ឧបនាយករដ្ឋមន្រ្តីប្រចាំការ វង្សី វិស្សុត អញ្ជើញបើកសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារសម្រាប់ឆ្នាំ២០២៥ របស់ទីស្តីការគណៈរដ្ឋមន្ត្រី
ភ្នំពេញ៖ នៅព្រឹកថ្ងៃទី៧ ខែមេសា ឆ្នាំ២០២៥ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណចក្រកម្ពុជា បានអញ្ជើញជាអធិបតីបើកសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារសម្រាប់ឆ្នាំ២០២៥ របស់ទីស្តីការគណៈរដ្ឋមន្ត្រី។
សន្និបាតនេះ មានការអញ្ជើញចូលរួមពីសំណាក់ ឯកឧត្តម ឆែម គាតរិទ្ធី ទេសរដ្ឋមន្ត្រី ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ឯកឧត្តម លី ធុច ទេសរដ្ឋមន្ត្រី ឯកឧត្តម កែវ រ៉េមី ទេសរដ្ឋមន្ត្រី រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការ អនុរដ្ឋលេខាធិការ អគ្គនាយក លោក លោកស្រី ជាថ្នាក់ដឹកនាំនិងមន្ត្រីរាជការនៃទីស្តីការគណៈរដ្ឋមន្ត្រី និងតំណាងពីក្រសួងស្ថាប័ននានា ប្រមាណជិត ៦០០ នាក់។
ថ្លែងក្នុងពិធីបើកសន្និបាត ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ បានមានប្រសាសន៍ថា នេះគឺជាលើកទី១ ដែលទីស្តីការគណៈរដ្ឋមន្រ្តីបានជួបជុំគ្នាជាមហាគ្រួសារមួយដ៏ធំ មិនធ្លាប់មានពីមុនមក ដើម្បីរៀបចំសន្និបាតបូកសរុបលទ្ធផលការងារប្រចាំឆ្នាំ និងលើកទិសដៅការងារសម្រាប់ឆ្នាំបន្ទាប់ បន្ទាប់ពីទទួលបានគោលការណ៍ឯកភាពដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណចក្រកម្ពុជា។
ឯកឧត្តមឧបនាយករដ្ឋមន្រ្តីប្រចាំការ បានបន្តថាសន្និបាតនេះក៏ជាព្រឹត្តិការណ៍មួយដ៏មានសារៈសំខាន់ ដើម្បីបូកសរុបលទ្ធផល និងវឌ្ឍនភាពការងារដែលសម្រេចបានកន្លងមក ក៏ដូចជាកំណត់នូវបញ្ហាប្រឈម និងសំណូមពរនានារបស់ថ្នាក់ដឹកនាំ មន្រ្តីរាជការ និងអង្គភាពចំណុះទាំងអស់ សំដៅតម្រង់ទិស និងរួមគ្នាពិចារណារកដំណោះស្រាយសមស្រប ក្នុងគោលដៅបំពេញបេសកកម្មការងារដែលរាជរដ្ឋាភិបាលបានដាក់ចេញ ឱ្យមានគុណភាព ប្រសិទ្ធភាព និងសមិទ្ធកម្មការងារ។
ឯកឧត្តមឧបនាយករដ្ឋមន្ត្រីប្រចាំការ បានបន្តទៀតថា សន្និបាតនេះក៏នឹងផ្តល់ឱកាសជូនដល់ថ្នាក់ដឹកនាំ និងមន្ត្រីរាជការក្រោមឱវាទទីស្តីការគណៈរដ្ឋមន្ត្រី ក៏ដូចជាថ្នាក់ដឹកនាំមកពីក្រសួង ស្ថាប័ននានា បានស្វែងយល់កាន់តែច្បាស់អំពីអត្តសញ្ញាណ និងតួនាទីភារកិច្ច នៃទីស្តីការគណៈរដ្ឋមន្រ្តី ក៏ដូចជាសមិទ្ធិកម្មសំខាន់ៗដែលទីស្តីការគណៈរដ្ឋមន្ត្រី និងអង្គភាពចំណុះនានាខិតខំសម្រេចបាន ក្នុងរយៈពេលពេញមួយឆ្នាំកន្លងទៅនេះ។
