បទវិភាគ៖ភាពខុសគ្នារវាងចម្លើយ និងដោះសារ

កាលពីថ្ងៃចន្ទ ទី០៨ ខែសីហា ដើមសប្តាហ៍នេះ ភ្នាក់ងារ FBI របស់សហរដ្ឋអាមេរិកបានចូលឆែកឆេរគេហដ្ឋានវីឡា Mar-a-Lago របស់អតីតៈប្រធានាធិបតីលោក ដូណាល់ ត្រាំ ដែល ស្ថិតនៅឆ្នេរ Palm Beach នៃរដ្ឋផ្លរីដា។ ជាលទ្ធផល ក្រុមការងារ FBI បានរកឃើញ “ឯកសារសម្ងាត់ជាតិ” ដោយប្រមូលបានជាង២០កេសជាភស្តុតាងដាក់បន្ទុក។ ក្នុងចំណោមឯកសារជាតិទាំងនោះ គឺឯកសារមួយចំនួនមានប្រថាប់ត្រាផ្នែកខាងលើ ថា “TS/SCI” ដែលមានន័យថា Top Secret/Sensitive Compartmented Information ។ ពោល គឺជា”ឯកសារសម្ងាត់ជាតិកំរិតខ្ពស់បំផុត”។

សូមបញ្ជាក់ថា កន្លងមកលោក ត្រាំ ធ្លាប់បានបដិសេធសហការជាមួយរដ្ឋមន្រ្តីក្រសួងយុត្តិធម៌ លោក Merrick Garland និងចៅក្រមក្នុងការចុះត្រួតពិនិត្យ និងប្រមូលឯកសារសម្ងាត់ជាតិចេញពីផ្ទះរបស់គាត់។ ការបដិសេធនេះ គឺជាដើមចមនាំអោយកើតមានការចូលឆែកឆេរដោយ FBI តាមការបង្គាប់បញ្ជារបស់ដីកាតុលាការ។

ទោះជាយ៉ាងណាលោក ត្រាំ បានផ្តល់ចម្លើយថា ឯកសារទាំងអស់ដែលរក្សាទុកក្នុងផ្ទះរបស់គាត់លែងជាឯកសារសម្ងាត់ជាតិទៀតហើយ។ ពោល គឺវាក្លាយជាឯកសារសាធារណៈ។ ជាមួយគ្នានេះផងដែរ លោក ត្រាំ ក៏បានចោទប្រកាន់ក្រុមការងារ FBI ថាបានយកឯកសារទាំងអស់នេះទៅទុកនៅក្នុងផ្ទះរបស់គាត់អម្លុងពេលចុះទៅឆែកឆេរ។

ប៉ុន្តែ ចម្ងល់ស្ថិតនៅត្រង់ថា ប្រសិនបើឯកសារជាតិទាំងជាង២០កេសលែងសម្ងាត់ តើប្រយោជន៍អ្វី ដែល FBI លេងល្ខោនយកឯកសារគ្មានបន្ទុកផ្លូវច្បាប់ទៅលាក់ទុកនៅផ្ទះលោក ត្រាំ ?

សូមរំលឹកថា ក្នុងអាណត្តិជាប្រធានាធិបតីសហរដ្ឋអាមេរិកទី៤៥ ចាប់ពីឆ្នាំ២០១៧ ដល់ឆ្នាំ២០២១ លោក ត្រាំ មានរឿងអាស្រូវធំៗជាច្រើន រួមមានរឿងបរិហារិ៍ក្នុងគ្រួសារជាមួយក្មួយស្រីបង្កើត ជាមួយបងស្រីបង្កើត រហូតដល់រឿងអាស្រូវគេចពន្ធ រឿងព្រហ្មទណ្ឌពាក់ព័ន្ធការបេះបោរហិង្សានៅវិមានសភាកាពីតូល រួមទាំងរឿងអាស្រូវប្រទេសរុស្សុីនៅក្រោយខ្នងនៃលទ្ធផលជ័យជំនះរបស់លោក ត្រាំ ក្លាយជាប្រធានាធិបតីសហរដ្ធអាមេរិចជាដើម៕

លោកស្ទីវិន សាន់,អគ្គនាយករងHNA