វៀតណាម សង្កត់ធ្ងន់លើឆន្ទៈដើម្បីកាត់បន្ថយពន្ធនាំចូលលើទំនិញរបស់អាម៉េរិកមកត្រឹមសូន្យភាគរយ
ហាណូយ៖ លោក តូ ឡាំ អគ្គលេខាធិកាបក្សកុម្មុយនីស្ដវៀតណាម បានសង្កត់ធ្ងន់លើឆន្ទៈរបស់វៀតណាមក្នុងការចូលរួមជាមួយអាម៉េរិក ដើម្បីកាត់បន្ថយពន្ធនាំចូលលើទំនិញរបស់អាម៉េរិកមកត្រឹមសូន្យភាគរយ។ ការណ៍នេះកើតឡើងបន្ទាប់ពីវៀតណាម ត្រូវ ជាប់ ពន្ធ៤៦ភាគរយ ក្នុង ចំណោម ប្រទេស ដែល ប្រឈម នឹង ពន្ធ ខ្ពស់ បំផុត រួម ជាមួយ ប្រទេស ចិន កម្ពុជា ឥណ្ឌូណេស៊ី និង មីយ៉ាន់ម៉ា។
លោក ឡាំ បាននិយាយក្នុងអំឡុងកិច្ចសន្ទនាតាមទូរសព្ទជាមួយប្រធានាធិបតីអាម៉េរិក លោក ដូណាល់ ត្រាំ កាលពីថ្ងៃសុក្រទី៤ ខែមេសាថា វៀតណាមបានត្រៀមខ្លួនរួចជាស្រេចក្នុងការចរចាជាមួយសហរដ្ឋអាម៉េរិក ដើម្បីកាត់បន្ថយពន្ធនាំចូលលើទំនិញរបស់សហរដ្ឋអាម៉េរិកមកត្រឹមសូន្យភាគរយ។
ក្នុងអំឡុងពេលសន្ទនា មេដឹកនាំទាំងពីរបានអះអាងជាថ្មីនូវការប្តេជ្ញាចិត្តរបស់ពួកគេក្នុងការពង្រឹងកិច្ចសហប្រតិបត្តិការទ្វេភាគី ដើម្បីជាប្រយោជន៍នៃប្រទេសទាំងពីរ និងការរួមចំណែកដល់សន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។ ពួកគេបានចែករំលែកការវាយតម្លៃថា ទំនាក់ទំនងវៀតណាម-អាម៉េរិកបាននិងកំពុងរីកចម្រើនលើគ្រប់វិស័យ។
ស្តីពីទំនាក់ទំនងពាណិជ្ជកម្ម មេដឹកនាំទាំងពីរបានពិភាក្សាអំពីវិធានការនានា ដើម្បីសម្រួលបន្ថែមទៀតដល់ពាណិជ្ជកម្មទ្វេភាគី។ លោក ឡាំ បានសង្កត់ធ្ងន់លើឆន្ទៈរបស់វៀតណាមក្នុងការចរចាជាមួយអាម៉េរិកដើម្បីកាត់បន្ថយពន្ធលើការនាំចេញរបស់អាម៉េរិកទៅកាន់វៀតណាមមកត្រឹមសូន្យភាគរយ ហើយបានស្នើឱ្យអាម៉េរិកធ្វើដូចគ្នាសម្រាប់ការនាំចេញរបស់វៀតណាមទៅកាន់អាម៉េរិក។
លោកក៏បានថ្លែងថា វៀតណាមស្វែងរកការបង្កើនការនាំចូលពីអាម៉េរិក ហើយនឹងលើកទឹកចិត្ត និងបង្កើតលក្ខខណ្ឌអំណោយផលសម្រាប់អាជីវកម្មអាម៉េរិកក្នុងការវិនិយោគបន្ថែមទៀតនៅវៀតណាម។
មេដឹកនាំទាំងពីរក៏បានឯកភាពរក្សាការពិភាក្សាដើម្បីចុះហត្ថលេខាលើកិច្ចព្រមព្រៀងរវាងប្រទេសទាំងពីរនាពេលឆាប់ៗខាងមុខ ដើម្បីអនុវត្តជាផ្លូវការនូវការប្តេជ្ញាចិត្តដែលបានលើកឡើងខាងលើ។ ឆ្លៀតក្នុងឱកាសនេះ មេដឹកនាំកុម្មុយនីស្ដវៀតណាមបានអញ្ជើញលោកប្រធានាធិបតី ត្រាំ និងស្ត្រីទី១ អាម៉េរិក មកបំពេញទស្សនកិច្ចនៅវៀតណាម។
លោក ត្រាំ បានទទួលយកការអញ្ជើញនេះ ហើយបានបង្ហាញពីបំណងចង់ជួបជាមួយលោក ឡាំ ក្នុងពេលឆាប់ៗនេះ។
គួរបញ្ជាក់ថា ការហៅទូរសព្ទនេះធ្វើឡើងតែពីរថ្ងៃបន្ទាប់ពីប្រធានាធិបតីអាម៉េរិកបានប្រកាសដាក់ពន្ធទៅវិញទៅមកប្រឆាំងនឹងដៃគូពាណិជ្ជកម្មជាច្រើនរបស់សហរដ្ឋអាម៉េរិក ដែលក្នុងនោះ វៀតណាមត្រូវបានវាយប្រហារដោយពន្ធ៤៦ ភាគរយ៕
