សង្គមស៊ីវិលកម្ពុជា-ចិនត្រៀមលក្ខណៈចូលរួមព្រឹត្តិការណ៍សង្ក្រាន្តភូមិតានន ឆ្នាំ២០២៥

ភ្នំពេញ៖ លោកបណ្ឌិតជាមុនី ឫទ្ធិប្រធានសមាគមន៍អ្នកស្រាវជ្រាវ វឌ្ឍនភាពកម្ពុជាចិនបានឱ្យដឹងថា នៅថ្ងៃទី១០ខែមេសា ឆ្នាំ២០២៥ សង្គមស៊ីវិលកម្ពុជា និងចិននឹងសហការរៀបចំព្រឹត្តិការណ៍សង្ក្រាន្តភូមិតានន ឆ្នាំ២០២៥ ដែលមានទីតាំងនៅភូមិតានន ឃុំដូង ស្រុកបាទីខេត្តតាកែវ។
លោកបណ្ឌិតបញ្ជាក់ថា ការព្រឹត្តិការណ៍សង្ក្រាន្តភូមិតានន ឆ្នាំ២០២៥ នេះ មានគោលបំណងសំខាន់ៗចំនួន៤រួមមាន៖
1-ការពន្លាតអរិយធម៌រាប់ពាន់ឆ្នាំរបស់ជនជាតិខ្មែរទៅកាន់ពិភពលោកតាមរយៈមិត្តភក្តិចិនដែលអញ្ជើញមកពីការិយាល័យមូលនិធិចិនដើម្បីសន្តិភាពនិងការអភិវឌ្ឍ បណ្តាសារព័ត៌មានចិន និងបណ្តាសហគ្រាសចិនដែលមកលេងកម្សាន្តសង្ក្រាន្តភូមិតានន។
2-ការបង្កើនកិច្ចសហប្រតិបត្តិការកាន់តែស៊ីជម្រៅនៃទំនាក់ទំនងរវាងប្រជាជននិងប្រជាជន កម្ពុជានិងចិន ស្របតាមគំនិតផ្តួចផ្តើមអរិយធម៌សកល ក្រោមទម្រដ៏រឹងមាំនៃកិច្ចកសាងសហគមន៍ជោគវាសនារួម កម្ពុជានិងចិន នាយុគសម័យថ្មី។
3-ការរួមចំណែកពង្រឹងនិងពង្រីកទំនាក់ទំនងដែកថែប កម្ពុជានិងចិន ដែលនឹងបន្តផ្ទេរមរតកដ៏ប្រពៃនេះទៅកាន់ក្មេងជំនាន់ក្រោយដោយផ្តើមចេញពីភូមិតាននដែលជាភូមិគំរូមិត្តភាពកម្ពុជា-ចិន កាត់បន្ថយភាពក្រីក្រ។
4-ការប្រើប្រាស់វេទិកានេះដើម្បីឱ្យក្រុមហ៊ុនចិនដែលជាអតិថិជនបានជួបផ្ទាល់ជាមួយម្ចាស់កសិផលដែលជាអ្នកភូមិតាននស្របតាមកិច្ចខិតខំគាំទ្ររវាងថ្នាក់ដឹកនាំកំពូលនៃប្រទេសយើងទាំងពីរ កម្ពុជា-ចិន ក្នុងការបើកច្រករបៀងអង្ករនិងត្រី ដែលជាគោលការណ៍គ្រឹះនៃការបង្ហាញវឌ្ឍនភាពរីកចម្រើនរបស់ភូមិតាននក្រោមជំនួយរបស់មូលនិធិចិនដើម្បីសន្តិភាពនិងការអភិវឌ្ឍតាមរយៈវេទិកាសម្ព័ន្ធសង្គមស៊ីវិលនៃទីស្តីការគណៈរដ្ឋមន្ត្រី៕