ប្រទេស រុស្ស៊ី បេឡារុស គុយបា និងកូរ៉េខាងជើង បានគេចផុតពីគំនាបពន្ធរបស់អាមេរិក
មូស្គូ៖ ប្រធានាធិបតីអាម៉េរិក ដូណាល់ ត្រាំ ប្រកាសដំឡើងពន្ធទាំងលើសម្ព័ន្ធមិត្ត និងសត្រូវរួមមាន៖ អឺរ៉ុប ឥណ្ឌា ជប៉ុន និងចិន ប្រទេសមួយចំនួនក្នុងចំណោមប្រទេសរងទណ្ឌកម្មខ្លាំងបំផុតក្នុងពិភពលោក ដូចជា រុស្ស៊ី បេឡារុស គុយបា និងកូរ៉េខាងជើង បានគេចផុតពីគំនាបពន្ធនេះ។
ជាមួយនឹងពិភពលោកកំពុងអង្រួនដោយសង្គ្រាមពាណិជ្ជកម្ម លោក ត្រាំ បានដាក់ពន្ធទៅវិញទៅមកចាប់ផ្តើមពី១០ភាគរយឡើង លើការនាំចូលផលិតផលទាំងអស់ទៅកាន់សហរដ្ឋអាម៉េរិក។ មហាយក្សចិន ជាអ្នកផ្គត់ផ្គង់ទំនិញដ៏ធំបំផុតទៅកាន់សហរដ្ឋអាម៉េរិក ឥឡូវនេះប្រឈមនឹងពន្ធ៥៤ភាគរយលើការនាំចេញទាំងអស់ទៅកាន់ប្រទេសមានអ្នកប្រើប្រាស់ធំបំផុតរបស់ពិភពលោក[សហរដ្ឋអាម៉េរិក]។ យ៉ាងណាមិញ រុស្ស៊ី គុយបា និងកូរ៉េខាងជើង មិនមានវត្តមានក្នុងបញ្ជីប្រទេសដែលត្រូវបង់ពន្ធខ្ពស់ជាងមុន ដែលចេញផ្សាយដោយសេតវិមាននោះឡើយ។
នៅពេលសួរថា ហេតុអ្វីបានជារុស្ស៊ីមិនស្ថិតក្នុងបញ្ជីនោះ? រដ្ឋមន្ត្រីក្រសួងរតនាគារអាមេរិក លោក ស្កត បេសសិន បានប្រាប់ទូរទស្សន៍ Fox News ថា សហរដ្ឋអាម៉េរិកមិនធ្វើពាណិជ្ជកម្មជាមួយរុស្ស៊ី និងបេឡារុសទេ ហើយថាពួកគេស្ថិតនៅក្រោមការដាក់ទណ្ឌកម្ម។
គួរជម្រាបជូនថា ពាណិជ្ជកម្មទំនិញរវាងរុស្ស៊ី និងអាម៉េរិក មានចំនួន៣,៥ពាន់លានដុល្លារកាលពីឆ្នាំមុន។ នេះបើតាមតួលេខរបស់អាម៉រិក។ នៅឆ្នាំ២០២១ ជាឆ្នាំមុនការលុកលុយរបស់រុស្ស៊ីលើអ៊ុយក្រែន ពាណិជ្ជកម្មទំនិញមាន៣៦ពាន់លានដុល្លារ។ យោងតាមការិយាល័យតំណាងពាណិជ្ជកម្មអាម៉េរិក ការនាំចូលទំនិញរបស់សហរដ្ឋអាម៉េរិកពីប្រទេសរុស្ស៊ីមានចំនួនសរុប៣ពាន់លានដុល្លារក្នុងឆ្នាំ២០២៤ ធ្លាក់ចុះ៣៤,២ភាគរយពីឆ្នាំ២០២៣។
លេខាធិការសារព័ត៌មានសេតវិមាន លោកស្រី ការ៉ូលីន លេវីត បានប្រាប់កាសែត Axios ថា៖«អវត្តមានរបស់រុស្ស៊ីនៅក្នុងបញ្ជី គឺដោយសារតែអាម៉េរិកមិនមានពាណិជ្ជកម្មជាមួយប្រទេសនេះ ហើយគុយបា បេឡារុស និងកូរ៉េខាងជើង មិនត្រូវបានរាប់បញ្ចូលទេ ដោយសារតែពន្ធគយ និងទណ្ឌកម្មដែលមានស្រាប់លើពួកគេ គឺខ្ពស់រួចទៅហើយ»។ ប្រទេសកុម្មុយនីស្តរុស្ស៊ី ដែលស្ថិតនៅក្រោមការដាក់ទណ្ឌកម្មរបស់លោកខាងលិចច្រើនជាង២៨៥៩៥ ចាប់តាំងពីការចាប់ផ្តើមនៃសង្រ្គាម។
គួររំឭកថា ប្រទេស និងដែនដីចំនួន១៨០នៅក្នុងពិភពលោកជាប់នៅក្នុងបញ្ជីយកពន្ធគយបដិកា(ទៅវិញទៅមក) របស់បុរសសេដ្ឋកិច្ច ត្រាំ។ ការយកពន្ធទៅវិញទៅមកចាប់ផ្តើមពី១០ភាគរយឡើង លើការនាំចូលផលិតផលទាំងអស់ទៅកាន់សហរដ្ឋអាម៉េរិក៕
