ឯកឧត្តម អ៊ុំ រាត្រី ជួបសំណេះសំណាលជាមួយបេក្ខជនស្ម័គ្រចិត្តបម្រើឲ្យកងយោធពលខេមរភូមិន្ទ បំពេញក្របខ័ណ្ឌកងទ័ពជើងគោក តំបន់ប្រតិបត្តិការសឹករងបន្ទាយមានជ័យ យោធភូមិភាគទី៥

ភ្នំពេញ៖ នៅព្រឹកថ្ងៃទី៧ ខែមេសា ឆ្នាំ២០២៥ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានអញ្ជើញជួបសំណេះសំណាលជាមួយបេក្ខជនដែលបានដាក់ពាក្យចូលបម្រើកងយោធពលខេមរភូមិន្ទ បំពេញក្របខ័ណ្ឌកងទ័ពជើងគោក នៅទីបញ្ជាការ តំបន់ប្រតិបត្តិការសឹករងបន្ទាយមានជ័យ យោធភូមិភាគទី៥។

ឯកឧត្តមអភិបាលខេត្ត បានមានប្រសាសន៍ថា ប្អូនៗជាយុវជនស្ម័គ្រចិត្តទាំងអស់ ដែលបានដាក់ពាក្យរួចរាល់ ហើយគណៈកម្មការជ្រើសរើសយុវជនស្ម័គ្រចិត្តបំពេញឲ្យក្របខ័ណ្ឌកងទ័ពជើងគោក នឹងធ្វើការត្រួតពិនិត្យលក្ខណៈសម្បត្តិបេក្ខជន សូមប្អូនៗត្រៀមលក្ខណៈសម្បត្តិឲ្យបានគ្រប់គ្រាន់ ដើម្បីគណៈកម្មការត្រួតពិនិត្យ។

ឧត្តមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករងបន្ទាយមានជ័យ បានមានប្រសាសន៍ ណែនាំដល់អាណាព្យាបាល ឬប្អូនៗ ផ្តល់ព័ត៌មានមកគណៈកម្មការជ្រើសរើសកងទ័ពជើងគោក នៅពេលមានជនណាទាមទារជាថវិកា ឬថ្នូរអ្វីមួយនឹងការជាប់ចូលក្របខណ្ឌនេះ តាមរយៈលិខិតទប់ស្កាត់អំពើរពុករលួយរបស់គណៈកម្មការ កងទ័ពជើងគោក ដែលបានផ្សព្វផ្សាយជូន និងបានផ្តាំផ្ញើដល់អ្នកមិនបានជាប់កុំអាក់អន់ស្រពន់ចិត្ត ការជ្រើសរើសតែងតែមានអ្នកជាប់ មានអ្នកធ្លាក់ ហើយអ្នកជាប់ត្រូវដឹងថាខ្លួនមានកាតព្វកិច្ចជាប់ខ្លួនបន្ថែមក្នុងនាមជាកងយោធពលខេមរភូមិន្ទ ត្រូវគោរព បទបញ្ជា វិន័យ និងច្បាប់កងទ័ព លើសពីកាលខ្លួននៅជាជីវភាពជនស៊ីវិល ករណីល្មើសត្រូវប្រឈមនឹងទោសទ័ណ្ឌ វិន័យ ទណ្ឌកម្ម របស់កងយោធពលខេមរភូមិន្ទ និងច្បាប់ ៕