អង្គការ BirdLife បង្កើនកិច្ចការពារនិងអប់រំផ្សព្វផ្សាយដល់ប្រជាសហគមន៍នៅតំបន់ ដែនជម្រកសត្វព្រៃលំផាត់ ដើម្បីទប់ស្កាត់បទល្មើសធនធានធម្មជាតិ

ភ្នំពេញ៖ អង្គការ BirdLife បង្កើនកិច្ចការពារនិងអប់រំផ្សព្វផ្សាយដល់ប្រជាសហគមន៍ នៅតំបន់ដែនជម្រកសត្វព្រៃលំផាត់ ដើម្បីការពារនិងទប់ស្កាត់បទល្មើសធនធានធម្មជាតិក្នុងតំបន់នេះ ។

បើតាមលោក ប៊ូ វរសក្ស នាយកកម្មវិធីអង្គការជីវិតសត្វស្លាបប្រចាំកម្ពុជាបានឱ្យដឹងថា អង្គការជីវិតធម្មជាតិ នៅកម្ពុជា (BirdLife in Cambodia) កំពុងធ្វើការក្នុងភាពជាដៃគូជាមួយក្រសួងបរិស្ថាន និងមន្ទីរ បរិស្ថានខេត្តរតនគិរីនិងខេត្តមណ្ឌលគិរី លើកិច្ចការគ្រប់គ្រង ដែនជម្រកសត្វព្រៃលំផាត់ ក្នុងគោល បំណងការពារ និងទប់ស្កាត់បទល្មើសធនធានធម្មជាតិឱ្យមានប្រសិទ្ធភាព ។

លោកបន្តថា ដោយមើលឃើញពីផលប៉ះពាល់ផ្ទាល់ ដូចជាការកាប់រានទន្រ្ទានយកដី ការកាប់ព្រៃនិងបរបាញ់សត្វព្រៃដោយខុសច្បាប់ ទើបសហគមន៍សរសេរស្លាកសញ្ញា ហាមកាប់ បំផ្លាញព្រៃឈើ ហាមបរបាញ់ ហាមដាក់អន្ទាក់សត្វ និងហាមដុតព្រៃ ហើយក៏បានចុះអប់រំ ចាក់មេក្រូផ្សព្វផ្សាយដល់ប្រជាសហគមន៍ទាក់ទងទៅ នឹងការអភិរក្សធនធានធម្មជាតិ ជីវ:ចម្រុះ ឱ្យបានគង់វង្ស ដើម្បីទប់ស្កាត់បទល្មើសនៅក្នុងតំបន់ការពារ ។

លោកបញញចាក់ថា « លំផាត់ គឺជាទីតាំងដ៏សំខាន់ទាំងព្រៃឈើទាំងសត្វព្រៃ ដូច្នេះដើម្បីថែរក្សាលំផាត់ឱ្យបានគង់វង្ស យើងត្រូវតែចូលរួមចំណែកទាំងអស់គ្នាទប់ស្កាត់ ទាំងការបរបាញ់ ការកាប់ឈើខុសច្បាប់ ការកាប់ទន្ទ្រាន យកដី ហើយសូមអាជ្ញាធរគ្រប់ជាន់ថ្នាក់នៅខាងរតនគិរីនិងមណ្ឌលគិរី សហការគ្នាទប់ស្កាត់បទល្មើស ទាំងអស់ ហើយប្រសិនបើយើងទប់ស្កាត់បាន ទាំងសត្វព្រៃនិងព្រៃឈើនៅលំផាត់ឱ្យបានគង់វង្សយូរអង្វែង ហើយទីតាំងនេះមានសក្ដានុពលក្នុងការអនុវត្តន៍កម្មវិធីកាបូនredplus អ៊ីចឹងបើសិនជាយើងអាចការពារ បាន នៅថ្ងៃអនាគតយើងអាចលក់កាបូននេះបាន » ។

លោកបានអំពាវនាវឱ្យប្រជាពលរដ្ឋ ចូលរួមការពារដែនជម្រកសត្វព្រៃលំផាត់ទាំងអស់គ្នា ព្រោះតំបន់ដែន ជម្រកសត្វព្រៃលំផាត់ បានផ្តល់ជម្រកដល់សត្វជាច្រើន ដូចជា ដំរី គោព្រៃ ខ្ទីង ខ្លា ក្របីព្រៃ ខ្លាឃ្មុំ ប្រភេទសត្វមំសាសី និងពពួកសត្វស្វា និង មានសត្វស្លាបប្រហែល១០០ប្រភេទទៀតផងដែរ ។ ក្រៅពីផ្តល់ជម្រកដល់សត្វព្រៃ ដែនជម្រកសត្វព្រៃលំផាត់ ក៏ជាជម្រក និងជាប្រភពចំណូលរបស់អ្នកស្រុក ជាង១០០គ្រួសារ ដែលភាគច្រើនជាជនជាតិព្នង ។ ពួកគេចិញ្ចឹមជីវិតដោយប្រើប្រាស់ធនធានធម្មជាតិ ដូចជា ការយកជ័រឈើ វល្លិផ្តៅ រុក្ខជាតិស្មៅ និងផ្លែឈើនៅក្នុងព្រៃផ្សេងៗទៀត ។

សូមបញ្ជាក់ថា រាជរដ្ឋាភិបាលកម្ពុជា បានចេញអនុក្រឹត្យកាលពីថ្ងៃទី៥ ខែមករា ឆ្នាំ២០១៧ សម្រេច បែងចែកដីសរុបចំនួន២៥ម៉ឺនហិកតា ដែលជាដីដែនជម្រកសត្វព្រៃលំផាត់ក្នុងខេត្តរតនគិរី និងមណ្ឌលគិរី ទៅជា៤តំបន់ ដើម្បីធានាប្រសិទ្ធភាពនៃការគ្រប់គ្រង និងលើកកម្ពស់ការចូលរួមរបស់សហគមន៍ និង សាធារណជន ក្នុងការការពារ និងអភិរក្សជីវៈចម្រុះតំបន់នេះ ៕