ក្រសួងមហាផ្ទៃ បើកកិច្ចប្រជុំបូកសរុបលទ្ធផលបេសកកម្មគាំទ្រការអនុវត្តគម្រោងលើកទី៩ របស់ធនាគារពិភពលោក ស្តីពីការអនុវត្តការងារគណនេយ្យភាពសង្គម
ភ្នំពេញ៖ នាព្រឹកថ្ងៃអង្គារ ទី០១ ខែមេសា ឆ្នាំ២០២៥ ឯកឧត្តម ចាន់ សុធា រដ្ឋលេខាធិការ ក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប បានបើកកិច្ចប្រជុំបូកសរុបលទ្ធផល បេសកកម្មគាំទ្រការអនុវត្តគម្រោងលើកទី៩ របស់ធនាគារពិភពលោក ស្តីពីការអនុវត្តការងារគណនេយ្យភាពសង្គម ជាមួយលោក Benjamin Burckhart ប្រធានក្រុមដឹកនាំការងារធនាគារពិភពលោក នៅសាលប្រជុំសៀមរាប ទីស្តីការក្រសួងមហាផ្ទៃ ដែលមានការអញ្ជើញចូលរួមពី ឯកឧត្តម អនុប្រធានលេខាធិការដ្ឋាន គ.ជ.អ.ប. និងជានាយកគម្រោងគណនេយ្យភាពសង្គម ប្រធានអង្គភាពត្រួតពិនិត្យ វាយតម្លៃ និងព័ត៌មាន និងជាប្រធានគ្រប់គ្រងគម្រោងគណនេយ្យភាពសង្គម តំណាងស្ថានទូតអូស្ត្រាលី នាយកប្រចាំប្រទេសអង្គការទស្សនៈពិភពលោកអន្តរជាតិនៅកម្ពុជា ក្រុមការងារនៃលេខាធិការដ្ឋាន គ.ជ.អ.ប. ក្រុមការងារនៃធនាគារពិភពលោក ក្រុមការងារនៃអង្គការទស្សនៈពិភពលោក តំណាងអង្គការ GIZ និងអ្នកពាក់ព័ន្ធសរុបប្រមាណ ៥៦រូប។
មានប្រសាសន៍បើកអង្គប្រជុំ ឯកឧត្តមរដ្ឋលេខាធិការ បានសម្តែងការស្វាគមន៍យ៉ាងកក់ក្តៅចំពោះវត្តមានដ៏ថ្លៃថ្លារបស់ឯកឧត្តម លោកជំទាវ អស់លោក លោកស្រី ដែលបានចំណាយពេលវេលាមមាញឹកអញ្ជើញចូលរួមក្នុងកិច្ចប្រជុំនាព្រឹកនេះ។
កិច្ចប្រជុំនេះផងដែរមានគោលបំណងសំខាន់ បូកសរុបលទ្ធផលបេសកកម្មគាំទ្រការអនុវត្តគម្រោងលើកទី៩ របស់ធនាគារពិភពលោក ស្តីពីការអនុវត្តការងារគណនេយ្យភាពសង្គម។
ក្រោយពីបញ្ចប់នៅការពិភាក្សារួមរួចមក ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ បានធ្វើការសរុបមតិជារួមថា លទ្ធផលនៃការរកឃើញរបស់ធនាគារពិភពលោកតាមរយៈក្រុមបេសកកម្មនេះពិតជាបានផ្តល់នូវលទ្ធផលជាវិជ្ជមាន ហើយផ្តល់នូវចំណុចដែលត្រូវរួមគ្នាកែលម្អទៅលើបញ្ហាប្រឈមនានា ដើម្បីពង្រឹង និងរួមគ្នាធ្វើកិច្ចការដែលនៅសេសសល់ សម្រាប់បន្តនៅអ្វីដែលជាសូចនាករ ឬ សកម្មភាព លទ្ធផលដែលបានគ្រោងទុក ក្នុងគម្រោងដើម្បីឈានទៅដល់នៅការបញ្ចប់គម្រោងនៅថ្ងៃទី៣១ ខែធ្នូ ឆ្នាំ២០២៥ ខាងមុខនេះដោយជោគជ័យ ៕