ឯកឧត្តមឧបនាយករដ្ឋមន្ត្រីប្រចាំការ បានគូសរំលេចផងដែថា ទីស្តីការគណៈរដ្ឋមន្រ្តី ត្រូវបានបង្កើតនៅក្នុងច្បាប់ស្តីពីការរៀបចំ និងការប្រព្រឹត្តទៅនៃគណៈរដ្ឋមន្រ្តី ដែលមានឋានានុក្រមខ្ពស់ជាងច្បាប់ស្តីពីការបង្កើតក្រសួងស្ថាប័នផ្សេងទៀត។ លក្ខណៈពិសេសមួយទៀត គឺទីស្តីការគណៈរដ្ឋមន្រ្តី ដឹកនាំដោយនាយករដ្ឋមន្ត្រី ហើយរដ្ឋមន្រ្តីទទួលបន្ទុកទីស្ដីការគណៈរដ្ឋមន្រ្តីមានតួនាទីគ្រប់គ្រង និងចាត់ចែងការងារទីស្ដីការគណៈរដ្ឋមន្រ្តី។
ឯកឧត្តមឧបនាយករដ្ឋមន្ត្រីប្រចាំការ ក៏បានលើកឡើងផងដែរ នូវចក្ខុវិស័យរបស់ទីស្តីការគណៈរដ្ឋមន្រ្តី ដែលជា «ស្ថាប័នដែលមានសមត្ថភាពនិងវិជ្ជាជីវៈខ្ពស់ និងមានក្រមសីលធម៌ ក្នុងការបំពេញការងារប្រកបដោយគុណភាព ប្រសិទ្ធភាព និងនិរន្តរភាព» និងគុណតម្លៃស្នូលចំនួន៤របស់ទីស្តីការគណៈរដ្ឋមន្រ្តី៖ ទី១.នីតិរដ្ឋនិងការការពារផលប្រយោជន៍សាធារណៈ, ទី២.គុណាធិបតេយ្យ, ទី៣.សាមគ្គីភាពនិងបរិយាបន្ន និងទី៤. វិជ្ជាជីវៈនិងក្រមសីលធម៌។
ឯកឧត្តមឧបនាយករដ្ឋមន្ត្រីប្រចាំការ ក៏បានគូសបញ្ជាក់ផងដែរ នូវមុខងារ និងតួនាទីភារកិច្ចរបស់ទីស្តីការគណៈរដ្ឋមន្រ្តី ដែលមានកន្សោមមុខងារចំនួន៣ គឺ៖ ១.មុខងារស្នូលមានចំនួន៧ និងមុខងារសម្របសម្រួលមានចំនួន៥ ព្រមទាំងមុខងារគាំទ្រមានចំនួន៥ ផងដែរ។
ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានសម្តែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់ តាមបណ្តាអគ្គនាយកដ្ឋានជំនាញទាំង១០ ក៏ដូចជាតាមបណ្តាអង្គភាពចំណុះទាំង២៩ ដែលបានខិតខំយកអស់កម្លាំងកាយ ចិត្ត និងប្រាជ្ញាស្មារតី ក្នុងការបំពេញការងារយ៉ាងសកម្មក្នុងរយៈពេលកន្លងមកនេះ ប្រកបដោយសាមគ្គីភាពផ្ទៃក្នុងរឹងមាំជាអង្គតែមួយ និងប្រកបដោយសហថាមពល ដែលបានបង្ហាញថា ទីស្ដីការគណៈរដ្ឋមន្ត្រីកំពុងរីកលូតលាស់ រីកចម្រើន មានថាមពល និងចីរភាពក្នុងការបំពេញបេសកកម្មបម្រើរាជរដ្ឋាភិបាល និងប្រទេសជាតិ ជាពិសេស សម្តេចមហាបវរធិបតី ហ៊ុន ម៉ាណែត ប្រមុខនៃរាជរដ្ឋាភិបាល។
ឯកឧត្តមឧបនាយករដ្ឋមន្រ្តីប្រចាំការ បានបន្តថា ម្ខាងទីស្តីការគណៈរដ្ឋមន្រ្តីបានបំពេញនូវមុខងារភារកិច្ចរបស់ខ្លួនជាសេនាធិការរបស់នាយករដ្ឋមន្រ្តី និងគណៈរដ្ឋមន្រ្តី និងម្ខាងទៀតបានខិតខំធ្វើការកែទម្រង់ តាមរយៈការរៀបចំផែនការយុទ្ធសាស្រ្ត, ផែនទីចង្អុលផ្លូវ ការបណ្តុះបណ្តាល និងការវិភាគមុខងារ ព្រមទាំងការរៀបចំប្រព័ន្ធការងារ, រចនាសម្ព័ន្ធស្ថាប័ន និងប្រព័ន្ធលើកទឹកចិត្តជាដើម។
ឯកឧត្តមឧបនាយករដ្ឋមន្ត្រីប្រចាំការ បានលើកទឹកចិត្តឱ្យអង្គសន្និបាត ចូលរួមស្តាប់ដោយយកចិត្តទុកដាក់ និងចូលរួមផ្តល់មតិយោបល់ឱ្យបានផុលផុស សម្រាប់ជាមូលដ្ឋានក្នុងការដាក់ចេញនូវវិធានការថ្មីៗ សំដៅដោះស្រាយបញ្ហាប្រឈមដែលនឹងត្រូវបានលើកឡើងនៅក្នុងសន្និបាត ដើម្បីឱ្យកិច្ចពិភាក្សាបានផុសផុល ដំណើរការទៅដោយរលូន និងសម្រេចបានលទ្ធផលល្អត្រចះត្រចង់ដូចការគ្រោងទុក ៕
