អាជ្ញាធរជាតិប្រយុទ្ធប្រឆាំងគ្រឿងញៀន និងសមាគមសិល្បករខ្មែរ រួមគ្នាពង្រីកសកម្មភាពផ្សព្វផ្សាយអប់រំពីបញ្ហាគ្រឿងញៀន
ភ្នំពេញ៖ នៅរសៀលថ្ងៃទី៣ ខែមេសា ឆ្នាំ២០២៤នេះ ទទួលបានការអនុញ្ញាតពីឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ក្រុមការងាររស្ថាប័ននិងសមាគមទាំងពីរ បានជួបប្រជុំគ្នាដើម្បីពង្រីកសកម្មភាពផ្សព្វផ្សាយ អប់រំ ទូទៅនិងក្នុងឱកាសចូលឆ្នាំប្រពៃណីជាតិខ្មែរ។
ក្នុងនាម ឯកឧត្តម នាយឧត្តមសេនីយ៍ មាស វិរិទ្ធអគ្គលេខាធិការ ក្នុងឱកាសនោះ ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអាជ្ញាធរជាតិប្រយុទ្ធប្រឆាំងគ្រឿងញៀន បានពាំនាំ និងការថ្លែងអំណរគុណពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រឆាំងគ្រឿងញៀន ដល់សមាគមសិល្បករខ្មែរដែលជាដៃគូអនុស្សរណៈជាមួយគ្នាបានខិតខំចូលរួមក្នុងសកម្មភាពផ្សព្វផ្សាយលើកកម្ពស់ចំណេះដឹងពាក់ព័ន្ធនឹងបញ្ហាគ្រឿងញៀនតាមរយៈការផលិតជាវីដេអូអប់រំខ្លី ចំណាប់អារម្មណ៍តារា ក្នុងឱកាសបុណ្យប្រពៃណីក៏ដូចជាកម្មវិធីសម្តែងផ្សេងៗដែលមានសមាជិកសមាគមសិល្បករខ្មែរចូលរួមគឺតែងតែធ្វើការបញ្ជ្រាបខ្លឹមសារអប់រំដើម្បីជាការដាស់តឿនដល់ប្រជាពលរដ្ឋទូទៅពីគ្រោះថ្នាក់នៃគ្រឿងញៀន។
ក្នុងនាម លោកជំទាវ អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ក្នុងឱកាសនោះ លោកជំទាវ នៅ សូនីតា អនុប្រធានសមាគម បានថ្លែងអំណរគុណដល់អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនដែលតែងតែធ្វើការសហការជួយដល់សកម្មភាពផលិតក៏ដូចជាខ្លឹមសារដែលអាចឲ្យសិល្បករ សិល្បៈការិនីជាសមាជិករបស់សមាគមបានយកទៅប្រើប្រាស់ដើម្បីជាសារជម្រាបជូនសាធារណជនអ្នកទស្សនាក៏ដូចជាប្រជាពលរដ្ឋទូទៅឲ្យបានយល់ដឹងនិងចូលរួមក្នុងសកម្មភាពប្រយុទ្ធប្រឆាំងគ្រឿងញៀន ហើយសកម្មភាពនេះនឹងបន្តពិសេសក្នុងឱកាសចូលឆ្នាំខាងមុខ យើងនឹងផ្សាយវីដេអូតារាចូលរួមសកម្មភាពប្រយុទ្ធប្រឆាំងគ្រឿងញៀន។
ជាមួយគ្នានេះ លោក សុវណ្ណ មករា ក៏ដូចជាលោកឧត្តមសេនីយ៍ត្រី យិន យឿត បានលើកយកនូវគម្រោងឆ្អឹងនៃការគ្រោងថតរឿងអប់រំខ្លីស្ដីពីបញ្ហាគ្រឿងញៀនដើម្បីចាក់ផ្សាយតាមប្រព័ន្ធនានាសំដៅបង្កើននូវសកម្មភាពផ្សព្វផ្សាយអប់រំឲ្យបានកាន់តែផុលផុសទំនើប ទាន់សម័យ ឆាប់ទទួលយកបាននោះ គឺ៖ ១.សម្ពាធមិត្តភក្កិ: រឿងពិតនិងរបៀបនិយាយថាទេចំពោះគ្រឿងញៀន, ២.ឪពុកម្ដាយគ្រប់រូបមានតួនាទីអំណាចក្នុងការទប់ស្កាត់ការប្រើប្រាស់គ្រឿងញៀននិងការញៀនគ្រឿងញៀន និង៣.ការស្វែងរកអន្តរាគមន៍តាមរយ: App NoDrug :
https://nodrugsnacd.com/download_kh ៕
