អភិបាលខេត្តពោធិ៍សាត់ ជួបសំណេះសំណាលជាមួយនិវត្តន៍ជន ក្រុងពោធិ៍សាត់ចំនួន៥៥៩នាក់

ភ្នំពេញ៖ ឯកឧត្តម ខូយ រីដា អភិបាលនៃគណៈអភិបាលខេត្ត នាថ្ងៃទី១១ ខែមេសាឆ្នាំ២០២៥ បានអញ្ជើញជួបសំណេះសំណាល ជាមួយអតីត មន្ត្រីរាជការស៊ីវិលរបស់មន្ទីរ អង្គភាពចំនួន៥៥៩នាក់ ក្នុងក្រុងពោធិ៍សាត់ អបអរសាទរពិធីបុណ្តចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស ២៥៦៩ដោយមានការចូលរួមពីសមាជិក ក្រុម ប្រឹក្សាខេត្ត គណៈអភិបាលខេត្ត អភិបាលក្រុង ថ្នាក់ដឹកនាំមន្ទីរ អង្គភាពជុំវិញខេត្តនិងអតីតមន្ត្រីចូលនិវត្តន៍។

លោក អៀង ហុង ប្រធានមន្ទីរសង្គមកិច្ចអតីតយុទ្ធជននិងយុវនីតិសម្បទាខេត្តបាន រាយការណ៍ដោយ សង្ខេបថា ឆ្នាំ២០២៥នេះនិវត្តជនក្នុងខេត្តមានចំនួន ១.៦២០នាក់ ក្នុងនោះនិវត្តជនតាមមន្ទីរ អង្គភាពជុំវិញខេត្ត ក្នុងក្រុងពោធិ៍សាត់ចំនួន៥៥៩នាក់មកជួបជុំក្នុងពិធីសំនេះសំណាលពីសំណាក់ ឯកឧត្តម ខូយ រីដា អភិបាលនៃគណៈអភិបាលខេត្ត ក្នុងគោលបំណងសម្តែងនូវការនឹករលឹកបន្ទាប់ពីបានបែកគ្នាមួយគ្រាកន្លងមក។

មានប្រសាសន៍សំណេះសំណាលនាឱកាសនោះ ឯកឧត្តម ខូយ រីដា អភិបាល នៃគណៈអភិបាលខេត្ត បានថ្លែងថា ការជួបជុំគ្នានេះ ធ្វើឡើងដើម្បីបង្ក ឱកាសជូនរៀមច្បងជាអតីតមន្រ្តីរាជការស៊ីវិលទាំង៥៥៩នាក់ក្នុងក្រុងពោធិ៍សាត់បានជួបជុំពិភាក្សាសួរសុខទុក្ខ សំណេះសំណាលនិងឈ្វែងយល់អំពីស្ថាន ជីវភាពគ្នាទៅវិញទៅមកក្នុងន័យ បង្កើនចំណងសាមគ្គីភាពនិងមិត្តភាពដើម្បីអបអសាទរបុណ្យចូលឆ្នាំថ្មីប្រពៃណីជាតិខ្មែរឆ្នាំម្សាញ់សប្តស័កព.ស២៥៦៩។ លោកពូលោកអ៊ុំ អ្នកមីងជារៀបច្បង ពេលនេះចប់ភារកិច្ចក្នុងការបម្រើជាតិ ក៏ពិតមែនប៉ុន្តែមិនត្រូវមានចិត្តអស់សង្ឃឹមនោះទេ ព្រោះនៅមានការតព្វកិច្ចជួយជ្រោមជ្រែងទៅដល់យុវជនជំនាន់ក្រោយៗទៀត។

ឯកឧត្តមអភិបាលខេត្ត បានថ្លែងទៀតថា ការជួបជុំគ្នានេះគឺជាការរំលឹកដឹងគុណ អតីតមន្ត្រីរាជការស៊ីវិលដែលបានខិតខំតស៊ូអត់ធ្មត់ គ្រប់កាលៈទេសៈនិងគ្រប់ដំណាក់កាល ក្នុងការការពារនិងអភិវឌ្ឍន៏ប្រទេសជាតិពិសេសបានកសាងកេរ្តិ៍ដំណែលនិងស្នាដៃដ៏មានសារៈសំខាន់ទាំងការផ្តល់នូវចំណេះដឹង ចំណេះធ្វើ និងបទពិសោធន៍ល្អៗជាច្រើនសម្រាប់មន្ត្រីរាជការជំនាន់ក្រោយរៀនសូត្រនិងយកទៅអនុវត្ត តាម។ឯកឧត្តមបានក្រើនរំលឹកដល់និវត្តន៍ជនទាំងអស់ត្រូវគិតពីផលប្រយោជន៍ជាតិជាធំនិងខិតខំចូលរួមថែរក្សាការពារសមិទ្ធិផលសង្គម ឲ្យបានគង់វង់យូរអង្វែងដល់កូនចៅជំនាន់ក្រោយៗទៀត។

តាមរយៈការសំណេះសំណាលនេះឯកឧត្តម បានជម្រាបជូនដល់រៀបច្បងថា នៅចំពោះមុខនេះខេត្តពោធិ៍សាត់ត្រូវបានថ្នាក់ជាតិ រួមជាមួយថ្នាក់ក្រោមជាតិផ្តោតការយកចិត្តទុកដាក់អភិវឌ្ឍន៍សមិទ្ធិផលធំៗជាច្រើនទៀតដូចជាទំនប់ទឹកទី២នៅស្រុកភ្នំក្រវាញ ដែលអាចដំកល់ទឹកបានជិត៩០០លានម៉ែត្រគីប ប្រឡាយក្បាលហុងនិងអូតាប៉ោង តាណៃ សម្រាប់បម្រើការស្រោចស្រពលើវិស័យកសិកម្មគ្រប់រដូវកាលរបស់ប្រជាកសិករ។ ចំពោះរដ្ឋបាលខេត្តក៏បានខិតខំអភិវឌ្ឍតាមច្រាំងមាត់ស្ទឹងពោធិ៍សាត់ឱ្យក្លាយទៅជាសួនច្បារជាទីកន្លែងសម្រាប់ហាត់ប្រាណនិងកាន់តែមានសោភណ្ឌភាពទាក់ទាញភ្ញៀវជាតិ អន្តរជាតិ ហើយអ្វីដែលសំខាន់ជាងនេះទៅទៀតនោះគឺភ្នំ១៥០០ឬហៅថាផ្លូវបុផ្ផាលាក់ខ្លួនក្នុងស្រុកវាលវែង ដែលប្រជាពលរដ្ឋទូទាំងប្រទេសគាំទ្ររក្សាទុកជាសម្បត្តិរបស់ជាតិមិនអាចបុគ្គលណាទៅរំលោភបំពានបានឡើយ ៕