ប្រមុខក្រុមប្រឹក្សាសន្តិសុខជាតិរបស់កោះតៃវ៉ាន់ ធ្វើដំណើរទៅដល់សហរដ្ឋអាមេរិកហើយ ដើម្បីជួបពិភាក្សាជាមួយក្រុមមន្ត្រីនៃរដ្ឋបាលលោក ដូណាល់ ត្រាំ បន្ទាប់ពីចិនបិទបញ្ចប់ការធ្វើសមយុទ្ធយោធានៅជុំវិញកោះតៃវ៉ាន់

វ៉ាស៊ីនតោន៖ បើតាមការចេញផ្សាយដោយទីភ្នាក់ងារសារព័ត៌មាន Reuters បានឱ្យដឹងថា ប្រមុខក្រុមប្រឹក្សាសន្តិសុខជាតិរបស់កោះតៃវ៉ាន់ បានធ្វើដំណើរទៅដល់សហរដ្ឋអាមេរិកហើយ ដើម្បីជួបពិភាក្សាជាមួយក្រុមមន្ត្រីនៃរដ្ឋបាលលោកប្រធានាធិបតីអាមេរិក ដូណាល់ ត្រាំ តែប៉ុន្មានថ្ងៃប៉ុណ្ណោះបន្ទាប់ពីចិនបិទបញ្ចប់ការធ្វើសមយុទ្ធយោធានៅជុំវិញកោះតៃវ៉ាន់។

ប្រភពដែលបានដឹងពីដំណើរទស្សនកិច្ចខាងលើ បានឱ្យដឹងថាលោក Joseph Wu ជាប្រមុខក្រុមប្រឹក្សាសន្តិសុខជាតិរបស់កោះតៃវ៉ាន់ បានដឹកនាំគណៈប្រតិភូទៅកាន់សហរដ្ឋអាមេរិក ដើម្បីចួលរួមក្នុង កិច្ចប្រជុំមួយមានឈ្មោះថា «special channel» ឬបណ្ដាញទំនាក់ទំនងពិសេស ហើយនេះក៏ជាលើកទី១នៃការប្រើប្រាស់បណ្ដាញទំនាក់ទំនងពិសេសរបស់លោក ត្រាំ ចាប់តាំងពីរូបលោកត្រឡប់មកកាន់ អំណាចសាជាថ្មីកាលពីថ្ងៃទី២០ ខែមករាផងដែរ។

សារព័ត៌មាន Financial Times គឺជាអ្នករាយការណ៍មុនគេពីដំណើរទស្សនកិច្ចរបស់លោក Joseph Wu ដែលធ្វើឡើងចំពេលលោក ដូណាល់ ត្រាំ បានប្រកាសយកពន្ធទៅមកលើបណ្ដាប្រទេស និងដែនដីនៅជុំវិញពិភពលោក ក្នុងនោះរួមមានទាំងតៃវ៉ាន់។ តៃវ៉ាន់បានចាត់ទុកថាការយកពន្ធនេះមិនមានហេតុផល ប៉ុន្តែថានឹងពិភាក្សាជាមួយទីក្រុង វ៉ាស៊ីនតោន។

គួរបញ្ជាក់ថា កាលពីដើមសប្ដាហ៍នេះ យោធាចិនបានបិទបញ្ចប់ការធ្វើសមយុទ្ធយោធារយៈពេល២ថ្ងៃ នៅជុំវិញកោះតៃវ៉ាន់។ សមយុទ្ធយោធានេះផ្ដោតសំខាន់លើការហាត់សមពីរបៀបបិទខ្ទប់តៃវ៉ាន់ ការធ្វើសមយុទ្ធបាញ់គ្រាប់ពិត និងរយៈចម្ងាយឆ្ងាយនៅសមុទ្រចិនខាងកើត៕