ឯកឧត្តមបណ្ឌិត គឹម សន្តិភាពបើកសិក្ខាសាលាផ្សព្វផ្សាយស្តីពីការដោះលែងដោយមានលក្ខខណ្ឌ និងការបន្ធូរបន្ថយទោស និងលើកលែងទោស នៅសាលាដំបូងខេត្តបាត់ដំបង
ភ្នំពេញ៖ នាព្រឹកថ្ងៃព្រហស្បតិ៍ ៦កើត ខែចេត្រ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣ ខែមេសា ឆ្នាំ២០២៥ នៅសាលាដំបូងខេត្តបាត់ដំបង ឯកឧត្តមបណ្ឌិត គឹម សន្តិភាព រដ្ឋលេខាធិការក្រសួងយុត្តិធម៌ និងជាប្រធានគណៈកម្មការជាតិដោះលែងដោយមានលក្ខខណ្ឌ បានអញ្ជើញជាអធិបតីបើកសិក្ខាសាលាផ្សព្វផ្សាយស្តីពីការដោះលែងដោយមានលក្ខខណ្ឌ និងការបន្ធូរបន្ថយទោស និងលើកលែងទោស ដល់មន្ត្រីអនុវត្តច្បាប់ និងអាជ្ញាធរពាក់ព័ន្ធក្នុងខេត្តបាត់ដំបង។
សិក្ខាសាលានេះ រៀបចំឡើងក្នុងគោលបំណងពង្រឹងការយល់ដឹងបន្ថែមទៀតអំពីយន្តការនៃការដោះលែងដោយមានលក្ខខណ្ឌ និងការអនុគ្រោះទោស សំដៅធានាបាននូវតុល្យភាពរវាងការផ្តល់លក្ខខណ្ឌអនុគ្រោះដល់ទណ្ឌិត និងកត្តាសន្តិសុខសុវត្ថិភាពក្នុងសង្គម ក៏ដូចជាបង្កើនប្រសិទ្ធភាព និងជំនឿទុកចិត្តលើយន្នការទាំងពីនេះផងដែរ តាមរយៈការអនុត្តតួនាទីភារកិច្ចឱ្យបានច្បាស់លាស់ត្រឹមត្រូវពីតួអង្កពាក់ព័ន្ធនានា។
សិក្ខាសាលានេះមានការចូលរួមពីចៅក្រម តំណាងអយ្យការ មន្រ្តីពន្ធនាគារ មន្ត្រីអគ្គស្នងការនគរបាលជាតិ មន្ត្រីក្រសួងសង្គមកិច្ច និងអតីតយុទ្ធជន មន្រ្តីពន្ធនាគារខេត្តបាត់ដំបង មន្ត្រីនគរបាលប៉ុស្ត៍ និងមន្រ្តីអង្គការដៃគូមួយចំនួនផងដែរ ៕
