សត្វផ្សោត ៣ក្បាល ត្រូវបានជួយសង្គ្រោះ ក្រោយប្រទះឃើញនៅឆ្នេរសមុទ្រ ស្ថិតក្នុងភូមិកែបថ្មី ក្រុងបូកគោ ខេត្តកំពត

ភ្នំពេញ៖ ក្រុមការងារខណ្ឌរដ្ឋបាលជលផលកំពត ដឹកនាំដោយលោក ស សូរិន នាយខណ្ឌ និងអង្គការអភិរក្សសមុទ្រកម្ពុជា (MCC) បាននិងកំពុងធ្វើការសង្គ្រោះសត្វផ្សោតចំនួន ៣ក្បាលដែលប្រទះឃើញនៅឆ្នេរសមុទ្រ ស្ថិតក្នុងភូមិកែបថ្មី ក្រុងបូកគោ ខេត្តកំពត។ តាមការឱ្យដឹងពីមន្ត្រីជំនាញថា កាលពីព្រឹកថ្ងៃទី១៣ ខែមេសា ឆ្នាំ២០២៥ ពលរដ្ឋបានប្រទះឃើញសត្វផ្សោតចំនួន ៥ក្បាល បានហែលមកក្បែរឆ្នេរដែលមើលទៅហាក់បីដូចជាត្រូវការជំនួយពីអ្នកជំនាញ។

ក្រោយពីទទួលដំណឹងនេះភ្លាម ក្រុមការងារខណ្ឌរដ្ឋបាលជលផលកំពត និងអង្គការអភិរក្សសមុទ្រកម្ពុជា (MCC) បានចុះទៅពិនិត្យដល់ទីតាំង ហើយក៏បានឃើញសត្វផ្សោតចំនួន ៣ក្បាល រីឯពីរក្បាលទៀតអាចនឹងហែលទៅកន្លែងផ្សេង។

មន្ត្រីជំនាញបានបន្តថា សត្វផ្សោតនេះគឺជាផ្សោតប្រភេទថ្មីដែលពុំធ្លាប់មាននៅក្នុងដែនសមុទ្រកម្ពុជា ហើយបើតាមការស្រាវជ្រាវសត្វផ្សោតប្រភេទនេះគឺភាគច្រើនរស់នៅតំបន់សមុទ្រនៃប្រទេសម៉ាឡេស៊ី។ ក្រោយពីបានពិនិត្យលើសត្វផ្សោតទាំងបីក្បាលរួចមក ក្រុមអ្នកជំនាញបានចុះទៅធ្វើការសង្គ្រោះភ្លាមៗដោយសារតែសត្វផ្សោតនេះគឺមានការអស់កម្លាំងខ្លាំង ហើយត្រូវការដកដង្ហើមដើម្បីយកកម្លាំងឡើងវិញ ដោយក្រុមអ្នកជំនាញបានធ្វើការទ្រសត្វផ្សោតទាំងនោះឱ្យច្រមុះរបស់វាផុតពីទឹកដើម្បីដកដង្ហើម ព្រោះច្រមុះរបស់សត្វផ្សោតគឺស្ថិតនៅលើខ្នងរបស់វា។

តាមការសន្និដ្ឋានដំបូង សត្វផ្សោតទាំងនេះហាក់បីដូចជាត្រូវបានហែលមកពីតំបន់ឆ្ងាយ ហើយអស់កម្លាំងទើបពួកវាហែលមកច្រាំង ឬឆ្នេរសមុទ្រដែលមានមនុស្សដើម្បីសុំជំនួយ។

ជាមួយគ្នានេះដែរ ក្រុមអ្នកជំនាញក៏បានហាមមិនឱ្យមានការប៉ះពាល់ពីប្រជាពលរដ្ឋឡើយ ព្រោះវាអាចនឹងធ្វើឱ្យសត្វផ្សោតនេះងាប់ ៕