ឯកឧត្តម ហួត សុីនាដ អញ្ជើញជាអធិបតីក្នុងសិក្ខាសាលា ការសិក្សានៅប្រទេសជប៉ុន ក្រោមប្រធានបទ «ផ្តើមចេញពីថ្នាក់រៀន ឆ្ពោះទៅរកសកលលោក»

ភ្នំពេញ៖ នៅរសៀលថ្ងៃទី៥ ខែមេសា ឆ្នាំ២០២៥ ឯកឧត្តម ហួត សុីនាដ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាអនុប្រធានក្រុមប្រឹក្សាភិបាលសមាគមកម្ពុជា-ជប៉ុន Kibou តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាភិបាលសមាគមកម្ពុជា-ជប៉ុន Kibou បានអញ្ជើញជាអធិបតីក្នុងសិក្ខាសាលា ការសិក្សានៅប្រទេសជប៉ុន ក្រោមប្រធានបទ «ផ្តើមចេញពីថ្នាក់រៀន ឆ្ពោះទៅរកសកលលោក» «From Classroom to the World» ដើម្បីបង្ហាញអំពីរបៀបបំពេញសំណុំឯកសារទៅសិក្សានៅប្រទេសជប៉ុន ឱកាស និង បទពិសោធន៏នៃការសិក្សា រស់នៅ និងធ្វើការនៅប្រទេសជប៉ុន។

កម្មវិធីដែលធ្វើឡើងនៅមជ្ឍមណ្ឌលសហប្រតិបត្តិការកម្ពុជា ជប៉ុន (CJCC) នេះ រៀបចំដោយសមាគមកម្ពុជា-ជប៉ុន Kibou និងមានកិច្ចសហការពីស្ថានទូតជប៉ុនប្រចាំនៅកម្ពុជា សមាគមCSAJ ការិយាល័យតំណាងនៃសាកលវិទ្យាល័យ Okayama ដោយមានវត្តមានតំណាងស្ថានទូតជប៉ុនប្រចាំនៅកម្ពុជា ប្រធានគណៈកម្មាធិការប្រតិបត្តិសមាគមកម្ពុជា ជប៉ុន និងអតីតនិស្សិតដែលបានសិក្សានៅប្រទេសជប៉ុនជាច្រើនរូបផងដែរ។

កម្មវិធីក៏មានការធ្វើបទបង្ហាញស្តីអំពី ការទៅសិក្សា អាហារូបករណ៍ និងការរស់នៅប្រទេសជប៉ុន របៀបសរសេរគម្រោងស្រាវជ្រាវ និងបទពិសោធន៍ការសិក្សានៅប្រទេសជប៉ុន សរុបប្រមាណ ២០០នាក់ ៕