អភិបាលខេត្តបន្ទាយមានជ័យ ផ្ញើសារលិខិតរំលែកទុក្ខជូនក្រុមគ្រួសារសព ចំពោះមរណភាពរបស់លោក មាស សាវ៉ាង ក្នុងឧបទ្ទវហេតុគ្រោះធម្មជាតិរញ្ជួយដីនៅថៃ
ភ្នំពេញ៖ ឯកឧត្តម អ៊ុំ រាត្រី អភិបាល នៃអភិបាលខេត្តបន្ទាយមានជ័យ ផ្ញើសារលិខិតរំលែកទុក្ខជូន លោក សែ វិត និងភរិយា ព្រមទាំងក្រុមគ្រួសារ ចំពោះមរណភាពរបស់លោក មាស សាវ៉ាង ក្នុងឧបទ្ទវហេតុគ្រោះធម្មជាតិរញ្ជួយដី រលំបាក់អគារ នៅប្រទេសថៃ។
តាមរយៈសារលិខិតរំលែកទុក្ខផ្ញើជូនលោក សែ វិត និងភរិយា ព្រមទាំងក្រុមគ្រួសារ, ឯកឧត្តម អ៊ុំ រាត្រី បានលើកឡើងយ៉ាងដូច្នេះថា៖ «ក្នុងនាមរដ្ឋបាលខេត្តបន្ទាយមានជ័យ និងក្នុងនាមខ្លួនខ្ញុំផ្ទាល់ ខ្ញុំសូមសម្តែងនូវសមានទុក្ខដ៏មហា ក្រៀមក្រំបំផុត និងតក់ស្លុតក្នុងចិត្តជាអនេកប្បការចំពោះដំណឹងដ៏ក្រៀមក្រំនូវការទទួលមរណភាពរបស់លោក មាស សាវ៉ាង ត្រូវជាកូនប្រុសបង្កើតរបស់លោក ដែលបានទទួលមរណភាព កាលពីថ្ងៃសុក្រ ១៥រោច ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៨ ខែមីនា ឆ្នាំ២០២៥ ក្នុងអាយុ២៣ឆ្នាំ ដោយឧបទ្ទវហេតុគ្រោះធម្មជាតិរញ្ជួយដី រលំបាក់អគារ នៅប្រទេសថៃ។
មរណភាពរបស់លោក មាស សាវ៉ាង គឺជាការបាត់បង់នូវកូនប្រុស ជាទីស្រឡាញ់បំផុតរបស់លោក ព្រមទាំងក្រុមគ្រួសារសាច់ញាតិ ដ៏គួរឱ្យសោកសង្រេង និងអាឡោះអាល័យ។ យើងខ្ញុំទាំងអស់គ្នា សូមសម្តែងនូវក្តីក្រៀមក្រំយ៉ាងក្រៃលែង និងពោរពេញដោយសេចក្តីសោកស្តាយ ស្រណោះអាឡោះអាល័យជាពន់ពេក និងសូមចូលរួមរំលែកទុក្ខជូនចំពោះក្រុមគ្រួសារសព និងញាតិសារ-លោហិតទាំងអស់។
ជាមួយនឹងសមានទុក្ខដ៏សែនក្រៀមក្រំនេះ យើងខ្ញុំទាំងអស់គ្នាសូមឧទ្ទិសបួងសួងដល់ ដួងវិញ្ញាណក្ខន្ធលោក មាស សាវ៉ាង ឆាប់សោយសុខក្នុងសុគតិភពកុំបីឃ្លៀងឃ្លាតឡើយ។
សូមលោក លោកស្រី ព្រមទាំងក្រុមគ្រួសារ ទទួលនូវការរំលែកទុក្ខដ៏ក្រៀមក្រំ និងសេចក្តីស្រឡាញ់ រាប់អានដ៏ជ្រាលជ្រៅ អំពីយើងខ្ញុំ» ៕
