បុណ្យចូលឆ្នាំខ្មែរ សមត្ថកិច្ចនៅតែរឹតបន្តឹងច្បាប់ចរាចរណ៍ ពិសេសការបន្តចាប់ជាតិស្រវឹង
ភ្នំពេញ៖ ឯកឧត្ដមឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានឱ្យដឹងថា នៅក្នុងឱកាសថ្ងៃបុណ្យចូលឆ្នាំថ្មីប្រពៃណីជាតិខ្មែរខាងមុខនេះ កម្លាំងសមត្ថកិច្ច នៅតែបង្កើនការរឹតបន្តឹងច្បាប់ចរារណ៍ដដែល តាមរយះការបន្តដាក់គោលដៅត្រួតពិនិត្យជាតិស្រវឹងនៅពេលរាត្រី ដើម្បីសុវត្ថិភាពលើដងផ្លូវ និងកាត់បន្ថយគ្រោះថ្នាក់ចរាចរណ៍ ។
ថ្លែងក្នុងកិច្ចសម្ភាសន៍ជាមួយអ្នកសារព័ត៌មាន
ឧត្តមសេនីយ៍ឯក ជួន ណារិន្ទ បានលើកឡើងថា ការអនុវត្តច្បាប់ចរាចរណ៍ មិនត្រូវបានបន្ថូរបន្ថយដៃនោះឡើយ ព្រោះបច្ចុប្បន្ននេះ អាត្រាគ្រោះថ្នាក់ចរាចរណ៍ដែលបង្កឱ្យមានការខូចខាតទ្រព្យសម្បត្តិ និងឆក់យកអាយុជីវិតពលរដ្ឋ នៅមិនទាន់មានថមថយនៅឡើយ ដែលទាំងនេះហើយជាកង្វល់របស់ប្រមុខរាជរដ្ឋាភិបាល ពិសេសសមត្ថកិច្ចអ្នកអនុវត្ត ត្រូវចាំបាច់បន្តបង្កើនការយកចិត្តទុកដាក់ខ្ពស់លើកិច្ចការងារនេះ ។
សូមបញ្ជាក់ថា ទាក់ទិនបញ្ហាចរាចរណ៍នេះកន្លងទៅ ប្រមុខថ្នាក់ដឹកនាំ នៃកម្ពុជា សម្តេចមហាបវរធិបតី ហ៊ុន ម៉ាណែត ក៏ដូចជាក្រសួងមហាផ្ទៃ តែងបានក្រើនរំលឹកជារឿយៗ និងចេញបទបញ្ជារដល់បណ្តាស្នងការទាំង២៥រាជធានីខេត្ត ឱ្យបន្តបង្កើនការយកចិត្តទុកដាក់ខ្ពស់ លើការរឹតបន្តឹងច្បាប់ចរាចរណ៍ ខណះគ្រោះថ្នាក់ចរាចរណ៍តែងឧស្សាហ៍កើតមានឡើងជារឿយៗ ដោយបានបំផ្លាញទ្រព្យសម្បត្តិ , បង្ករបួសស្នាម និងបានឆក់យកអាយុជីវិតមនុស្សជាបន្តបន្ទាប់ជារៀងរាល់ថ្ងៃ ដែលជាកត្តាបង្កក្តីព្រួយបារម្ភខ្ពស់មួយសម្រាប់សង្គមជាតិបច្ចុប្បន្ន ៕
