ក្រុមការងារនៃទីភ្នាក់ងារសហរដ្ឋអាម៉េរិកសម្រាប់ការអភិវឌ្ឍអន្តរជាតិ កំពុងធ្វើដំណើរទៅកាន់ប្រទេសមីយ៉ាន់ម៉ា ដើម្បីជួយកំណត់តម្រូវការបន្ទាន់បំផុតរបស់ប្រទេសកម្សត់នេះ បន្ទាប់ពីគ្រោះរញ្ជួយដី
វ៉ាស៊ីនតោន៖ កាលពីថ្ងៃចន្ទ ទី៣១ ខែមីនា ក្រសួងការបរទេសសហរដ្ឋអាម៉េរិក បានប្រកាសថា ក្រុមការងារនៃទីភ្នាក់ងារសហរដ្ឋអាម៉េរិកសម្រាប់ការអភិវឌ្ឍអន្តរជាតិ (USAID) កំពុងធ្វើដំណើរទៅកាន់ប្រទេសមីយ៉ាន់ម៉ា ដើម្បីជួយកំណត់តម្រូវការបន្ទាន់បំផុតរបស់ប្រទេសកម្សត់នេះ បន្ទាប់ពីគ្រោះរញ្ជួយដីដ៏ខ្លាំងក្លាបានឆក់យកជីវិតមនុស្សយ៉ាងហោចណាស់២០០០ នាក់។
អតីតមន្ត្រី USAID ជាន់ខ្ពស់ម្នាក់ និងប្រភពដែលដឹងអំពីបញ្ហានេះ បាននិយាយថា ការចាកចេញរបស់ក្រុមវាយតម្លៃបីនាក់ត្រូវបានពន្យាររពេលដោយសារបញ្ហាក្នុងការទទួលបានទិដ្ឋាការពីមេដឹកនាំយោធាមីយ៉ាន់ម៉ា។ លើសពីនេះទៅទៀត ពួកគេបានឱ្យដឹងថា ការឆ្លើយតបរបស់រដ្ឋបាលលោក ត្រាំ ទាំងមូលត្រូវបានរំខានដោយការកាត់បន្ថយមូលនិធិដ៏ធំ និងផែនការបណ្តេញបុគ្គលិក USAID ស្ទើរតែទាំងអស់ដែលដឹកនាំដោយមហាសេដ្ឋី អេឡុន ម៉ាសក៍ ប្រធានទីភ្នាក់ងារប្រសិទ្ធភាពរដ្ឋាភិបាល។
លោកស្រី សារ៉ា ឆាល (Sarah Charles) ដែលជាអតីតប្រធានការិយាល័យជំនួយមនុស្សធម៌របស់ទីភ្នាក់ងារបាននិយាយថា៖«ការឆ្លើយតបបានរងការឈឺចាប់ដោយការភាន់ច្រឡំផ្ទៃក្នុងជាច្រើនអំពីសមត្ថភាពក្នុងការឆ្លើយតប និងឆន្ទៈក្នុងការឆ្លើយតប»។
លោកស្រី ឆាល និងប្រភពបានលើកឡើងថា ការពិភាក្សាផ្នែករដ្ឋបាលផ្ទៃក្នុងអំពីរបៀបដែលសហរដ្ឋអាម៉េរិកគួរតែចូលរួមក្នុងកិច្ចខិតខំប្រឹងប្រែងសង្គ្រោះនៅក្នុងប្រទេសមីយ៉ាន់ម៉ាបានរួមចំណែកដល់ការពន្យាររពេលការឆ្លើយតបរបស់សហរដ្ឋអាម៉េរិក។
ថ្លែងនៅក្នុងសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងការបរទេសអាម៉េរិក លោកស្រី ថាំមី ប្រ៊ូស បាននិយាយថា អ្នកជំនាញខាងគ្រោះមហន្តរាយរបស់សហរដ្ឋអាម៉េរិក រួមទាំងអ្នកដែលមានមូលដ្ឋាននៅរាជធានីបាងកក រដ្ឋធានីម៉ានីល និងវ៉ាស៊ីនតោន កំពុងតាមដានស្ថានភាព ហើយក្រុមវាយតម្លៃកំពុងត្រូវបានបញ្ជូនទៅ។
លោកស្រីបានច្រានចោលការរិះគន់ដែលថាការផ្ដល់មូលនិធិ និងការកាត់បន្ថយបុគ្គលិកកំពុងរារាំងការឆ្លើយតបរបស់ USAID ហើយបាននិយាយថារដ្ឋធានីវ៉ាស៊ីនតោនកំពុងធ្វើការជាមួយដៃគូនៅក្នុងប្រទេសមីយ៉ាន់ម៉ាដើម្បីចែកចាយជំនួយដល់ប្រជាជនដែលរងផលប៉ះពាល់។
បន្ថែមពីនោះ លោកស្រី ប្រ៊ូស បានឱ្យដឹងថា សហរដ្ឋអាម៉េរិកបានទទួលសំណើផ្លូវការមួយសម្រាប់ជំនួយពីអ្នកគ្រប់គ្រងប្រទេសមីយ៉ាន់ម៉ា។ សហរដ្ឋអាម៉េរិកបានសន្យាផ្តល់ជំនួយចំនួន២ លានដុល្លារតាមរយៈអង្គការជំនួយមនុស្សធម៌ដែលមានមូលដ្ឋាននៅមីយ៉ាន់ម៉ា។
ប្រព័ន្ធផ្សព្វផ្សាយរដ្ឋក្នុងប្រទេសមីយ៉ាន់ម៉ាបានចុះផ្សាយថា ចំនួនអ្នកស្លាប់បានកើនឡើងដល់២០៦៥ នាក់ ជាមួយនឹងអ្នករងរបួសជាង៣៩០០ នាក់ និងជាង២៧០ នាក់បាត់ខ្លួន ហើយថា រដ្ឋាភិបាលយោធាបានប្រកាសកាន់ទុក្ខរយៈពេលមួយសប្តាហ៍ចាប់ពីថ្ងៃចន្ទសប្តាហ៍ក្រោយ។ គួរបញ្ជាក់ថា ចិន រុស្ស៊ី និងឥណ្ឌា បានបញ្ជូនក្រុមទៅមីយ៉ាន់ម៉ាភ្លាមៗបន្ទាប់ពីគ្រោះរញ្ជួយដីបានវាយប្រហារ៕
