នាយករដ្ឋមន្ត្រីដាណឺម៉ាក អំពាវនាវឱ្យមានការបង្កើនកិច្ចសហប្រតិបត្តិការការពារជាតិក្នុងតំបន់អាក់ទិក ជាមួយ សហរដ្ឋអាមេរិក អំឡុងធ្វើដំណើរទស្សនកិច្ចទៅកាន់ដែនដី Greenland

Reuters៖ បើតាមការចេញផ្សាយដោយទីភ្នាក់ងារសារព័ត៌មាន Reuters លោកស្រី Mette Frederiksen នាយករដ្ឋមន្ត្រីដាណឺម៉ាក កាលពីថ្ងៃព្រហស្បតិ៍ ទី៣ ខែមេសា បានអំពាវនាវឱ្យមានការបង្កើនកិច្ចសហប្រតិបត្តិការការពារជាតិក្នុងតំបន់អាក់ទិក ជាមួយ សហរដ្ឋអាមេរិក អំឡុងធ្វើដំណើរទស្សនកិច្ចទៅកាន់ដែនដី Greenland ប៉ុន្តែបានច្រានចោលក្ដីប្រាថ្នារបស់សហរដ្ឋអាមេរិកដែលចង់ច្បាមយកទឹកដីពាក់កណ្ដាលស្វយ័តមួយនេះរបស់ដាណឺម៉ាក។

ដំណើរទស្សនកិច្ចរបស់លោកស្រី Mette Frederiksen កើតមានឡើងចំពេលមានភាពតានតឹងជាច្រើនខែមកនេះរវាងសហរដ្ឋអាមេរិក និងដាណឺម៉ាក ជុំវិញការលើកឡើងរបស់លោកប្រធានាធិបតី ដូណាល់ ត្រាំ ម្ដងហើយម្ដងទៀតថាដែនដី Greenland គួរតែក្លាយជាផ្នែកមួយនៃទឹកដីរបស់សហរដ្ឋអាមេរិក។

នៅឯសន្និសីទសារព័ត៌មានជាមួយនាយករដ្ឋមន្ត្រីចាំផ្ទះ និងអនាគតនាយករដ្ឋមន្ត្រីនៃដែនដី Greenland លោកស្រី Frederiksen បានគូសបញ្ជាក់ថា «ខ្ញុំចង់យកឱកាសនេះដើម្បីផ្ញើសារមួយដោយផ្ទាល់ទៅកាន់សហរដ្ឋអាមេរិក…ថាវាមិនមែនត្រឹមតែពាក់ព័ន្ធនឹងដាណឺម៉ាក ឬ Greenland ទេ តែវាគឺពាក់ព័ន្ធនឹងសណ្ដាប់ធ្នាប់ពិភពលោកដែលពួកយើងបានកសាងរួមគ្នានៅទូទាំងតំបន់អាក់ទិកពីមួយជំនាន់ទៅមួយជំនាន់។ អ្នកមិនអាចច្បាមយកប្រទេសដទៃបានទេ»។

គួរបញ្ជាក់ថា ការកត់សម្គាល់របស់លោកស្រី Mette Frederiksen ធ្វើឡើងតែប៉ុន្មានម៉ោងប៉ុណ្ណោះ ក្រោយរដ្ឋមន្ត្រីការបរទេសអាមេរិក លោក Marco Rubio និងរដ្ឋមន្ត្រីការបរទេសដាណឺម៉ាក លោក Lars Lokke Rasmussen បានជួបគ្នានៅឯកិច្ចប្រជុំកំពូល NATO ក្នុងទីក្រុងព្រុចសែល៕