សម្តេចធិបតី៖ រាជរដ្ឋាភិបាលប្ដេជ្ញាកសាងសមិទ្ធផលថ្មីៗដើម្បីឆ្លើយតបទៅនឹងតម្រូវការរបស់ពលរដ្ឋ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងថា នៅពេលដែលមានមតិមួយចំនួនចោទប្រកាន់ថា រាជរដ្ឋាភិបាលមិនធ្វើអ្វីទាំងអស់ គឺសម្តេចពុំមានពេលវេលាឆ្លើយតបឡើយ ប៉ុន្ដែសម្តេចយកពេលវេលាមកសម្ពោធសមិទ្ធផល និងបើកការដ្ឋានអោយបានច្រើនដែលបានផ្តល់ផលប្រយោជន៍ផ្ទាល់នៅលើដីជូនដល់ប្រជាពលរដ្ឋ។
នៅក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ ស្ពានអាកាស «មរតកតេជោ» នៅព្រឹកថ្ងៃទី៧ ខែមេសា ឆ្នាំ២០២៥នេះ សម្តេចធិបតី ហ៊ុន ម៉ាណែត បានថ្លែងថា គេកាន់តែថា យើងកាន់តែធ្វើឱ្យបានច្រើន ហើយផលដែលទទួលបានគឺសម្រាប់ប្រជាពលរដ្ឋទាំងអស់ នេះហើយគឺជាវឌ្ឍនភាពនៃការអភិវឌ្ឍប្រទេសជាតិរបស់យើងដូចពាក្យចាស់ថា «តក់ៗពេញបំពង់»។
សម្តេចធិបតី នាយករដ្ឋមន្ត្រី បានគូសបញ្ជាក់ថា រាជរដ្ឋាភិបាលប្ដេជ្ញាកសាងសមិទ្ធផលថ្មីៗដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ពោលគឺសាងសង់ហេដ្ឋារចនាសម្ព័ន្ធឥតឈប់ឈរ ដើម្បីបង្កភាពងាយស្រួលជូនប្រជាពលរដ្ឋធ្វើចរាចរណ៍ និងកាត់បន្ថយពេលវេលានៃការដឹកជញ្ជូន និងធ្វើដំណើរប្រចាំថ្ងៃ ៕
