ទេសរដ្ឋមន្រ្តី ប៉ែន វិបុល អនុញ្ញាតឱ្យអនុព័ន្ធនគរបាលអមស្ថានទូតថៃ ចូលជួបសម្តែងការគួរសម និងជូនពរក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ

ភ្នំពេញ៖ នាព្រឹកថ្ងៃព្រហស្បតិ៍ ៦កើត ខែចេត្រ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៣ ខែមេសា ឆ្នាំ២០២៥ ឯកឧត្តម ប៉ែន វិបុល ទេសរដ្ឋមន្រ្តី ទទួលបន្ទុកបេសកកម្មពិសេស បានអនុញ្ញាតឱ្យលោកវរសេនីយ៍ឯក បិយវឌ្ឍន៍ កៀតកង អនុព័ន្ធនគរបាលអមស្ថានទូតថៃ ចូលជួបសម្តែងការគួរសម និងជូនពរក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ។

លោកវរសេនីយ៍ឯក បិយវឌ្ឍន៍ កៀតកង ក្នុងនាមនគរបាលអមស្ថានទូតថៃ បានគោរពជូនពរ ឯកឧត្តមទេសរដ្ឋមន្រ្តី ប៉ែន វិបុល ព្រមទាំងសហការី និងក្រុមគ្រួសារ សូមជួបតែសេចក្តីសុខចម្រើន សុភមង្គល វិបុលសុខគ្រប់ប្រការ និងសម្រេចជោគជ័យគ្រប់ភារកិច្ចនៅក្នុងឆ្នាំថ្មី ឆ្នាំ២០២៥។

ឯកឧត្តមទេសរដ្ឋមន្រ្តី ប៉ែន វិបុល ក៏បានសម្តែងនូវការអរគុណចំពោះអនុព័ន្ធនគរបាលអមស្ថានទូតថៃ ដែលបានមកជូនពរឆ្នាំថ្មីនាឱកាសនេះ ហើយនេះបង្ហាញពីមនោសញ្ចេតនា ស្រឡាញ់រាប់អានគ្នា និងពង្រឹងនូវចំណងមិត្តភាព កិច្ចសហប្រតិបត្តិការរវាងកម្ពុជា-ថៃ ក្នុងភាពជាអ្នកជិតខាងល្អ ៕