សិក្ខាសាលាប្រកាសដាក់ឱ្យអនុវត្តគម្រោងកែលម្អសន្តិសុខទឹកកម្ពុជា ក្រោមហិរញ្ញប្បទានពីធនាគារពិភពលោក
ភ្នំពេញ៖ នៅព្រឹកថ្ងៃទី៣ ខែមេសា ឆ្នាំ២០២៥ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ និងជានាយកអង្គភាពគ្រប់គ្រងគម្រោងក្រោមហិរញ្ញប្បទានពីធនាគារពិភពលោក (World Bank) ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម បានអញ្ជើញចូលរួមបើកសិក្ខាសាលាប្រកាសដាក់ឱ្យអនុវត្តគម្រោងកែលម្អសន្តិសុខទឹកកម្ពុជា ក្រោមហិរញ្ញប្បទានពីធនាគារពិភពលោក។
សូមជម្រាបជូនថា សិក្ខាសាលានាពេលនេះ មានការអញ្ជើញចូលរួមពីរដ្ឋលេខាធិការ អនុរដ្ឋលេខាធិការ នៃក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ លោកស្រី Tania Mayer នាយិកានៃធនាគារពិភពលោកប្រចាំប្រទេសកម្ពុជា តំណាងស្ថានទូតអូស្ត្រាលីប្រចាំប្រទេសកម្ពុជា ដៃគូអភិវឌ្ឍន៍នានា និងតំណាងក្រសួង-ស្ថាប័នពាក់ព័ន្ធ ព្រមទាំងក្រុមការងារអនុវត្តគម្រោងរបស់ក្រសួងទាំងពីរ។
ឯកឧត្តមរដ្ឋលេខាធិការប្រចាំការ បានជម្រាបជូនថា គម្រោងកែលម្អសន្តិសុខទឹកកម្ពុជា ជាគម្រោងថ្មីមួយស្របតាមចក្ខុវិស័យរបស់ក្រសួងធនធានទឹក និងឧតុនិយម ដែលបានដាក់ចេញសម្រាប់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ក្នុងផែនការយុទ្ធសាស្រ្ដអភិវឌ្ឍន៍លើវិស័យធនធានទឹក និងឧតុនិយម រយៈពេល៥ឆ្នាំ (២០២៤-២០២៨) សម្រាប់បម្រើដល់គ្រប់វិស័យដែលពាក់ព័ន្ធ ក្រោមហិរញ្ញប្បទានពីធនាគារពិភពលោក ដែលមានរយៈពេលអនុវត្ត ៦ឆ្នាំ ចាប់ពីឆ្នាំ ២០២៥ ដល់ឆ្នាំ២០៣០ ក្នុងខេត្តចំនួន៤ រួមមាន ខេត្តមណ្ឌលគិរី ខេត្តក្រចេះ ខេត្តកំពង់ធំ និងខេត្តព្រះវិហារ។
ឯកឧត្តមរដ្ឋលេខាធិការប្រចាំការ ក៏បានជម្រាបជូនបន្ថែមទៀតថា ដើម្បីធានាសន្តិសុខទឹកនៅក្នុងប្រទេសកម្ពុជាឱ្យមានប្រសិទ្ធភាព និងនិរន្តរភាព ការគ្រប់គ្រប់ធនធានទឹកនៅក្នុងក្របខ័ណ្ឌអាងស្ទឹង/ទន្លេ និងការអនុវត្តការគ្រប់គ្រងធនធានទឹកចម្រុះ (IWRM) គឺចាំបាច់ ហើយទាមទារឱ្យក្រសួង ស្ថាប័នពាក់ព័ន្ធ ចូលរួមសហការ ដើម្បីក្រសួងធនធានទឹក និងឧតុនិយមមានផែនការគ្រប់គ្រង អភិវឌ្ឍ និងបែងចែកទឹកប្រកបដោយសមធម៌។
ថ្លែងក្នុងឱកាសបើកអង្គសិក្ខាសាលានាពេលនេះ ឯកឧត្តមរដ្ឋលេខាធិការប្រចាំការ ក៏បានថ្លែងអំណរគុណដល់ក្រសួងសេដ្ឋកិច្ច និងហិរញ្ញវត្ថុ ដែលបានគាំទ្រចំពោះគម្រោងនេះ និងធនាគារពិភពលោក ដែលបានចូលរួមគាំទ្រទាំងផ្នែកបច្ចេកទេស និងហិរញ្ញវត្ថុ សម្រាប់គម្រោងកែលម្អសន្តិសុខទឹកកម្ពុជា សំដៅឆ្ពោះទៅរកការអភិវឌ្ឍវិស័យធនធានទឹក និងឧតុនិយមនៅកម្ពុជា ប្រកបដោយចីរភាព និងបរិយាប័ន្ន ហើយគម្រោងនេះ នឹងចូលរួមលើកកម្ពស់ការអភិវឌ្ឍវិស័យធនធានទឹក ប្រកបដោយយុទ្ធសាស្រ្ត និងចក្ខុវិស័យវែងឆ្ងាយ ធ្វើយ៉ាងណាធានាប្រែក្លាយកម្ពុជា ជាប្រទេស ដែលមានសន្តិសុខទឹកនាពេលអនាគត ក្នុងបរិបទនៃការអភិវឌ្ឍ កំណើនសម្ពាធនានាពីសកម្មភាពមនុស្ស និងការប្រែប្រួលអាកាសធាតុ៕
