ប្រមុខការទូតកម្ពុជា៖ ប្រទេសកាន់តែច្រើនកំពុងសម្លឹងមើលអាស៊ាន ដើម្បីធ្វើជាដៃគូក្នុងការកសាងតំបន់
ភ្នំពេញ៖ ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្ត្រីការបរទេសកម្ពុជា បានថ្លែងថា នៅក្នុងឱកាសដែលកម្ពុជា កំពុង រៀបចំកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធនៅរាជធានីភ្នំពេញ អាស៊ាន ពិតជាមានមោទនភាពយ៉ាងខ្លាំង ដែលមានប្រទេសកាន់តែច្រើន កំពុងសម្លឹងមើលអាស៊ាន ដើម្បីធ្វើជាដៃគូក្នុងការកសាងតំបន់ដែលផ្អែកលើការគ្រប់គ្រងដោយបើកចំហ និងរួមបញ្ចូលគ្នា។
ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានថ្លែងដូច្នេះ ក្នុងពិធីបើកកិច្ចប្រជុំរដ្ឋមន្ត្រីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធ នាព្រឹកថ្ងៃទី ៣ខែសីហា ឆ្នាំ២០២២នេះ ហើយបានបញ្ជាក់ថា មានប្រទេសចំនួន៦ នឹងចុះហត្ថលេខាលើលិខិតុបករណ៍នៃការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិ បត្តិការ នៅតំបន់អាស៊ីអាគ្នេយ៍ ដោយធ្វើឱ្យចំនួនរដ្ឋភាគីនៃសន្ធិសញ្ញានេះកើនឡើងដល់ ៤៩ ប្រទេស។
ឯកឧត្តមសង្ឃឹមថា តាមរយៈការផ្លាស់ប្តូរបើកចំហ និងស្ថាបនារបស់អាស៊ាន នឹងអាចឱ្យយើងធ្វើ តារាងទិសដៅនៃកិច្ចសហប្រតិបត្តិការនាពេលអនាគតរបស់យើង ដើម្បីសម្រេចបាននូវអាទិភាព និង ការសម្រេចបានដូចដែលបានកំណត់ក្នុងតួនាទីជាប្រធានអាស៊ានរបស់កម្ពុជា។បន្ថែមពីនេះទៀត តាមរយៈបាវចនាអាស៊ាន “ចក្ខុវិស័យមួយ អត្តសញ្ញាណមួយ សហគមន៍មួយ” កម្ពុជាក្នុងនាមជា ប្រធានអាស៊ាន នឹងបន្តដឹកនាំដំណើរការនៃកិច្ចខិតខំប្រឹងប្រែងបង្រួបបង្រួមផ្ទៃក្នុងអាស៊ាន និង ជាមួយដៃគូសន្ទនាអាស៊ាន និងដៃគូខាងក្រៅ ដើម្បីសម្រេចបាននូវគោលដៅរបស់យើងក្នុងការ កសាងសហគមន៍អាស៊ានដែលមានសន្តិភាព ស្អិតល្មួត អន្តរទំនាក់ទំនង ធន់ និងជាសហគមន៍ នៃឱកាស។
ឯកឧត្តមឧបនាយករដ្ឋមន្រ្តីបានបញ្ជាក់ថា ក្នុងរយៈពេលបីថ្ងៃខាងមុខទៀត បណ្តារដ្ឋមន្រ្តីការបរទេស អាស៊ាន និងដៃគូនឹងចូលរួមក្នុងកិច្ចប្រជុំថ្នាក់រដ្ឋមន្ត្រីសំខាន់ៗជាបន្តបន្ទាប់ដែលនឹងមានឱកាស ពិភាក្សា លើបញ្ហាសំខាន់ៗទាក់ទងនឹងវឌ្ឍនភាពក្នុងកិច្ចខិតខំប្រឹងប្រែង កសាងសហគមន៍អាស៊ាន របស់យើង ដែលជាផ្លូវឆ្ពោះទៅរកការងើបឡើងវិញកាន់តែខ្លាំងពីជំងឺរាតត្បាត Covid-19 កិច្ចសហប្រតិបត្តិការ និងភាពជាដៃគូរបស់យើងជាមួយដៃគូខាងក្រៅ និងលើបញ្ហាក្នុងតំបន់ និង អន្តរជាតិ ជាពិសេសបញ្ហាប្រឈមផ្នែកសន្តិសុខជាបន្ទាន់ជាច្រើនដែលអាចបំផ្លាញសន្តិភាព និង ស្ថិរភាពក្នុងតំបន់របស់យើង ប្រសិនបើយើងមិនអាចដោះស្រាយវាបានត្រឹមត្រូវ។
សូមបញ្ជាក់ថា កិច្ចប្រជុំរដ្ឋមន្ត្រីការបរទេសអាស៊ាននិងកិច្ចប្រជុំពាក់ព័ន្ធ ត្រូវបានបង្កើតឡើងកាលពី ឆ្នាំ១៩៦៧ ដោយសេចក្តីថ្លែងការណ៍នៅរាជធានីបាងកកប្រទេសថៃ បន្ទាប់ពីអាស៊ានត្រូវបានបង្កើត ឡើង ។ កិច្ចប្រជុំរដ្ឋមន្ត្រីការបរទេសអាស៊ានមានការប្រជុំយ៉ាងហោចណាស់៤ដងក្នុង១ឆ្នាំហើយអាច កោះប្រជុំពិសេសនៅពេលចាំបាច់ ដើម្បីពិភាក្សាអំពីបញ្ហាដែលទាមទារឱ្យមានការយកចិត្តទុកដាក់ ជាបន្ទាន់ពីអាស៊ាន ។
កិច្ចប្រជុំរដ្ឋមន្ត្រីការបរទេសអាស៊ាន ពិនិត្យនិងពិភាក្សាជាទៀងទាត់ អំពីកិច្ចខិតខំប្រឹងប្រែង កសាង សហគមន៍អាស៊ាននិងទិសដៅជាយុទ្ធសាស្ត្ររបស់ខ្លួន ក៏ដូចជាការប្រព្រឹត្តិទៅនៃទំនាក់ទំនង ជាមួយ បណ្តាប្រទេសផ្សេងៗទៀត ក្រៅប្រទេសសមាជិកអាស៊ាន។
សូមបញ្ជាក់ផងដែរថា ប្រទេសកម្ពុជា បានចូលជាសមាជិកអាស៊ានកាលពីថ្ងៃទី៣០ខែមេសា ឆ្នាំ១៩៩៩ ហើយបានទទួលធ្វើជាម្ចាស់ផ្ទះ រៀបចំកិច្ចប្រជុំរដ្ឋមន្ត្រីការបរទេសអាស៊ាន បានចំនួន ៣លើក គឺ កាលពីឆ្នាំ២០០២ ឆ្នាំ២០១២ និងនៅឆ្នាំ២០២២នេះ៕
