សាកលវិទ្យាល័យ UME សាខាខេត្តបន្ទាយមានជ័យ រៀបចំបិទការប្រកួតកីឡាបាល់ទាត់ UME-BMC CUP ក្នុងឆ្នាំសិក្សា២០២៤-២០២៥ 

ភ្នំពេញ៖ សាកលវិទ្យាល័យគ្រប់គ្រង និងសេដ្ឋកិច្ច UME សាខាខេត្តបន្ទាយមានជ័យ បានរៀបចំបិទការប្រកួតកីឡាបាល់ទាត់ UME-BMC CUP ក្នុងឆ្នាំសិក្សា២០២៤-២០២៥ ក្រោយពីបានឆ្លងកាត់កាប្រកួតអស់ជាច្រេីនសប្តាហ៍។ ក្នុងពិធីបិទការប្រកួតនោះផងដែរក៏មានការអញ្ជើញចូលរួមជាអធិបតីភាពដ៏ខ្ពង់ខ្ពស់ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ព្រមទាំងមានការចូលរួមពីលោកឧត្តមសេនីយ៍ទោ សិទ្ធ ឡោះ ស្នងការនគរបាលខេត្ត លោកឧត្តមសេនីយ៍ត្រី បោ ន ប៊ិន មេបញ្ជាការកងរាជអាវុធហត្ថខេត្ត អភិបាល ក្រុងសិរីសោភ័ណ សិស្ស និស្សិត បានចូលរួមយ៉ាងច្រេីនកុះករ តារាងបាល់ទាត់ វាលស្មៅធម្មជាតិ វិទ្យាល័យ ហ៊ុន សែន ខ្លាកូន ស្ថិតនៅក្នុងសង្កាត់កំពង់ស្វាយ ក្រុងសិរីសោភ័ណ។

លោកបណ្ឌិត ណង ថា នាយកសាកលវិទ្យាល័យ UME បានឱ្យដឹងថា សាកលវិទ្យាល័យបានរៀបចំព្រឹត្តិការណ៍ការប្រកួតកីឡាបាល់ទាត់ UME-BMC CUP ក្នុងឆ្នាំសិក្សា២០២៤-២០២៥ លើកទី១៦ ដោយបង្កើតក្លឹបកីឡាបាល់ទាត់បុរសចំនួន៨ក្លឹប ដូចឆ្នាំមុនៗផងដែរ ដែលចែកជា២ពូលគឺៈ ពូលA មាន៖ ទី១-ក្លឹប បាយ័ន FC ទី២-ក្លឹប ស្តេចនាគ ទី៣-ក្លឹប SUPER STARS និងទី៤-ក្លឹប រាជសីហ៍។ ពូលB មាន៖ ទី១-ក្លឹប អធិរាជវាលស្មៅ ទី២-ក្លឹប ហង្សរាជ ទី៣-ក្លឹប HEROES UNITED និងទី៤-ក្លឹប ឥន្ទ្រីដែក។ ត្រូវបានចូលរួមប្រកួតលើវិញ្ញាសាបាល់ទាត់បុរសដើម្បី ដណ្តើមពានរង្វាន់ UME-BMC CUP សម្រាប់ឆ្នាំសិក្សា២០២៤-២០២៥ ដែលការប្រកួតនេះចាប់ ផ្តើមពីថ្ងៃទី១៤ ខែកុម្ភៈ ឆ្នាំ២០២៥ រហូតដល់ថ្ងៃទី៥ ខែមេសា ឆ្នាំ២០២៥ រៀងរាល់ល្ងាចថ្ងៃ សុក្រ-សៅរ៍ វេលាម៉ោង៥ និង៣០នាទីល្ងាច តទៅ នៅទីលានប្រកួតបាល់ទាត់ Happy Sport និង២ប្រកួតចុងក្រោយ វគ្គដណ្តើមលេខ៣ និងវគ្គផ្តាច់ព្រ័ត្រ នៅទីលានបាល់ទាត់វិទ្យាល័យ ហ៊ុន សែន ខ្លាកូន។ ព្រឹត្តិការណ៍នៅរដូវកាលថ្មីនេះ ក្លឹបដែលទទួលបានជ័យលាភី លេខ១ ពានរង្វាន់ UME-BMC CUP គឺបានទៅលើក្លឹប បាយ័ន Fc, លេខ២ បានទៅលេី ក្រុមអធិរាជវាលស្មៅ។

លោកបានបញ្ជាក់ថា សាកលវិទ្យាល័យ UME បានបង្កើតក្រុមបាល់ទាត់បុគ្គលិក និងសាស្ត្រាចារ្យ ដើម្បីចូលរួមប្រកួត និងបង្កើនចំណងមិត្តភាព ជាមួយស្ថាប័ន គ្រឹះស្ថាន និងវិទ្យាល័យនានា ក្នុងខេត្តបន្ទាយមានជ័យ ក្នុងគោលបំណងបង្ហាញនូវគំរូល្អដល់ សិស្ស-និស្សិត យុវជន ឱ្យស្រឡាញ់វិស័យកីឡា ងាកមកលេងកីឡា មិនយកពេលវេលាទំនេរទៅប្រើប្រាស់គ្រឿងញៀន ល្បែងអបាយមុខ ឬបង្កើតជាក្រុមក្មេង ទំនើង ដែលជាកត្តាធ្វើឱ្យតម្លៃនៃសង្គម និងសេដ្ឋកិច្ចធ្លាក់ចុះនោះឡើយ។ ទាំងអស់នេះជាការឆ្លុះបញ្ចាំងឱ្យ ឃើញថាសាកលវិទ្យាល័យជាចំណែកមួយបានចូលរួមជាមួយរាជរដ្ឋាភិបាលក្នុងការបំផុសវិស័យកីឡា តាម រយៈការបង្កើតកម្មវិធីកីឡាសម្រាប់ បុគ្គលិក សាស្ត្រាចារ្យ គ្រូបង្រៀន និងនិស្សិត ដែលជាយុវជនបន្តវេន។ ព្រឹត្តិការណ៍ប្រកួតកីឡានេះ ក៏ជាការផ្តល់ឱកាសឱ្យយុវជនបានលេងកីឡា ពង្រឹងសមត្ថភាព សុខភាព មិត្តភាព និងសាមគ្គីភាព ៕