាតិ និងប្រជាជន។ កិច្ចការបន្តវេនថែរក្សា ការពារ និងអភិវឌ្ឍន៍ បានក្លាយជាកាតព្វកិច្ច របស់កូនខ្មែរគ្រប់ៗរូប ហើយបច្ចុប្បន្ន ភារកិច្ចនេះមិនត្រឹមតែផ្តោតគោលដៅការ ការពារអត្តសញ្ញាណជាតិតែមួយមុខនោះទេ ប៉ុន្តែ ថែមទាំងជាកិច្ចខិតខំបង្វែរទិសបន្ថែមទៀតដល់វិស័យសិល្បៈវប្បធម៌ ក្នុងការចូលរួមដោយផ្ទាល់ និងដោយប្រយោលដល់កំណើនសេដ្ឋកិច្ច និងទ្រទ្រង់ជីវភាពប្រជាជន តាមរយៈការកសាងជំនាញបន្តវេន បង្ករបង្កើតការងារ និងតាមរយៈការរីកចម្រើនរបស់វិស័យ ឧស្សាហកម្មវប្បធម៌។
ឯកឧត្តមអភិបាលខេត្ត បានបញ្ជាក់បន្ថែមទៀតថា កិច្ចអភិរក្ស ការពារ និងអភិវឌ្ឍសិល្បៈវប្បធម៌ ជាការងារគ្មានទីបញ្ចប់ និងទាមទារអោយមាន កិច្ចខិតខំប្រឹងប្រែងជាប់មិនដាច់ ព្រមទាំងកសាងអោយបាន នូវយុវជនបន្តវេណប្រកបដោយជំនាញ វិជ្ជាជីវៈនិងមនសិការខ្ពស់ ៕
