ប្រមុខការពារជាតិអាម៉េរិក អះអាងជាថ្មីនូវការប្តេជ្ញាចិត្តដែកថែបរបស់រដ្ឋធានីវ៉ាស៊ីនតោន ចំពោះសន្ធិសញ្ញាការពារជាតិជាមួយហ្វីលីពីន
ម៉ានីល៖ រដ្ឋមន្ត្រីការពារជាតិអាម៉េរិក លោក ភីត ហេគសេត នៅថ្ងៃសុក្រទី២៨ ខែមីនាបានអះអាងសាជាថ្មីនូវការប្តេជ្ញាចិត្តដែកថែបរបស់រដ្ឋធានីវ៉ាស៊ីនតោន ចំពោះសន្ធិសញ្ញាការពារជាតិជាមួយហ្វីលីពីន ហើយបានសន្យាថានឹងដាក់ពង្រាយយុទ្ធោបករណ៍មានសមត្ថភាពខ្ពស់ដល់ដៃគូរបស់ខ្លួន ដើម្បីពង្រឹងការរារាំងប្រឆាំងនឹងការគំរាមកំហែង រួមទាំងការឈ្លានពានរបស់ចិនផងដែរ។
លោក ហេគសេត បានជួបជាមួយរដ្ឋមន្ត្រីការពារជាតិហ្វីលីពីន លោក ហ្គីលប៊ឺតូ តេអូដូរ៉ូ (Gilberto Teodoro) និងប្រធានាធិបតីហ្វីលីពីន លោក ហ្វឺឌីណាន់ ម៉ាកូស ហើយពួកគេបានបង្ហាញពីកិច្ចសហប្រតិបត្តិការដ៏រឹងមាំចំពេលមានការគំរាមកំហែងកាន់តែខ្លាំងឡើងពីប្រទេសចិន ដោយសង្កត់ធ្ងន់លើការប្តេជ្ញាចិត្តរួមគ្នាចំពោះសន្តិភាពនៅក្នុងតំបន់ឥណ្ឌូប៉ាស៊ីហ្វិក និងនៅសមុទ្រចិនខាងត្បូង ដែលរដ្ឋធានីម៉ានីលបានចោទប្រកាន់រដ្ឋធានីប៉េកាំងពីសកម្មភាពអរិភាពម្ដងហើយម្ដងទៀត។
លោក ហេគសេត បានលើកឡើងថា៖ «ការរារាំងគឺជាការចាំបាច់នៅជុំវិញពិភពលោក ប៉ុន្តែជាពិសេសនៅក្នុងតំបន់នេះ នៅក្នុងប្រទេសរបស់អ្នក ដោយពិចារណាលើការគំរាមកំហែងពីពួកកុម្មុយនីស្ដចិន»។ លោកក៏បាននិយាយថា សហរដ្ឋអាម៉េរិកមិនបានស្វែងរកសង្រ្គាមទេ ហើយបានពណ៌នាលោកប្រធានាធិបតី ដូណាល់ ត្រាំ ថាជាអ្នកបង្កើតសន្តិភាព។
ប្រមុខការពារជាតិអាម៉េរិករូបនេះ បានរាយរាប់បន្ថែមថា៖ «សម្ព័ន្ធមិត្តរបស់យើងនឹងដឹងថាយើងឈរជាមួយពួកគេ។ ឧត្តមនាវីរបស់យើងត្រូវបានរៀបចំ ហើយពួកគេនឹងត្រូវបានបំពាក់អាវុធយ៉ាងត្រឹមត្រូវ។ យើងកំពុងកសាងយោធារបស់យើងឡើងវិញក្រោមការដឹកនាំរបស់លោកប្រធានាធិបតី ត្រាំ»។
យោងតាមលោក ហេគសេត សហរដ្ឋអាម៉េរិកនឹងដាក់ពង្រាយយុទ្ធោបករណ៍មានសមត្ថភាពកម្រិតខ្ពស់បន្ថែមទៀតទៅកាន់ប្រទេសហ្វីលីពីន រួមទាំងប្រព័ន្ធមីស៊ីលប្រឆាំងនាវា NMESIS និងយានគ្មានមនុស្សបើក។ សម្ព័ន្ធមិត្តទាំង២ ក៏បានយល់ព្រមធ្វើប្រតិបត្តិការហ្វឹកហ្វឺនកងកម្លាំងពិសេសទ្វេភាគីនៅលើកោះ Batanes ភាគខាងជើងនៃប្រទេសហ្វីលីពីន ដែលនៅជិតនឹងកោះតៃវ៉ាន់។ ហ្វីលីពីនគឺជាកន្លែងឈប់សំចតដំបូងរបស់លោក ហេគសេត ក្នុងដំណើរទស្សនកិច្ចទៅកាន់អាស៊ី។
នៅមុនដំណើរទស្សនកិច្ចរបស់ប្រមុខការពារជាតិអាម៉េរិក អ្នកនាំពាក្យក្រសួងការពារជាតិចិន លោក វូ ឈៀន (Wu Qian) បាននិយាយថា កិច្ចសហប្រតិបត្តិការយោធារវាងសហរដ្ឋអាម៉េរិក និងហ្វីលីពីន មិនគួរប៉ះពាល់ដល់ផលប្រយោជន៍សន្តិសុខរបស់ប្រទេសដទៃនោះទេ។
