ចិនប្រកាសនឹងដាក់ពន្ធ៣៤ ភាគរយលើការនាំចូលទាំងអស់ពីសហរដ្ឋអាម៉េរិក

ប៉េកាំង៖ កាលពីថ្ងៃសុក្រទី៤ ខែមេសា ចិនបានប្រកាសថាខ្លួននឹងដាក់ពន្ធ៣៤ ភាគរយលើការនាំចូលទាំងអស់ពីសហរដ្ឋអាម៉េរិកចាប់ពីថ្ងៃទី១០ ខែមេសា ដើម្បីវាយប្រហារត្រឡប់ទៅវិញបន្ទាប់ពីប្រធានាធិបតីអាម៉េរិក ដូណាល់ ត្រាំ បានបញ្ឆេះភ្លើងសង្គ្រាមពាណិជ្ជកម្មពិភពលោក។

កាលពីថ្ងៃពុធទី២ ខែមេសា លោក ត្រាំ បានប្រកាសដាក់ពន្ធបន្ថែមចំនួន៣៤ ភាគរយលើទំនិញចិនទាំងអស់ដែលនាំចូលមកសហរដ្ឋអាម៉េរិក។

ជាការឆ្លើយតប គណៈកម្មការពន្ធគយរបស់ក្រុមប្រឹក្សារដ្ឋចិន បានប្រកាសនៅក្នុងសេចក្តីថ្លែងការណ៍មួយដោយប្រកាសអំពីពន្ធសងសឹករបស់ខ្លួនថា៖«ការអនុវត្តរបស់សហរដ្ឋអាម៉េរិកនេះមិនស្របតាមច្បាប់ពាណិជ្ជកម្មអន្តរជាតិ ធ្វើឱ្យប៉ះពាល់យ៉ាងធ្ងន់ធ្ងរដល់សិទ្ធិ និងផលប្រយោជន៍ស្របច្បាប់របស់ប្រទេសចិន ហើយជាការអនុវត្តការគំរាមកំហែងឯកតោភាគី»។

ចិន បាន ហៅ ការ ដំឡើង ពន្ធ ថ្មី របស់ សហរដ្ឋ អាម៉េរិក ថា ជា ការ បំពាន ច្បាប់ របស់ អង្គការ ពាណិជ្ជកម្ម ពិភពលោក ហើយ បាន ស្នើ សុំ ការ ពិគ្រោះ យោបល់នៅអង្គការ ពាណិជ្ជកម្ម ពិភពលោក ។

ការ សងសឹក របស់ ចិន ប្រឆាំង នឹង ការ ដំឡើង ពន្ធ អាម៉េរិក ជុំ ចុង ក្រោយ នេះ គឺ មាន លក្ខណៈ ធំ ជាង សកម្មភាព តបត វិញ មុន របស់ ខ្លួន។ ជាផ្នែកនៃវិធានការសងសឹកដែលបានប្រកាសកាលពីសប្តាហ៍មុន យក្សកុម្មុយនីស្ដសនេះក៏បានបន្ថែមក្រុមហ៊ុនអាម៉េរិកចំនួន១១ ទៅក្នុងបញ្ជីអង្គភាពដែលមិនអាចជឿទុកចិត្តបានរបស់ខ្លួន រួមទាំងក្រុមហ៊ុនផលិតយន្តហោះគ្មានមនុស្សបើក និងដាក់ការត្រួតពិនិត្យការនាំចេញលើក្រុមហ៊ុនអាម៉េរិកចំនួន១៦ ។ លើសពីនេះ រដ្ឋធានីប៉េកាំងក៏បានទប់ស្កាត់ការនាំចេញលើប្រភេទរ៉ែកម្រចំនួន៧ ទៅកាន់សហរដ្ឋអាម៉េរិក រួមមាន samarium, gadolinium និង terbium ។

យោងតាមទិន្នន័យពាណិជ្ជកម្មរបស់សហរដ្ឋអាម៉េរិក ការនាំចូលដ៏ធំបំផុតរបស់ប្រទេសចិនពីសហរដ្ឋអាម៉េរិកគឺសណ្តែកសៀង និងគ្រាប់ធញ្ញជាតិ ដែលមានទំហំទឹកប្រាក់១៣,៤ ពាន់លានដុល្លារក្នុងឆ្នាំ២០២៤ ក៏ដូចជាឥន្ធនៈផ្សេងៗចំនួន១៤,៧ ពាន់លានដុល្លារ និងគ្រឿងចក្រអគ្គិសនីចំនួន១៥,៣ ពាន់លានដុល្លារ។ ចាប់តាំងពីការវិលត្រឡប់មកកាន់អំណាចក្នុងខែមករា លោក ត្រាំ បានដំឡើងពន្ធចំនួន២ លើករួចហើយ ដែលរួមមានពន្ធបន្ថែម១០ ភាគរយលើការនាំចូលរបស់ចិនទាំងអស់ ដែលសេតវិមានអះអាងថា ជាការចាំបាច់ដើម្បីទប់ស្កាត់លំហូរនៃសារធាតុហ្វេតានីលខុសច្បាប់ពីប្រទេសចិនទៅកាន់សហរដ្ឋអាម៉េរិក។ គួបផ្សំជាមួយនឹងពន្ធដែលមានស្រាប់ នោះមានន័យថា ទំនិញចិនដែលមកដល់អាម៉េរិកនឹងអាចទទួលរងការយកពន្ធលើសពី៥៤ ភាគរយ៕