លោក ដូណាល់ ត្រាំ នឹងជួយប្រទេសមីយ៉ាន់ម៉ា បន្ទាប់ពីប្រទេសនេះរងការវាយប្រហារដោយគ្រោះរញ្ជួយដី
វ៉ាស៊ីនតោន៖ ប្រធានាធិបតីអាម៉េរិក លោក ដូណាល់ ត្រាំ នៅថ្ងៃសុក្រទី២៨ ខែមីនា បានប្តេជ្ញាថា សហរដ្ឋអាម៉េរិកនឹងជួយប្រទេសមីយ៉ាន់ម៉ា បន្ទាប់ពីប្រទេសនេះរងការវាយប្រហារដោយគ្រោះរញ្ជួយដីដ៏កក្រើកមួយ។ ការណ៍នេះកើតឡើងបន្ទាប់ពីមានការដង្ហើយរកជំនួយដ៏កម្រពីសំំណាក់របបយោធារបស់ប្រទេសអាស៊ីអាគ្នេយ៍នេះ។
លោក ត្រាំ បានប្រាប់អ្នកយកព័ត៌មាននៅក្នុងការិយាល័យប្រធានាធិបតីអំពីការរញ្ជួយដី នៅពេលដែលត្រូវបានសួរថាតើគាត់នឹងឆ្លើយតបទៅនឹងការអំពាវនាវរបស់មេដឹកនាំយោធាមីយ៉ាន់ម៉ាដែរឬទេថា៖«វាជារឿងដ៏អាក្រក់មួយ ហើយយើងនឹងជួយ។ យើងបាននិយាយជាមួយប្រទេសមីយ៉ាន់ម៉ារួចហើយ»។ ទោះបីជាមានការជំរុញរបស់រដ្ឋបាលលោក ត្រាំ ក្នុងការបិទទីភ្នាក់ងារសហរដ្ឋអាម៉េរិកសម្រាប់ការអភិវឌ្ឍអន្តរជាតិ (USAID) និងកាត់បន្ថយការងារស្ទើរតែទាំងអស់ដែលនៅសេសសល់ក៏ដោយ អ្នកនាំពាក្យក្រសួងការបរទេសសហរដ្ឋអាម៉េរិក លោកស្រី ថាំមី ប្រ៊ូស (Tammy Bruce) បាននិយាយថា អ្នកជំនាញគ្រោះមហន្តរាយរបស់ USAID បានត្រៀមខ្លួនរួចជាស្រេចដើម្បីជួយ រួមទាំងរបស់របរដូចជាអាហារ និងទឹកដែលអាចប្រើប្រាស់បាន។ លោកស្រីបានប្រាប់សន្និសីទសារព័ត៌មានថា៖«USAID បានរក្សាក្រុមអ្នកជំនាញគ្រោះមហន្តរាយ ដែលមានសមត្ថភាពឆ្លើយតប ប្រសិនបើគ្រោះមហន្តរាយកើតឡើង។ យើងត្រៀមខ្លួនរួចជាស្រេច។ មិនមានផលប៉ះពាល់ដល់សមត្ថភាពរបស់យើងក្នុងការអនុវត្តភារកិច្ចទាំងនោះ»។
អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរេស បាននិយាយថា ក្រុមការងាររបស់អង្គការសហប្រជាជាតិកំពុងប្រមូលផ្តុំនៅក្នុងតំបន់អាស៊ីអាគ្នេយ៍ ដើម្បីជួយអ្នកដែលត្រូវការជំនួយ។ ទន្ទឹមនឹងនោះ ប្រធានសហភាពអឺរ៉ុប លោកស្រី អ៊ុយស៊ូឡា វ៉ុន ឌឺឡឺយិន បានប្រកាសកាលពីថ្ងៃសុក្រថា ប្លុកប្រទេសចំនួន២៧ បានត្រៀមខ្លួនរួចជាស្រេចដើម្បីជួយបន្ទាប់ពីគ្រោះរញ្ជួយដីដ៏ខ្លាំងក្លាមួយបានវាយប្រហារប្រទេសមីយ៉ាន់ម៉ា និងប្រទេសថៃ។
គ្រោះរញ្ជួយដីកម្រិត៧,៧ រ៉ិចទ័រ បានវាយប្រហារប្រទេសមីយ៉ាន់ម៉ា និងថៃ កាលពីថ្ងៃសុក្រ ដោយបានសម្លាប់មនុស្សជាង ១៥០នាក់ និងរាប់រយនាក់រងរបួស។ ទីក្រុង Mandalay ដែលមានប្រជាជនប្រហែល១,៥ លាននាក់ គឺជារដ្ឋធានីបុរាណរបស់ប្រទេសមីយ៉ាន់ម៉ា និងជាមជ្ឈមណ្ឌលនៃបេះដូងព្រះពុទ្ធសាសនារបស់ប្រទេសគឺជាតំបន់ដែលរងគ្រោះខ្លាំង។ បុគ្គលិកសង្គ្រោះបន្ទាន់កំពុងព្យាយាមជួយព្រះសង្ឃរាប់សិបអង្គដែលជាប់នៅក្រោមគំនរបាក់បែកក្នុងវត្ត Phaya Taung ។ អ្នកស្រុក និងប្រព័ន្ធផ្សព្វផ្សាយក្នុងស្រុកបានឱ្យដឹងថា អគារ ស្ពាន និងផ្លូវរាប់សិបត្រូវបានបំផ្លាញ។ នៅក្នុងសុន្ទរកថាមួយដែលបានចាក់ផ្សាយតាមប្រព័ន្ធផ្សព្វផ្សាយរដ្ឋ ប្រធានរបបយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) បានដង្ហោយរកជំនួយពីប្រទេសណាមួយ ឬអង្គការណាមួយ។
សង្គ្រាមស៊ីវិលរយៈពេលបួនឆ្នាំដែលបង្កឡើងដោយការដណ្តើមអំណាចដោយយោធាបានបំផ្លាញហេដ្ឋារចនាសម្ព័ន្ធ និងប្រព័ន្ធថែទាំសុខភាពរបស់ប្រទេសមីយ៉ាន់ម៉ា ដែលធ្វើឱ្យប្រទេសនេះមិនមានឧបករណ៍គ្រប់គ្រាន់ដើម្បីឆ្លើយតបទៅនឹងគ្រោះមហន្តរាយបែបនេះ៕
