វៀតណាមស្នើសុំពន្យារពេល ពីការយកពន្ធរបស់លោកប្រធានាធិបតី ដូណាល់ ត្រាំ
ហាណូយ៖ បើយោងតាមច្បាប់ចម្លងនៃលិខិតផ្លូវការដែលចេញផ្សាយដោយទីភ្នាក់ងារសារព័ត៌មាន AFP បានឱ្យដឹងថា នៅនាទីចុងក្រោយមុនពេលការយកពន្ធរបស់លោកប្រធានាធិបតី ដូណាល់ ត្រាំ ចាប់ផ្តើមជាផ្លូវការ វៀតណាមបានស្នើសុំការពន្យារពេល ខណៈតួលេខរបស់រដ្ឋាភិបាលបង្ហាញកាលពីថ្ងៃអាទិត្យទី៦ ខែមេសាថា សេដ្ឋកិច្ចរបស់ប្រទេសសង្គមនិយមមួយនេះ កើនឡើងក្នុងល្បឿនយឺតនៅក្នុងត្រីមាសទីមួយ។
មហាអំណាចផលិតកម្មនៅអាស៊ីអាគ្នេយ៍ មានសហរដ្ឋអាម៉េរិកជាទីផ្សារនាំចេញដ៏ធំបំផុតរបស់ខ្លួនក្នុងរយៈពេលបីខែដំបូងនៃឆ្នាំនេះ ប៉ុន្តែអតិថិជនសំខាន់របស់ខ្លួនឥឡូវកំពុងប្រឈមជាមួយនឹងពន្ធរហូតដល់៤៦ភាគរយ។ មេដឹកនាំកំពូលរបស់វៀតណាម លោក តូ ឡាំ (Tô Lâm) បានស្នើសុំឱ្យលោក ត្រាំ ពន្យារពេលយ៉ាងហោចណាស់៤៥ ថ្ងៃ ចំពោះការយកពន្ធថ្មី៤៦ភាគរយ។
នៅក្នុងលិខិតនោះ លោក ឡាំ បាននិយាយថា លោកបានតែងតាំងឧបនាយករដ្ឋមន្ត្រី លោក ហូ ឌឹកភុក (Hồ Đức Phớc) ទំនាក់ទំនងជាមួយភាគីអាម៉េរិកលើបញ្ហានេះ ក្នុងគោលបំណងឈានដល់កិច្ចព្រមព្រៀងឱ្យបានឆាប់តាមដែលអាចធ្វើទៅបាន។
លោកសង្ឃឹមថា នឹងជួបបុរសសេដ្ឋកិច្ច ត្រាំ នៅវ៉ាស៊ីនតោននៅចុងខែឧសភា។ បន្ថែមលើនេះ លោក ឡាំ បាននិយាយក្នុងអំឡុងកិច្ចសន្ទនាតាមទូរសព្ទជាមួយប្រធានាធិបតីអាម៉េរិក ដូណាល់ ត្រាំ កាលពីថ្ងៃសុក្រទី៤ ខែមេសាថា វៀតណាមបានត្រៀមខ្លួនរួចជាស្រេចក្នុងការចរចាជាមួយសហរដ្ឋអាម៉េរិក ដើម្បីកាត់បន្ថយពន្ធនាំចូលលើទំនិញរបស់សហរដ្ឋអាម៉េរិកមកត្រឹមសូន្យភាគរយ។
ក្នុងអំឡុងពេលសន្ទនា មេដឹកនាំទាំងពីរ បានអះអាងជាថ្មីនូវការប្តេជ្ញាចិត្តរបស់ពួកគេក្នុងការពង្រឹងកិច្ចសហប្រតិបត្តិការទ្វេភាគី ដើម្បីជាប្រយោជន៍នៃប្រទេសទាំងពីរ និងការរួមចំណែកដល់សន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។ ពួកគេបានចែករំលែកការវាយតម្លៃថា ទំនាក់ទំនងវៀតណាម-អាម៉េរិក បាននិងកំពុងរីកចម្រើនលើគ្រប់វិស័យ។
ការិយាល័យស្ថិតិរបស់ប្រទេសវៀតណាម បានបង្ហាញកាលពីថ្ងៃអាទិត្យថា ផលិតផលក្នុងស្រុកសរុបនៅក្នុងប្រទេសវៀតណាម ក្នុងអំឡុងត្រីមាសទីមួយកើនឡើង៦,៩៣ ភាគរយ បើធៀបនឹងរយៈពេលដូចគ្នាកាលពីឆ្នាំមុន ធ្លាក់ចុះបន្តិចពីការកើនឡើង៧,៥៥ ភាគរយនៅក្នុងត្រីមាសចុងក្រោយ។ ទោះបីជាមានបញ្ហាប្រឈមដែលបណ្តាលមកពីការយកពន្ធរបស់សហរដ្ឋអាម៉េរិកក៏ដោយ ក៏នាយករដ្ឋមន្ត្រីវៀតណាម លោក ផាម មិញជីញ (Phạm Minh Chính) បាននិយាយថា គោលដៅនៃកំណើនយ៉ាងហោចណាស់៨ភាគរយនៅឆ្នាំនេះនៅតែមិនផ្លាស់ប្ដូរ។
រដ្ឋាភិបាលបានប្រកាសថា ដើម្បីសម្រេចបាននូវគោលដៅរបស់ខ្លួន ក្រសួងហិរញ្ញវត្ថុរបស់វៀតណាមបានកំណត់ថា សេដ្ឋកិច្ចនឹងត្រូវការកំណើនរវាង៨,២ភាគរយ និង៨,៤ភាគរយនៅក្នុងត្រីមាសដែលនៅសល់៕
