ឯកឧត្តម ច័ន្ទ សុផល នាំយកអំណោយសម្តេច ស ខេង និងលោកជំទាវ ចែកជូនប្រជាពលរដ្ឋ១៣ភូមិ ក្នុងឃុំឃ្លាំងមាស ស្រុកបវេល ខេត្តបាត់ដំបង
ភ្នំពេញ៖ តាមអនុសាសន៍ណែនាំដ៏ខ្ពង់ខ្ពស់របស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងារចុះមូលដ្ឋានខេត្តបាត់ដំបង និងខេត្តព្រៃវែង ឯកឧត្តម ចន្ទ័ សុផល តំណាងរាស្ត្រមណ្ឌលខេត្តបាត់ដំបង និងជាអនុប្រធានគណៈកម្មការទី៤ នៃរដ្ឋសភា ព្រមទាំង ឯកឧត្តម ខាន់ ម៉ាណេរ រដ្ឋលេខាធិការ ឯកឧត្តម ព្រួញ រិទ្ធថា ប្រធានមន្ទីរសាធារណការ និងដឹកជញ្ជូន ខេត្តបាត់ដំបង ព្រមទាំងអស់លោក លោកស្រី និងយុវជនស្ម័គ្រចិត្ត នៃក្រុមការងារក្រឡាហោមមនុស្សធម៌បាត់ដំបងជាច្រើនរូបទៀត បានអញ្ជើញដឹកនាំក្រុមការងារក្រឡាហោមមនុស្សធម៌ នាំយកអំណោយផ្ដល់ជូនប្រជាពលរដ្ឋមានការខ្វះខាតក្នុងជីវភាពចំនួន២៧៦គ្រួសារ នាព្រឹកថ្ងៃទី១៤ ខែសីហា ឆ្នាំ២០២២។
តំណាងគ្រួសារប្រជាពលរដ្ឋដែលបានអញ្ជើញមកទទួលអំណោយសម្ដេចក្រឡាហោម និងលោកជំទាវ នាពេលនេះមកពី១៣ភូមិ ក្នុងឃុំឃ្លាំងមាស ស្រុកបវេល ខេត្តបាត់ដំបង។អំណោយដែលបានផ្ដល់ជូនរួមមាន អង្ករ១ការ៉ុង មី១កេស ត្រីខ១យួរ ទឹកស៊ីអ៊ីវទឹកត្រី១យួរ ទឹកសុទ្ធ២កេស ព្រមទាំងម៉ាស់និងអាល់កុល។
ឯកឧត្តម ចន្ទ័ សុផល និងឯកឧត្តម ខាន់ ម៉ាណេរ ក៏បានពាំនាំនូវការផ្ដាំផ្ញើសាកសួរសុខទុក្ខ និងក្ដីនឹករលឹកដ៏ជ្រាលជ្រៅពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចក្រឡាហោម និងការថ្លែងអំណរគុណប្រជាពលរដ្ឋដែលបានចូលរួមគាំទ្រការដឹកនាំរាជរដ្ឋាភិបាល ស្រលាញ់សុខសន្តិភាព និងការអភិវឌ្ឍ។
ឯកឧត្តមបានអំពាវនាវដល់ប្រជាពលរដ្ឋ ត្រូវបន្តអនុវត្តវិធានការសុខាភិបាលដើម្បីបង្កាជំងឺកូវីដ-១៩ ជាពិសេសអញ្ជើញទៅចាក់វ៉ាក់សាំងឱ្យបានគ្រប់គ្នាតាមកាលកំណត់របស់មន្ត្រីសុខាភិបាល ដើម្បីរួមគ្នាបង្កើតភាពសាំសហគមន៍ ជាប្រយោជន៍សម្រាប់ការបន្តអភិវឌ្ឍសេដ្ឋកិច្ច និងសង្គម៕
