មេបញ្ជាការរង បញ្ជាការដ្ឋានរថក្រោះ ផ្សព្វផ្សាយព្រឹត្តិការណ៍ថ្មីៗ ក្នុងប្រទេស និងជុំវិញពិភពលោក
ភ្នំពេញ៖ ឧត្តមសេនីយ៍ត្រី កុយ សិរីវុឌ្ឍី មេបញ្ជាការរង បញ្ជាការដ្ឋានរថក្រោះ ជានាយសេនាធិការ នាថ្ងៃទី៤ ខែកក្កដា ឆ្នាំ២០២២ បានផ្សព្វផ្សាយព្រឹត្តិការណ៍ ប្រកួតកីឡាកងទ័ព នៅប្រទេសរុស្សី ជូនដល់នាយទាហានដែលត្រូវត្រៀមទៅប្រកួតប្រជែង និងបានបែងចែកកាលវិភាគវគ្គហ្វឹកហ្វឺនបំប៉នជំនាញរថក្រោះ រថពាសដែកដល់សិក្ខាកាមដែលរៀននៅបញ្ជាការដ្ឋានរថក្រោះ ។
ឯកឧត្តម មេបញ្ជាការរង បានជំរុញឲ្យសិក្ខាកាមទាំងអស់ឲ្យខិតខំប្រឹងក្រេបជញ្ជក់ក្នុងការហ្វឹកហ្វឺន ជាពិសេសសិក្ខាកាមដែលមករៀនត្រៀមទៅប្រកួតកីឡាកងទ័ពនៅ ប្រទេសរុស្សី លើវិញ្ញាសារ «ប្រយុទ្ធរថក្រោះ» ទោះនេះជាបទពិសោធន៍ថ្មីរបស់យើងក៏ពិតមែន តែយើងត្រូវតែខិតខំព្យាយាមឲ្យបានល្អសម្រាប់មុខមាត់របស់ប្រទេសជាតិយើង ។
លោកមេបញ្ជាការរង បានបន្តមានប្រសាសន៍សង្កត់ធ្ងន់ពីបញ្ហាសំខាន់នូវក្នុងប្រទេសនៃជំងឺកូវីដ-១៩ កំពុងមានការការឆ្លងរីករាលដាលជាថ្មីទៀតហើយ ដូច្នេះមិនត្រូវលែងដៃក្នុងការ ការពាររក្សានូវការពាក់ម៉ាស់ បាញ់អាល់កុលអោយបានខ្ជាប់ខ្ជួន និងកុំភ្លេចឲ្យសោះនូវវិធានការ ៣ការពារ ៣កុំ ដើម្បីការពារខ្លួនយើង និងចូលរួមកាត់ផ្តាច់ជំងឺកូវីដ-១៩ នេះចេញពីប្រទេសរបស់យើងអោយបាន ។
ឧត្តមសេនីយ៍ត្រី កុយ សិរីវុឌ្ឍី បានលើកពីសកម្មភាពការងារសប្តាហ៍ កន្លងមកដោយលោកមើលឃើញថា មានការស្វះស្វែងធ្វើការដោយយកចិត្តទុកដាក់ ទៅតាមផែនការណ៍បែងចែកកម្លាំងធ្វើការជំនាញ ការងារកសាង និងសម្អាតអនាម័យ តាមផែនការណ៍របស់ថ្នាក់លើ។ លោកបានផ្ដាំផ្ញើ ជូនពរដល់បងប្អូនយោធិនទាំងអស់ការពារថែរក្សារសុខភាពអោយបានល្អ ដើម្បីជៀសឆ្ងាយពីជំងឺដង្កាត់ផ្សេងៗទាំងអស់គ្នា ៕
