ដំណើរទស្សនកិច្ចសិក្សារបស់លេខាធិការដ្ឋានដឹកនាំ និងសម្របសម្រួលការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា នៃក្រុមប្រឹក្សាអភិវឌ្ឍន៍កម្ពុជា ទៅកាន់ក្រុមហ៊ុនក្នុងវិស័យយានយន្ត និងអេឡិចត្រូនិក
ភ្នំពេញ៖ នៅថ្ងៃទី២៨ ខែមីនា ឆ្នាំ២០២៥ លេខាធិការដ្ឋាន ដឹកនាំ និងសម្របសម្រួលការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា (IDP) ដឹកនាំដោយ ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា និងជាប្រធានលេខាធិការដ្ឋាន IDP បានអញ្ជើញចុះទស្សនកិច្ចសិក្សា
ទៅកាន់ក្រុមហ៊ុនក្នុងវិស័យយានយន្ត និងអេឡិចត្រូនិក ចំនួន ៣ រួមមាន៖ (1)- ក្រុមហ៊ុន DENSO (Cambodia) Co., Ltd. (ផលិតគ្រឿងបង្គុំរថយន្ត), ២)- ក្រុមហ៊ុន SVI (AEC) Company Limited (ផលិតបរិក្ខារអេឡិចត្រូនិក), និង (៣)- ក្រុមហ៊ុន N.C.X. Co., Ltd. (ផលិតគ្រឿងបង្គុំ និងផ្គុំដំឡើងទោចក្រយានយន្ត)។
ដំណើរទស្សនកិច្ចនេះ ត្រូវបានធ្វើឡើង ក្នុងគោលបំណងបង្កើនការយល់ដឹងអំពីប្រតិបត្តិការ, ខ្សែច្រវ៉ាក់ផលិតកម្ម, បញ្ហាប្រឈម និងសំណូមពរនានា របស់ក្រុមហ៊ុន ដើម្បីជាធាតុចូល សម្រាប់ការរៀបចំរបាយការណ៍វាយតម្លៃវឌ្ឍនភាព ២ឆ្នាំ (២០២៣-២០២៤) នៃការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា។
ជារួម ដំណើរទស្សនកិច្ចសិក្សានេះ បានបញ្ចប់ទៅដោយជោគជ័យនិងផ្លែផ្កា ដោយក្រុមហ៊ុនទាំងអស់បានសម្ដែងនូវការវាយតម្លៃខ្ពស់ចំពោះរាជរដ្ឋាភិបាលកម្ពុជាក្នុងការគាំទ្រ និងសម្របសម្រួលដល់ដំណើរការវិនិយោគកន្លងមក ក៏ដូចជា បានបង្ហាញពីឆន្ទៈក្នុងការបន្តពង្រីកការវិនិយោគរបស់ខ្លួននៅកម្ពុជាផងដែរ៕
