នាយករដ្ឋមន្រ្តីហ្គ្រោអង់ឡង់ដែលនឹងចូលកាន់តំណែងឆាប់ៗនេះ អះអាងថា កិច្ចពិភាក្សាអំពីការបញ្ចូលកោះពាក់កណ្តាលស្វយ័តដាណឺម៉ាកជាកម្មសិទ្ធិអាម៉េរិកគឺមិនអាចទទួលយកបានទេ

ប្រ៊ុចសែល៖ នាយករដ្ឋមន្រ្តីហ្គ្រោអង់ឡង់ដែលនឹងចូលកាន់តំណែងឆាប់ៗនេះបានអះអាងថា កិច្ចពិភាក្សាអំពីការបញ្ចូលកោះពាក់កណ្តាលស្វយ័តដាណឺម៉ាកនេះជាកម្មសិទ្ធិអាម៉េរិកគឺមិនអាចទទួលយកបានទេ។ ការណ៍នេះកើតឡើងបន្ទាប់ពីរដ្ឋមន្ត្រីការបរទេសសហរដ្ឋអាម៉េរិកលើកឡើងថា ដាណឺម៉ាកគួរតែផ្តោតលើការពិតដែលថា ហ្គ្រោអង់ឡង់មិនចង់ជាប់សាច់ជាប់ឈាមជាមួយប្រទេសប្រទេសដាណឺម៉ាកទេ។

ការអត្ថាធិប្បាយនេះធ្វើឡើងបន្ទាប់ពីភាពតានតឹងជាច្រើនខែរវាងរដ្ឋធានីវ៉ាស៊ីនតោននិងទីក្រុងនូក(Nuuk) ជុំវិញការលើកឡើងម្ដងហើយម្ដងទៀតរបស់ប្រធានាធិបតីអាម៉េរិក ដូណាល់ ត្រាំ ជុំវិញការបញ្ចូលកោះអាកទិកនេះជាផ្នែកមួយនៃសហរដ្ឋអាម៉េរិក។ អនាគតនាយករដ្ឋមន្រ្តីហ្គ្រោអង់ឡង់លោក ជេនស៍ ហ្វ្រេដឺរីក នែលសិន (Jens-Frederik Nielsen) បានប្រាប់ទូរទស្សន៍ TV2 ថា៖«យើងគឺជាមនុស្សនៅទីនេះ យើងមិនមែនជាទ្រព្យសម្បត្តិដែលអាចទិញដូរបានទេ»។

រដ្ឋមន្ត្រីការបរទេសអាម៉េរិក លោក ម៉ាកូ រ៉ូប៊ីអូ បានលើកឡើងកាលពីថ្ងៃសុក្រទី៤ ខែមេសាថា កោះទឹកកកនេះគួរតែផ្តោតលើការពិតដែលថា អ្នករស់នៅលើដែនកោះទឹកកកហ្គ្រោអង់ឡង់ មិនចង់ក្លាយជាផ្នែកមួយនៃប្រទេសដាណឺម៉ាកទេ ហើយហ្គ្រោអង់ឡង់បច្ចុប្បន្នជាដែនដីពាក់កណ្តាលស្វយ័តដាណឺម៉ាក។

លោក រ៉ូប៊ីកូ បានប្រាប់អ្នកយកព័ត៌មាននៅក្នុងសន្និសីទសារព័ត៌មានមួយបន្ទាប់ពីជួបជាមួយរដ្ឋមន្ត្រីការបរទេសផ្សេងទៀតរបស់អង្គការណាតូនៅរដ្ឋធានីប្រ៊ុចសែលថា ៖«ប្រជាជនហ្គ្រោអង់ឡង់នឹងសម្រេចចិត្តលើបញ្ហានេះ»។

យ៉ាងណា លោក នែលសិន បានទាត់ចោលការលើកឡើងរបស់លោក រ៉ូប៊ីអូ។ លោកបានសង្កត់ធ្ងន់ថា ៖«លោក[រ៉ូប៊ីអូ]លើកឡើងមិនត្រឹមត្រូវទេ ដែលថាហ្គ្រោអង់ឡង់ចង់បំបែកខ្លួន។ លោក[រ៉ូប៊ីអូ]និយាយត្រូវដែលថា ហ្គ្រោអង់ឡង់មិនចង់ក្លាយជាជនជាតិដាណឺម៉ាក ប៉ុន្តែហ្គ្រោអង់ឡង់ក៏ប្រាកដជាមិនចង់ក្លាយជាជនជាតិអាម៉េរិកដែរ»។

ជាចុងក្រោយ លោកបន្ថែមថា ៖«យើងព្យាយាមជារៀងរាល់ថ្ងៃ ដើម្បីសាងសង់គ្រឹះ ដើម្បីយើងអាចឈរដោយខ្លួនឯងបាននាពេលអនាគត ប៉ុន្តែយើងមិនទាន់អាចធ្វើបាននៅឡើយទេ»៕