នាយឧត្តមសេនីយ៍ ហុីង ប៊ុនហៀង ទទួលជួបមេបញ្ជាការរង បញ្ជាការដ្ឋានយោធភូមិភាគទី៩ កងទ័ពប្រជាជនវៀតណាម
ភ្នំពេញ៖ នាយឧត្តមសេនីយ៍ កិត្តិបណ្ឌិត ហុីង ប៊ុនហៀង អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការបញ្ជាការដ្ឋានអង្គរក្ស នាព្រឹកថ្ងៃទី១៣ សីហា ឆ្នាំ២០២២នេះបានទទួលជួប ឧត្តមសេនីយ៍ត្រី ង្វៀន វ៉ាងតៀន មេបញ្ជាការរង បញ្ជាការដ្ឋានយោធភូមិភាគទី៩ កងទ័ពប្រជាជនវៀតណាម ដឹកនាំប្រតិភូជួបសម្ដែងការគួរសម នៅទីបញ្ជាការ បញ្ជាការដ្ឋានអង្គរក្ស ក្រុងតាខ្មៅ។
ក្នុងឱកាសអញ្ជើញមកដល់ របស់ ឧត្តមសេនីយ៍ត្រី ង្វៀន វ៉ាងតៀន មេបញ្ជាការរង បញ្ជាការដ្ឋានយោធភូមិភាគទី៩ កងទ័ពប្រជាជនវៀតណាម បានដឹកនាំប្រតិភូជួបសម្ដែងការគួរសម ឯកឧត្តម នាយឧត្តមសេនីយ៍ កិតិ្តបណ្ឌិត ហុីង ប៊ុនហៀង អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការបញ្ជាការដ្ឋានអង្គរក្ស និង មេបញ្ជាការរង នាយទាហានក្នុងបញ្ជាការដ្ឋានអង្គរក្ស នៅទីបញ្ជាការ បញ្ជាការដ្ឋានអង្គរក្ស នៅក្នុងបរិយាកាសប្រកបដោយមនោសញ្ជេតនា កិច្ចសហប្រតិបត្តិការជា មិត្តភាព ឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង បានស្វាគមន៍ប្រតិភូនិងបានថ្លែងអំណរគុណដល់ បញ្ជាការដ្ឋានយោធភូមិភាគទី៩ កងទ័ពប្រជាជនវៀតណាម ដែលជានិច្ចកាលតែងតែបានជួយហ្វឹកហ្វឺនដល់បញ្ជាការដ្ឋានអង្គរក្សលើជំនាញជាច្រើនពិសេសគឺជំនាញអង្គរក្សពិសេសសម្រាប់ការពារថ្នាក់ដឹកនាំជាតិ អន្តរជាតិ ។
នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង បញ្ជាក់អំពីចំណងសាមគ្គីភាព មិត្តភាព កិច្ចសហប្រតិបត្តិការរវាងប្រទេសទាំងពីរដែលជាបងប្អូនភូមិផងរបងជាមួយគ្នា និងបន្តការសហការឈរលើសាមគ្គីភាពជាយូអង្វែងតទៅទៀត។
លោកឧត្តមសេនីយ៍ត្រី ង្វៀន វ៉ាងតៀន បានវាយតំលៃខ្ពស់ចំពោះការរីកចម្រើនប្រែមុខមាត់ថ្មីរបស់ព្រះរាជាណាចក្រកម្ពុជា និងបានបញ្ជាក់ថា ចំណងសាមគ្គីភាព មិត្តភាព កិច្ចសហប្រតិបត្តិការរវាងប្រទេសទាំងពីរនឹងនៅស្ថិតស្ថិរជាអមតៈ។
ឧត្តមសេនីយ៍ត្រី បានជូនពរ នាយឧត្តមសេនីយ៍ កិតិ្តបណ្ឌិត និងថ្នាក់ដឹកនាំនាយទាហាន នាយទាហានរង ពលទាហាន នៃយោធពលខេមរភូមិន្ទ រួមជាមួយក្រុមគ្រួសារសូមមានសុខភាពល្អ និងសម្រេចបានជោគជ័យគ្រប់ភារកិច្ច។
នាយឧត្តមសេនីយ៍កិត្តិបណ្ទិត ហ៊ីង ប៊ុនហៀង បានថ្លែងអំណរគុណចំពោះគណៈប្រតិភូយោធភូមិភាគទី៩ កងទ័ពប្រជាជនវៀតណាម ដែលបានឆ្លៀត
ពេលដ៏មានតម្លៃមកនេះ។
លោកមេបញ្ជាការ បានរម្លឹកពីចំណងសាមគ្គីភាព មិត្តភាពរវាងប្រទេសទាំងពីរដែលមានជាយូរណាស់មកហើយ ក្នុងនោះវៀតណាមនៅតែបន្តជួយដល់កម្ពុជា ពិសេសការបណ្ដុះបណ្ដាលធនធានមនុស្សក្នុងកងយោធពលខេមរភូមិន្ទ។
នាយឧត្តមសេនីយ៍កិត្តបណ្ឌិត អគ្គមេបញ្ជាការរង បានលើកឡើងពីស្ថានភាពបច្ចុប្បន្ននៅកម្ពុជាដែលជំងឺកូវីដ-១៩មានសភាពធូរស្រាល ក្រោមការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន បានដាក់ចេញយុទ្ធសាស្ត្ររហ័សទាន់សភាពការណ៍ ប្រកបដោយភាពហ្មត់ចត់ រហូតទប់ស្កាត់មិនអោយការឆ្លងរាលដាលចូលក្នុងសហគមន៍ឡើងវិញ។
នាយឧត្តមសេនីយ៍កិត្តបណ្ឌិត ហ៊ីង ប៊ុនហៀង សង្ឃឹមថា ក្រោយបញ្ចប់វិបត្តិកូវីដ-១៩ កងទ័ពប្រទេសទាំងពីរនឹងបន្តផ្លាស់ប្ដូរទស្សនកិច្ចទៅវិញទៅមកដើម្បីពង្រឹងពង្រីកចំណង សាមគ្គីភាព មិត្តភាព កិច្ចសហប្រតិបត្តិការ កាន់តែស្អិតរមួតថែមទៀត ក្នុងនាមប្រទេសជិតខាងគ្នា៕
