សមាជិក សមាជិកា សភាវ័យក្មេង អញ្ជើញគោរពជូនពរ ឯកឧត្ដមអនុប្រធានទី២ រដ្ឋសភាក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ

ភ្នំពេញ៖ នៅក្នុងឱកាសនៃពិធីបុណ្យចូលឆ្នាំថ្មី ប្រពៃណីជាតិ ឆ្នាំម្សាញ់ សប្តស័ក ព.ស.២៥៦៩ ដែលនឹងឈានចូលមកដល់ក្នុងពេលឆាប់ៗខាងមុខនេះ សមាជិក សមាជិកា សភាវ័យក្មេង ដឹកនាំដោយ ឯកឧត្ដម សួស យ៉ារ៉ា ប្រធានគណៈកម្មការទី៥ នៃរដ្ឋសភា បានអញ្ជើញគោរពជូនពរ ឯកឧត្ដម វង សូត អនុប្រធានទី២ រដ្ឋសភា នាព្រឹកថ្ងៃទី៧ ខែមេសា ឆ្នាំ២០២៥ នៅវិមានរដ្ឋសភា។

ឯកឧត្តម សួស យ៉ារ៉ា តាងនាមក្រុមសមាជិករដ្ឋសភាវ័យក្មេងនៃរដ្ឋសភា បានអានសារលិខិតជូនពរ ដោយបានលើកឡើងពីគុណបំណាច់ដ៏ឧត្តុង្គឧត្តម របស់ឯកឧត្ដម វង សូត អនុប្រធានទី២រដ្ឋសភា នៅក្នុងបុព្វហេតុជាតិ និងបានចូលរួមស្ដារ កសាង និងអភិវឌ្ឍប្រទេសជាតិឱ្យមានការរីកចម្រើនរហូតមក។

ឯកឧត្ដម វង សូត ក៏បានចូលរួមចំណែកយ៉ាងធំធេងនៅក្នុងដំណើរការអភិវឌ្ឍរីកចម្រើនរបស់រដ្ឋសភាកម្ពុជា ដែលគុណូបការៈ និងគំរូវីរភាពដ៏ថ្លៃថ្លានេះ បានចារឹកជាប់នៅក្នុងដួងចិត្តរបស់ថ្នាក់ដឹកនាំនិងសមាជិក សមាជិការដ្ឋសភាក៏ដូចជាប្រជាពលរដ្ឋទូទៅមិនអាចបំភ្លេចបានឡើយ។

នៅក្នុងសារលិខិតជូនពរក៏បានបួងសួងដល់គុណបុណ្យព្រះរតនត្រ័យ គុណកែវទាំង៣ វត្ថុស័ក្តិសិទ្ធិទាំងឡាយក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា ជាពិសេសទេវតាឆ្នាំថ្មី ឆ្នាំម្សាញ់ សប្តស័ក ព.ស.២៥៦៨ ព្រះនាង គោរាគៈទេវី តាមជួយថែរក្សា ប្រោះព្រំសព្ទសាធុការពរ សិរីសួស្តី ជ័យមង្គល វិបុលសុខគ្រប់ប្រការ ជូនចំពោះ ឯកឧត្ដម វង សូត អនុប្រធានទី២រដ្ឋសភានិងលោកជំទាវ ព្រមទាំងបុត្រា បុត្រី ចៅប្រុស ចៅស្រីជាទីស្រឡាញ់ សូមបានសមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ជាមួយនឹងការថ្លែងអំណរគុណដ៏ជ្រាលជ្រៅចំពោះ ក្រុមសមាជិករដ្ឋសភាវ័យក្មេងនៃរដ្ឋសភាកម្ពុជា ឯកឧត្ដម វង សូត អនុប្រធានទី២រដ្ឋសភា ក៏បានមានប្រសាសន៍ជូនពរឆ្នាំថ្មីជូនចំពោះក្រុមសមាជិករដ្ឋសភាវ័យក្មេងនៃរដ្ឋសភាកម្ពុជាទាំងអស់ សូមមានសុខភាពល្អ មានសិរីសួស្ដី ជ័យមង្គល វិបុលសុខគ្រប់ប្រការ ចាប់តាំងពីឆ្នាំថ្មីដែលនឹងឈានចូលមកដល់នាពេលខាងមុខនេះតរៀងទៅ ៕