ក្រសួងទេសចរណ៍ ផ្ដល់រយៈពេលអនុគ្រោះលើកលែងការពិន័យអន្តរកាណ៍ជាប្រាក់ចំពោះអាជីវកម្ម សេវាកម្មមគ្គុទ្ទេសក៏ទេសចរណ៍
ភ្នំពេញ៖ ក្រសួងទេសចរណ៍ បានចេញសេចក្ដីជូនដំណឹងស្ដីពីការផ្ដល់រយៈពេលអនុគ្រោះលើកលែងការពិន័យអន្តរកាណ៍ជាប្រាក់ចំពោះអាជីវកម្ម សេវាកម្មមគ្គុទ្ទេសក៏ទេសចរណ៍។
ក្នុងសេចក្ដីជូនដំណឹងរបស់ក្រសួងទេសចរណ៍បានឲ្យដឹងថា ក្រសួងជម្រាបជូនដំណឹងដល់សមាគមមគ្គុទ្ទេសក៍ទេសចរណ៍ និងមគ្គុទ្ទេសក៍ទេសចរណ៍ទាំងអស់ មេត្តាជ្រាបថា ដើម្បីជាយន្តការលើកចិត្តដល់លោក-លោកស្រីជាមគ្គុទ្ទេសក៍ទេសចរណ៍គ្រប់កម្រិត ក្នុងការត្រៀមការងើបទ្បើងវិញនៃវិស័យទេសចរណ៍កម្ពុជា និងឆ្ពោះទៅកាន់ឆ្នាំទស្សនាកម្ពុជា២០២៣ (Visit Cambodia Year 2023) ក្រសួងទេសចរណ៍សម្រេចដាក់ចេញនូវយន្តការ ដូចខាងក្រោម៖
១. ផ្តល់រយៈពេលអនុគ្រោះលើកលែងការពិន័យអន្តរការណ៍ជាប្រាក់ ចំពោះការហួសសុពលភាពអាជ្ញា- បណ្ណមគ្គុទ្ទេសក៍ទេសចរណ៍គ្រប់កម្រិត ដោយចាប់អនុវត្តពីថ្ងៃចុះហត្ថលេខានេះ ដល់ថ្ងៃទី៣១ ខែធ្នូ ឆ្នាំ២០២២។
២. ផ្តល់ការលើកលែងការស្នើសុំលិខិតបញ្ជាក់សុខភាព ដោយយកជំនួសមកវិញនូវលិខិត ឬកាតបញ្ជាក់ការចាក់វ៉ាក់សាំងកូវីដ-១៩គ្រប់ដូសនិងដូសជំរុញ ដោយចាប់អនុវត្តពីថ្ងៃចុះហត្ថលេខានេះ ដល់ថ្ងៃទី៣១ ខែធ្នូ ឆ្នាំ២០២៣។
មគ្គុទ្ទេសក៍ទេសចរណ៍ដែលមានអាជ្ញាបណ្ណទេសចរណ៍ហួសសុពលភាពត្រូវរួសរាន់មកដាក់ពាក្យស្នើសុំបន្តអាជ្ញាបណ្ណទេសចរណ៍នៅតាមមន្ទីរទេសចរណ៍រាជធានី-ខេត្ត។ ចំពោះព័ត៌មានបន្ថែម សូមទំនាក់ទំនងទូរសព្ទលេខ ០១២ ៧៥៧ ៣៧៦ ឬ០៩២ ៧៧៩ ៨៣៣ រៀងរាល់ម៉ោងធ្វើការ។
