កម្ពុជាទទួលបានចំណាត់ថ្នាក់ការអភិវឌ្ឍន៍វិស័យទេសចរណ៍និងការធ្វើដំណើរកាន់តែល្អឡើងជាបន្តបន្ទាប់តាមតារាងសន្ទស្សន៍ Travel & Tourism Development Index 2024 របស់វេទិកាសេដ្ឋកិច្ចពិភពលោក

ភ្នំពេញ៖ នារសៀលថ្ងៃទី៤ ខែមេសា ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោកស្រី Miranda Andruccioli អ្នកជំនាញការពីវេទិកាសេដ្ឋកិច្ចពិភពលោក អញ្ជើញចូលជួបសម្តែងការគួរសម និងពិភាក្សាការងារអំពីលទ្ធភាពបង្កើតកិច្ចសហប្រតិបត្តិទេសចរណ៍រវាងវេទិកាសេដ្ឋកិច្ចពិភពលោកដែលជាអង្គការអន្តរជាតិដ៏ធំមានទីស្នាក់ការនៅប្រទេសស្វីស និងជាអ្នករៀបចំវេទិកាសេដ្ឋកិច្ចពិភពលោកប្រចាំឆ្នាំដ៏ល្បីដែលហៅថា Davos Summit និងក្រសួងទេសចរណ៍ ព្រមទាំងបានពាំនាំនូវការគោរពអញ្ជើញរបស់លោក Børge Brende ប្រធានវេទិកាសេដ្ឋកិច្ចពិភពលោកជូនឯកឧត្តមរដ្ឋមន្រ្តីចូលរួមកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (16th Annual Meeting of the New Champions) នាខែមិថុនា នៅទីក្រុងធានជីន នៃសាធារណរដ្ឋប្រជាមានិតចិន។

កិច្ចប្រជុំកំពូលសេដ្ឋកិច្ចពិភពលោកនេះ នឹងមានការចូលរួមពីសំណាក់ថ្នាក់ដឹកនាំជាន់ខ្ពស់ក្នុងវិស័យធុរកិច្ច ពីផ្នែករដ្ឋាភិបាល សង្គមស៊ីវិល អង្គការអន្តរជាតិ សហគ្រិន បញ្ញវន្ត និងអ្នកច្នៃប្រឌិតថ្មីជាង១៥០០នាក់ពីជុំវិញពិភពលោក។

សូមបញ្ជាក់ថាវេទិកាសេដ្ឋកិច្ចពិភពលោកបានផ្តល់ ពិន្ទុល្អដល់កម្ពុជាលើការដាក់ចេញនូវគោលនយោបាយនិងផែនការសកម្មភាពត្រូវទិសដៅដែលជួយអភិវឌ្ឍវិស័យទេសចរណ៍របស់ខ្លួន ដោយទទួលបានពិន្ទុ៣,៥៧លើ៧ និងពិន្ទុ៦,១៤លើកត្តាសុវត្ថិភាពនិងសន្តិសុខ តាមតារាងសន្ទស្សន៍ Travel & Tourism Development Index ឆ្នាំ២០២៤ របស់វេទិកាសេដ្ឋកិច្ចពិភពលោក៕