រដ្ឋមន្រ្តីក្រសួងមហាផ្ទៃ ណែនាំអាជ្ញាធរបន្តថែរក្សាសន្តិសុខជូនប្រជាពលរដ្ឋ ក្នុងឱកាសបុណ្យចូលឆ្នាំថ្មី
ភ្នំពេញ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានណែនាំអាជ្ញាធរខេត្តកំពង់ចាម បន្តថែរក្សាសន្តិសុខសណ្ដាប់ធ្នាប់សាធារណៈជូនប្រជាពលរដ្ឋ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៥។
ការលើកឡើងរបស់ ឯកឧត្តមអភិសន្តិបណ្ឌិត ស សុខា នាឱកាសអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការនូវអគារ ១ខ្នង កំពស់ ២ជាន់ ស្មើ ១៤បន្ទប់ នៅស្នងការដ្ឋាននគរបាលខេត្តកំពង់ចាម នៅថ្ងៃទី០២ ខែមេសា ឆ្នាំ២០២៥។
ឯកឧត្តមអភិសន្តិបណ្ឌិត ស សុខា ថ្លែងកោតសរសើរដល់គណៈបញ្ជាការឯកភាពខេត្ត ក៏ដូចជាកងកម្លាំងនគរបាល នៃស្នងការនគរបាលខេត្តកំពង់ចាម ដែលបានលះបង់អស់កម្លាំងកាយចិត្ត ក្នុងការការពារសន្តិសុខសណ្ដាប់ធ្នាប់សាធារណៈជូនដល់ប្រជាពលរដ្ឋ ជាពិសេសការពារនូវសមិទ្ធិផលសម្រេចបាន គ្រប់ភារកិច្ចដែលថ្នាក់ដឹកនាំបានប្រគល់ជូន។
ឯកឧត្តមអភិសន្តិបណ្ឌិត ក៏បានណែនាំគោលការណ៍មួយចំនួន ដើម្បីឱ្យស្នងការដ្ឋាននគរបាលខេត្តកំពង់ចាម អនុវត្តការងារបន្ត រួមមាន៖
ទី១. បន្តថែរក្សាសន្តិសុខសណ្ដាប់ធ្នាប់សាធារណៈជូនប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៥។
ទី២.ត្រូវចូលរួមសហការពីតួរអង្គសំខាន់ៗទាំងអស់ដាក់ចេញវិធានការបង្ការ និងទប់ស្កាត់ បញ្ហាក្មេងទំនើង និងក្រុមឆក់ឱកាស ជាពិសេសអំឡុងពេលចូលថ្មីប្រពៃណីជាតិខ្មែរខាងមុខនេះ។
ទី៣.បន្តបង្ក្រាបល្បែងស៊ីសងខុសច្បាប់ នៅតាមមូលដ្ឋានឲ្យបានជាប់ជាប្រចាំ ។
ទី៤. បន្តសហការ ជាមួយកងកម្លាំងប្រដាប់ធ្វេីយ៉ាងណាលុបបំបាត់ឲ្យបាននូវបញ្ហាគ្រឿងញៀន ។
ទី៥. បំរើសេវាសាធារណៈជូនពលរដ្ឋឱ្យបានល្អ និងបន្តការអនុវត្តន៍គោលនយោបាយរបស់រាជរដ្ឋាភិបាល ឱ្យតាមភូមិ-ឃុំ-សង្កាត់មានសុវត្ថិភាព។
ក្នុងឱកាសនោះដែរ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានលើកឡើងថា កន្លងមកតាមរយៈការគាំទ្រ និងជំរុញការផ្សព្វផ្សាយការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» បានចំនួន ២១.០៦៧លើក មានប្រជាពលរដ្ឋចូលរួម ១.១៨៤.៧២០ នាក់។ ជាមួយគ្នានេះ វេទិកាសាធារណៈផ្សាភ្ជាប់រវាងនគរបាល ជាមួយប្រជាពលរដ្ឋដើម្បីទទួល យកសំណូមពរ និងដំណោះស្រាយ ទុក្ខកង្វល់របស់ប្រជាពលរដ្ឋ បានចំនួន ១៣.៣៩៤ លើក មានប្រជាពលរដ្ឋចូលរួម ៤៣០.៥៦១នាក់។ ជាមួយនឹងកិច្ចខិតខំប្រឹងប្រែងរបស់កងកម្លាំង សមត្ថកិច្ចបានចូលរួមទប់ស្កាត់ និងបង្ក្រាបបទល្មើសទទួលបានលទ្ធផលគួរឱ្យកត់សម្គាល់៕
