កងកម្លាំង សូម៉ាលី បញ្ចប់ការវាយប្រហារ សណ្ឋាគារ ដែលមានមនុស្ស ២០ នាក់ត្រូវបានសម្លាប់

សូម៉ាលី៖អាជ្ញាធរសូម៉ាលីកាលពីថ្ងៃអាទិត្យហាក់ដូចជាបានបញ្ចប់ការវាយប្រហារដ៏សាហាវទៅលើសណ្ឋាគារមួយក្នុងរដ្ឋធានីដែលមានមនុស្សយ៉ាងហោចណាស់២០នាក់បានស្លាប់។

វាត្រូវចំណាយពេលជាង ៣០ ម៉ោង កងកម្លាំងសូម៉ាលី ដើម្បីទប់ស្កាត់ខ្មាន់កាំភ្លើង ដែលបានសម្រុកចូលសណ្ឋាគារ Hayat របស់ទីក្រុង Mogadishu កាលពីល្ងាចថ្ងៃសុក្រ ក្នុងការវាយលុកដែលបានចាប់ផ្តើមជាមួយនឹងការផ្ទុះយ៉ាងខ្លាំង។

Ismail Abdi អ្នកគ្រប់គ្រងសណ្ឋាគារបានប្រាប់ AP ថាខណៈពេលដែលការឡោមព័ទ្ធត្រូវបានបញ្ចប់ កងកម្លាំងសន្តិសុខនៅតែធ្វើការដើម្បីបោសសម្អាតតំបន់នោះ។

មិនអាចឮស្នូរកាំភ្លើងទៀតទេក្រោយម៉ោង៩ព្រឹកម៉ោងក្នុងស្រុក។ អ្នកមើលបាន ប្រមូលផ្តុំគ្នានៅខាងក្រៅទ្វារនៃសណ្ឋាគារដែលរងការខូចខាតយ៉ាងធ្ងន់ធ្ងរ កាលពីព្រឹកថ្ងៃអាទិត្យដោយបានអង្កេតកន្លែងកើតហេតុ។

ប៉ូលីសនៅមិនទាន់ផ្តល់ការពន្យល់លម្អិតពីរបៀបដែលការវាយប្រហារនេះលាត ត្រដាង។គេនៅមិនទាន់ដឹងថាមានខ្មាន់ កាំភ្លើងប៉ុន្មាននាក់ចូលក្នុងសណ្ឋាគារ។

ក្រុមអ៊ីស្លាមជ្រុលនិយម al-Shabab ដែលមានទំនាក់ទំនងជាមួយក្រុមអាល់កៃដា បានអះអាងទទួលខុសត្រូវចំពោះការវាយប្រហារនេះ ដែលជាការប៉ុនប៉ងចុងក្រោយបំផុតរបស់ខ្លួន ដើម្បីវាយប្រហារកន្លែងដែលមន្ត្រីរដ្ឋាភិបាលបានទៅទស្សនា។

ការវាយប្រហារលើសណ្ឋាគារនេះគឺជា ឧប្បត្តិហេតុ ភេរវកម្មធំដំបូងគេក្នុងទីក្រុង Mogadishu ចាប់តាំងពីមេដឹកនាំថ្មីរបស់សូម៉ាលី លោកHassan Sheikh Mohamud បានចូលកាន់តំណែងក្នុងខែ ឧសភា។

អគ្គលេខាធិការអង្គការសហប្រជាជាតិលោក Antonio Guterres បានថ្កោលទោសការវាយប្រហារនេះ បើយោងតាមសេចក្តីថ្លែងការណ៍របស់អ្នកនាំពាក្យបានអោយដឹងថា អង្គការសហប្រជាជាតិគាំទ្រប្រជាជនសូម៉ាលី “ក្នុងការប្រយុទ្ធប្រឆាំងនឹងអំពើភេរវកម្ម និងការដើរឆ្ពោះទៅរកសន្តិភាព”។