ការរញ្ជួយដីដ៏សាហាវដែលបានវាយប្រហារប្រទេសថៃ នឹងជះឥទ្ធិពលអវិជ្ជមានដល់ការធ្វើដំណើររបស់ភ្ញៀវទេសចរបរទេសទៅកាន់ប្រទេស ក្នុងប៉ុន្មានសប្តាហ៍ខាងមុខ
បាងកក៖ ការរញ្ជួយដីដ៏សាហាវដែលបានវាយប្រហារប្រទេសថៃ នឹងជះឥទ្ធិពលអវិជ្ជមានដល់ការធ្វើដំណើររបស់ភ្ញៀវទេសចរបរទេសទៅកាន់ប្រទេសថៃ ក្នុងប៉ុន្មានសប្តាហ៍ខាងមុខ។ នេះជាការវាយប្រហារចុងក្រោយបំផុតលើឧស្សាហកម្មដែលកំពុងប្រឈមការថយចុះនៃភ្ញៀវទេសចរចិន ដែលកំពុងមានការព្រួយបារម្ភអំពីសុវត្ថិភាពនៃការធ្វើដំណើរស្រាប់ទៅហើយនោះ។
សមាគមសណ្ឋាគារថៃបានឱ្យដឹងថា ការមកដល់របស់ភ្ញៀវទេសចរអន្តរជាតិ ត្រូវបានគេរំពឹងថា នឹងធ្លាក់ចុះពី១០ទៅ១៥ភាគរយ ឬច្រើនជាងនេះក្នុងរយៈពេល២សប្តាហ៍ខាងមុខ ខណៈការរញ្ជួយដីកម្រិត៧,៧រ៉ិចទ័រ បានអង្រួនអគារនៅរាជធានីបាងកក និងកន្លែងទេសចរណ៍ដ៏ពេញនិយមផ្សេងទៀតរបស់ប្រទេសថៃ។
លោក ធានប្រសិទ្ធ ជ័យភណ្ឌរ៉ាន័ន្ទ ប្រធានសមាគមសណ្ឋាគារថៃ បានឱ្យដឹងថា ប្រហែល១០ភាគរយនៃអ្នកទេសចរបរទេសបានធ្វើដំណើរចាកចេញភ្លាមៗបន្ទាប់ពីការរញ្ជួយដី ប៉ុន្តែភ្ញៀវទេសចរមួយចំនួនមកបានត្រឡប់ទៅសណ្ឋាគាររបស់ពួកគេវិញ ដោយសារពួកគេគ្មានជម្រើសផ្សេងទៀត។
ផលប៉ះពាល់រយៈពេលខ្លីលើការមកដល់របស់ភ្ញៀវទេសចរ នឹងប៉ះពាល់ដល់សេដ្ឋកិច្ចដែលផ្តល់ការងារដល់កម្លាំងពលកម្មរបស់ប្រទេស និងមានប្រហែល១៣ភាគរយនៃផលិតផលក្នុងស្រុកសរុប។ អាជ្ញាធរថៃកំពុងពឹងផ្អែកលើដំណើរការទេសចរណ៍ ដើម្បីជំរុញកំណើន GDP ដល់៣ភាគរយនៅឆ្នាំនេះ ខណៈការនាំចេញទំនិញប្រឈមមុខនឹងការដាក់ពន្ធពាណិជ្ជកម្មរបស់រដ្ឋបាលលោក ត្រាំ។ ទន្ទឹមនឹងនេះ អាជ្ញាធរថៃបានធានាដល់ភ្ញៀវទេសចរបរទេសឡើងវិញថា ប្រទេសនេះមានសុវត្ថិភាពសម្រាប់ពួកគេ ហើយរាជរដ្ឋាភិបាលបានបញ្ជាឱ្យធ្វើសវនកម្មសុវត្ថិភាពសណ្ឋាគារ និងតំបន់ទេសចរណ៍សំខាន់ៗ។
ការដួលរលំនៃអគារខ្ពស់កំពុងសាងសង់ក្នុងរាជធានីបាងកក គឺជាសោកនាដកម្មខ្លាំងបំផុតក្នុងការរញ្ជួយដីដោយបានសម្លាប់កម្មករ១៨នាក់ (គិតត្រឹមបច្ចុប្បន្ន) ខណៈមនុស្សរាប់សិបនាក់ទៀតបានជាប់នៅក្រោមគំនរបាក់បែក។ ការមកដល់របស់ភ្ញៀវទេសចរបាននិងកំពុងធ្លាក់ចុះដោយសារតែការព្រួយបារម្ភអំពីសុវត្ថិភាពក្នុងរយៈពេលប៉ុន្មានខែថ្មីៗនេះ ជាមួយនឹងការជួញដូរមនុស្សកម្រិតខ្ពស់ជាបន្តបន្ទាប់ទៅកាន់មជ្ឈមណ្ឌលឆបោកក្នុងប្រទេសមីយ៉ាន់ម៉ាតាមរយៈប្រទេសថៃ បានជំរុញឱ្យអ្នកដំណើរចិនមួយចំនួនគេចចេញពីប្រទេសអាស៊ីអាគ្នេយ៍មួយនេះ។ ថៃបានស្វាគមន៍ភ្ញៀវទេសចរចំនួន៨,៩លាននាក់ចាប់តាំងពីដើមឆ្នាំនេះ កើនឡើង២,៩ភាគរយធៀបនឹងឆ្នាំមុន។
