អគ្គលេខាធិការNATO៖ សម្ព័ន្ធមិត្ត NATO បាននាំគ្នាសន្យាការគាំទ្រផ្នែកយោធា សម្រាប់អ៊ុយក្រែន ក្នុងរយៈពេល ៣ខែដំបូងឆ្នាំ២០២៥

ព្រុចសែល៖  បើតាមការចេញផ្សាយដោយ ទីភ្នាក់ងារព័ត៌មាន Reuters កាលពីថ្ងៃពុធ ទី២ ខែមេសា អគ្គលេខាធិការនៃអង្គការ NATO លោក Mark Rutte បាននិយាយថា សម្ព័ន្ធមិត្ត NATO បាននាំគ្នាសន្យាការគាំទ្រផ្នែកយោធា គិតជាទឹកប្រាក់ចំនួន២១.៦៥ពាន់លានដុល្លារ សម្រាប់អ៊ុយក្រែន ក្នុងរយៈពេល ៣ខែដំបូង នៃឆ្នាំ២០២៥។

លោក Rutte បានលើកឡើងដូចខាងលើ អំឡុងសន្និសីទសារព័ត៌មានមួយ មុនការបើកកិច្ចប្រជុំរដ្ឋមន្រ្តីការបរទេស នៃក្រុមប្រទេស NATO នាថ្ងៃព្រហស្បតិ៍ និងថ្ងៃសុក្រសប្តាហ៍នេះ នៅទីក្រុងព្រុចសែល ដើម្បីជជែកអំពីការបន្តគាំទ្រអ៊ុយក្រែន ប្រឆាំងនឹង សង្រ្គាមឈ្លានពានរបស់រុស្ស៉ី ដែលបានអូសបន្លាយជាង ៣ឆ្នាំមកហើយ។

គួរបញ្ជាក់ថា លោកប្រមុខអង្គការ NATO បានអះអាងថា សម្ព័ន្ធមិត្ត NATO នឹងបន្តផ្តល់ជំនួយយោធាដល់ទីក្រុងកៀវ ហើយ ជួយបណ្តុះបណ្តាលទាហានអ៊ុយក្រែន។ ទន្ទឹមគ្នានោះ លោក Rutte បានបន្ថែមថា NATO គាំទ្រកិច្ចប្រឹងប្រែងរបស់ សហរដ្ឋអាមេរិក ដើម្បីបិទបញ្ចប់សង្រ្គាមនៅអ៊ុយក្រែន ហើយបើតាមរូបលោក គឺវាគួរតែជាសន្តិភាពមួយ ដែលមានស្ថិរភាព និងជាបទឈប់បាញ់អចិន្រ្តៃយ៍៕